O le aso ananafi na maua ai le fa’atalatalanoaga ma le tamā i a Lavea Iuni, 60 le matua o le soifua  ma na ia fa’ailoa ai le maitauina ai pea o le tulaga e pei ona ua feagai ma le tupulaga talavou i lenei vaitau ua i ai.

“Ia  e fai muamua lava ia tala i la aso a’o talavou fo’i le olaga ma ola ane totonu o si o matou nu’u i Savai’i.

“E muamua lava le ola ane i totonu o aiga, o i’ina e iloa mai ai e iloa ai lou ituaiga tagata e te pulupulu ai pe ā e matua.

“E pei o le taeao ae le’i alu le aoga, ia ua fafagu i luga e ta’alao le otaota i fafo le fale, ia na o le taunu’u mai lava sauna le aoga, o le fasi esi ma le fasi popo ia la’a fiafia.

“O taimi o faigalotu, e le’i faia le lotu afiafi, ae ua uma ona ta’e’ele uma tamaiti e o’o lava i tagata matutua e sauni e pese le lotu afiafi.

“Ia na uma lea ona fa’asolosolo mai lava lea i talanoaga i le afiafi, fa’atonu ai e lo’u tamā matou i lea itu e ao ona fa’aleleia o ni a matou fe’au pe a aulia le aso fou.

“E pau  a le mea e fai, na o le usita’i lava aua e o le salulima le afu pe a tuai na tu i luga, ma na sologa lelei mea uma.

Na ia fa’ailoa o le isi lea mafua’aga ua tele ai le mau fa’alavelave i le taimi lenei ona ua sese le fa’atonu a matua.

“Ia o lea ua tatou ioeina le tulaga e pei ona i ai nei vaitau, ua le usiusita’i lava fanau ma ua le mafai ona sao se tala i matua.

“Ae o la aso , e pei e malosi tele ai le to’a’aga a tupulaga i le fale o le faife’au, e pei o le isi lea tulaga na malolosi ai la aso.

“E leai ni kegi i la aso e pau fa’alapotopotoga a tupulaga ou te fa’alogo ai o mafutaga a tupulaga talavou i totonu o ekalesia.

“Na manuia le tele o olaga, o lea fo’i le mana’o o nai matua , ia o le autalavou, o le aoga aso sa, o le lotu, aua fo’i na fa’alagolago tele ai le manuia ma le a’oa’oina lelei ai o fanau.

“O nei aso ia ua le toe i ai lava se tulaga fa’apea, ua le faia fo’i le tiute o matua latou ia, aua a lelei lava e ola ane lava le tamaititi e manuia.

Na ia fa’ailoa o le tele lava o taimi ua tu’ua’ia le ava malosi ma nisi o tulaga.

“Ia o le ava malosi latou na o matou feola mai lava ia na i ai lava, ae na o matou fa’aaogaina ma le fuafua lelei.

“O la aso sa le tele ni papu e o i ai, e pei o le RSA ma nisi o nai fale sa i ai, ia ae le’i fa’apea na so’ona tafili saunoa ai, aua e le’i tele ni ava malosi e pei o nei aso.

“Ae o nei aso, ia o lena ua avea le tele o le ava malosi ua so’ona fa’aaoga ai lava ma le le fuafuaina lelei.

“O le ava malosi latou e fa’amalosi ai le tino, ae leo se mea e fa’aaoga sese ma fa’aalialia vale ai le malosi.

“E pei o le isi lea mafua’aga ua tele ai lava le mau fa’alavelave i tupulaga talavou.

“Ia o le galulue lava lava o matua, o aiga, nu’u, ekalesia ma le atunu’u e toe fa’afo’i le olaga o fanau e pei ona fa’ailoa atu sa o matou feola mai ai matou.