E A LE UGA E TAUSILI-AE TIGAINA AI FUA LE ATIGI- IT IS THE CHARACTERISTIC OF THE ROBBER-CRAB TO CLIMB BUT THE SHELL SUFFERS IN VAIN THEREBY

Tatou te viia pea le alofa ma le agalelei o Atua-ona o lea foi ua tatou aulia manuia mai lenei Aso Sa-e faaopoopo i lo outou soifua Samoa ma so matou ola.

E ui foi ina sa tatou fetaia’i ma mala ma puapuaga i lena vaiaso ua mavae atu-aemaise ai o le maliu ma le oti ua motusia ai mafutaga pele ma nisi o matua, uso ma tuafafine-aemaise ai o nai fanau pele-ae leai so tatou loto e fai-e pule pea le Atua!

Ia ia te Ia pea le viiga e faavavau-faavavau lava! Ae alo maia-o le tatou talanoaga masani foi lenei i Aso Ta’itasi-tatou te fefaasoaa’i ai i mea o loo tutupu i totonu o lo tatou atunuu!

Ae pei lava ona faamanatu atu pea-e leai se faamoemoe o lenei tusitusiga e faaleaga i se tasi-pe faaoloataua foi se isi-e le o se tala fatu fua-ae ua na o ni nai motugā’afa lava- e tusa ai ma nisi o mea ua tulai mai i totonu o lo tatou atunuu- ae le masani ai.

E i ai la le manatu-ua manino ma malamalama le ulutala o le tatou talanoaga-ae afai e leai-o se otootoga la lenei o le uiga ma le fe’au o le ulutala o le tatou talanoaga. Ua outou silafia ma tatou iloa-o le meaola lenei (tulou) o le uga-e matua tele lava i luga o soo se matafaga oneone.

O le amio masani la a nei mea o “uga”-e tauva ma isi uga-poo ai e aupito i sili ona maualuga le laau i luga o le matafaga –e ‘a’e ai! O le mea mata’utia la i lenei meaola-e leai lava se uga-e nofonofo ae le auai i lea tauvaga!

O le mea la e masani ona vaaia ai-“o soo se uga lava e toe pa’ū mai sea laau i luga o le matafaga-e lelei pe a pa’ū i luga o le oneone- ae a pa’ū i luga o le papa-o lona ‘afu- e matua nutilili’i lava lona atigi ma mate ai.

Ae o le fesili-o le a le pogai o le latou tauvaga poo ai e maualuga lana ‘a’e i luga o le laau? O le tali-e mafua ona o le faalialia vale ma le fiailoa ina tele! A tatou tilotilo la Samoa i vevesi sa tula’i mai i le va o Aoga Maualuga ma Kolisi i totonu o le atunuu-lea o loo tau saili e le Palemia se faiga e fo’ia ai-o le fesili-o le a le pogai?

Se mea na fai atu matua e o e fai? Se mea na fai atu faia’oga e o e fai? O le tali-LEAI! Ae o le a la le pogai? Ailoga e mafua ona o feso’otaiga televavave faa-tekonolosi i ona po nei? Ailoga na una’ia e faia’oga ma tama tuai o ia a’oga?

Afai la e leai-o le a le pogai? O le tali-ua fia tauva poo ai e sili e pei o le amio a le uga! O le a le amio a le uga? O le amio a le uga o le fia tauva lea poo ai e maualuga le la’au na te mafai ona a’ea! Ia-faitalia ia le uga ia-aua afai o lona natura masani lea-e le tioa la ona fia tauva i isi uga poo ai e maualuga lana a’e!

Ae afai la e faapena foi le fia tauva o tamaiti a’oga poo ai e sili ona maualuga le la’au e a’e ai-ia manatua la-o le taui o le uga e fia maualuga lana a’e-o le pa’ū ifo lea-nuti-lili’i lona atigi! A nuti la le atigi-e faapefea ona toe ola?

Ae faapefea la le fia maualuga o le tamaititi a’oga? O le taui o tamaiti a’oga fia maualuga-e nuti foi o latou atigi! O ai lona atigi? O ona matua! A nutilili’i la matua-e faapefea ona ola?

E le’i fai atu la matua e o e fai se tauvaga poo ai e maualuga lana a’e-ae ia o i le a’oga e maua ai le poto e manuia ai lona lumana’i!

Ia o lea la ua fia tauva-fia tauva-ae afaina ai matua ma faia’oga-ae le’i fai atu matua poo faia’oga e o fai se tauvaga poo ai e maualuga lana ‘a’e! Afai la o le tulaga lea o le a i ai le fanau a’oga-a’o i latou ia e mafai ona faamoemoe i ai se manuia o Samoa-o a la manuia a maua mai ai?

O le ola fia tauva i mea valea ma le fia tagata-e tua vale! E le mafai ona faamoemoe i ai se aiga, nuu ma se itumalo-ma e leai lava se mea lelei na te mafai ona fai mo lona aiga ma lona nuu-se’ia vagana ai le faatupu vevesi-gaoi ma le faomea ma isi uiga leaga uma!

E mafua la ona afu matua-ona o le mana’o ia ola manuia fanau pe a popoto-ae le o manaomia se tauvaga poo ai e sili ona faavalevalea! Ia o lea ua outou faatupu vevesi-ae o ai o loo ta’u ai? O le tali- o outou matua! O le a la le uiga o lea mea?

O lona uiga-o lea ua ta’usala fua outou matua ae leai se mea sese e tasi na o latou faia? Faauta la i le mata’utia o le taunuuga o le fia maualuga ma le fia tama mamafa? O lea la ua fai mai le ulutala o le tatou Talanoaga i lenei Aso Sa-“E a le uga e tausili-ae tigaina ai le atigi.”

O lona uiga- e a outou e fai mea mataga-ae ta’u atu ai ma nai outou matua-ae le o se mea lena na latou fai atu tou te o e fai!

O le toe upu faala’ei’au la  i tupulaga uma o Samoa-“Aua ne’i outou tausili i mea valea e leai se aoga-ae ia outou manatua le taulaga osi a nai outou matua i aso uma-o le tuuina atu lea o outou i aoaoga ina ia aoaoina ma avea ma tagata e tua i ai outou aiga, nuu ma ekalesia!

E leai se mea lelei e maua i le fiasili ma le fia iloa-ae taua le loto maulalo ma le tauivi mo mea silisili mai le Atua! Ia manuia tele le Aso Sa Samoa ma ia faamanuia atu le Atua!

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investigative articles.

Ready to signup?