LAUGA - “O le Afio mai o le Tupu ma le Malo e faavavau”

RP
By Rev. Petaia Setu, 24 December 2017

( Mataio 3:1-4)


E iai le isi igoa o Ioane le Papatiso, e pei ona amata fofola mai ai le feau moni o le tusi a le perofeta o Isaia,  o le afio mai o le Mesia, o le Auauna a Ieova, na ia faamă’alo mai ai lē ua ta’ua “o le leo”. “ O le leo o lē ua alaga i le vao, “Inā teuteu ia outou le ala o le Alii; ia outou faalauleleia le ala tele i le vao lafulafuā mo lo tatou Atua.” (Isa.40:3).

O le leo lea, e ui ina le ta’ua mai poo ai, a o le sāvali ia a Keriso. E lua ana matafaioi: o ia o le leo, o ia foi o le avefeau. (Mal.3:1). O mea uma ia o loo tā’ua mai ai e le Feagaiga Tuai Ioane le Papatiso.

E le gata la ina taulagi mai i le Fegaiga Tuai poo le Tusi Paia le afio mai o Keriso, ae ua faapena foi ona faailoa mai ai ma le avefeau poo le sāvali a Keriso e muamua mai i ona luma, o Ioane le Papatiso. I le tusiga nei a Mataio, ua tatou faalogo ai i le “leo”. Inā salamō ia outou auā ua latalata mai le malo o le lagi. Auā o ia lava lenei na fai mai ai le perofeta o Isaia, ua faapea mai, O le leo o lē ua ’alaga i le vao, Inā teuteu ia outou le ala o le Alii, ia faalaulelei ona ala. (f.2,3).

E tatau ona faalauiloa le Tupu. O le tiute lea o le sāvali o le folafola ma faalauiloa a o lumanai le afio mai o le Tupu, e pei ona masani ai ofisa o le Malo o Roma i femalagaiga a le Kaisara.

Samoa e, nei mātele tatou i le tapenaina o fafo. A o le feau a le savali o oe. o ala faaleagaga o lou olaga o loo ’alaga ai le leo. Ia e salamō. Ia e faasaga ese mai lou lalolagi tuai. Lafoai lou tuanai. Ia inoino i lou tagata tuai. Faalaulelei ma faamatagofie lou loto i le toe fuataiina e lelei e talitalia ai le oo mai o le faaolataga a le Alii i lou olaga.

Manaia le fautuaga mai le Matagaluega o leoleo. O le fafagu i pulega a alii ma faipule o nuu ma afioaga ia tatou galulue faatasi mo le tapenaina o le lotoifale faaletagata soifua. Ia pulea lelei le amio. Ioe, o totonu e amata mai ai le faafouga ma le olaga lelei.

Fai mai Iesu, o se faafouga e amata mai fafo ae galue i totonu, o le amataga lena o se taunuuga sesē. Sa amata Keriso i totonu ma galueaina atu i fafo. Ona pau lea o le auala e maua ai se olaga lelei, ia muamua ona maua o le loto e lelei. Le loto ua salamō. Ua faamaualalo ile Atua. o tapenaga ia o le faalauiloaina o le malo o le lagi o loo momo’e ai le sāvali a Keriso.

ADVERTISEMENT

O le faalauiloaina o le malo o le lagi sa alagaina i le vao. E le o le falesa poo se malumalu, a o le vao. E te le faatali i le omai o tagata i le falesa. O oe e susū atu i le gaoā, i le maupuepue, i loto piopio, ma loto a’e i mauga, o loto pogisa ma loto ua sauāina e le agasala, e ta’u atu iai le talalelei o le faaolataga.

O Ioane e tupuga mai i le gafa faifeau (Arona). A o lana galuega e le i laugaina i se pulelaa. Sa mānu i auvae mauga; pua’ina i magāala. O le leo o lē ua alaga i le vao. O nofoaga o tagata leiloloa. O tagata ua taaloa o latou olaga. O ē ua faasegosego i le malamalama. Ua nasu o latou olaga i mea sesē ma mea leaga. E manaomia ona teuteu ma ia faalaulelei.

O le lauga a le sāvali, Salamō, ua oo mai le malamalama. Tapena lelei o outou olaga. Faamaopopo lelei lou toalua ma lau fanau. Faapotopoto lou aiga, lau aufaigaluega, lou nuu, o au pa’aga ia Keriso Iesu. Faasaga a’e ou mata  i mauga. Ta’u i le Atua lou tagata leaga. Faatoese i au amio matagā. Faalelei ma lē ua ita mai ia te oe. Alofa i lē ua fai oe mona fili. Ia e loto maualalo, ma ia maua le loto faamagalo. Ia tauleleia i la le agaga, ma ia faauuina oe e le Agaga ma na pulea lou olaga.

Samoa e, o lelei na o loo alagaina e le muā’au poo le avefeau a le Alii. Ia saunia nei loa oe. ia le faa-manu po’ia i ofaga oe, a ia pa’ia ma mamā ma faafouina lou olaga atoatoa e tali ai le Alii lou Faaola. O le faalauiloaina o le malo e faavavau, o le faasalalauina o le mau na aumai e le avefeau. O le lagi soifua o le mau, o uiga ma le soifuaga o le avefeau.

O se olaga sili ona faigofie ma taugofie o loo molimauina e le tusitala lenei o Mataio. E tele ina o tatou tuuaiina le mativa ma le lē tele o ni mea e maua i aso la. Peitai o le faigofie ma le faigata, o mamanu lava a oe ma a’u. O le taugofie ma le taugata, ua asosi iai le olaga faatau va. A o le atalii o Sakaria, o mea ua mafai e ona lava lima. O mea ua foaiina e le Atua i lona siomaga (f.4). 

Le au uso e, e faapefea ona tapena lau tali malo? E le o afaina se isi ola i lou tausili? O lē fea malo o loo e tapenapena iai? A o fea o iai lau faamamafa, o fafo poo totonu? Poo e mautinoa lē o loo e tāpena ma nofo faatali iai? Poo e silafia si’aula, o le malo o le Atua o le lagi, o le malo tumau lea e faavavau, faavavau lava Amene?

Le ekalesia e, pe le o oe e a le sāvali a Keriso i nuu ma afioaga? O ’e malamalama ea i lou tulaga faa avefeau? Uso e, ua le o oe le feau. E le ōu foi le feau. Tulai, savali, ta’u atu le moni i tagata. Faailoa le faaolataga i tagata uma. Lauga le faauuga a le Atua i le loto salamō. Folafola le Keriso faauuina i lau fanau ma lou aiga. Faasoa le alofa faaola ole Atua i ou tuaoi. Faailoa i le malo o Samoa ma atumotu uma o le Pasefika e tasi lava le malo tumau. O le malo o faamanuiaga. O le malo e saoloto ma olioli uma ai tagata. E tasi ai lanu ma gagana. E le maua iai ni loimata ma ni faanoanoaga. 

E leai se la poo se masina; e malamalama faasoloatoa aso uma lava. Poo ai a fai mo latou la lea malo? Fai mai Ioane le Papatiso, Inā salamō ia outou.

Samoa e, ua faalauiloa mai e le sāvali ia te oe ma a’u, ia mamā ma ia lelei lou loto. Ia faafou lou olaga ma ia lelei lau amio (Mat.5:48). Ia manatua, o le malo o le lagi o tagata. O ē ua faaolaina ma faamanuiaina i le ola e faavavau. O ē sa tapena ma saunia lelei i le afio mai o le Alii. Ua faatuatua ma talia le Alo o le Atua. Ua tatou iai i le Kerisimasi o lenei tausaga.O le tapenaina o o tatou olaga.

Uso e, o ā fa āu? E te saga faataligatuli pea i le valaau? Se ā lou leo i lau fanau? O le leo o lē ua alaga i lou olaga ma lou aiga i aso uma, salamō. Inā teuteu ia lou olaga mo lou Alii o Iesu Keriso, o le Tupu lava ia o le malo e faavavau.

Amene

RP
By Rev. Petaia Setu, 24 December 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?