E tele tupe e maua mai le tōtōina o le tapa’a Samoa.

VM
By Vatapuia Maiava ma Sarafina Sanerivi, 31 October 2016

O le finagalo o le tina ia Atamamao Tanielu mai le afioaga o Le’auva’a-Uta, o le tōtōina o le tapa’a Samoa, o se tasi lea o auala e maua ai seleni i totonu o Samoa. 

O Atamamao e 53 ona tausaga, ma na ia fa’aalia mai, a o’o ina sioti le sikaleti i Samoa, e maua mai le $1000 tala mai le fa’atauina o tapa’a Samoa. 

“Ua fai si leva o matou faia lea atina’e,” o lana fa’aaliga lea i le Fofoga o Samoa. 

“E tele lava le fesoasoani a lenei atina’e i lo matou aiga, ma o le ala foi lea ua matou fiafia ai lava e fai.

“E le’i leva tele atu nei foi ona uma na fa’atau atu isi tapa’a ma ua le’o toe mamao fo’i ae mafai foi loa ona fa’atau atu le isi vaega o le fa’ato’aga tapa’a.”

E le gata i lea, na fa’aalia foi e Atamamao e ui ina faigata le totoina ma le fa’atinoina o le galuega a’o le’i fa’atauina atu le tapa’a.

“Ae peita’i ua matou masani ai lava ma lo’u to’alua ma la’u fanau. 

“A alu nei lo’u to’alua e kiliva a matou tapa’a, e maua lava le $600 tala i le vaiaso.

ADVERTISEMENT

“E fa’atau lava ma kiliva atu i Apia ma e alumia lava. E fa’atau lava e ta’i $5 i le pepa tipi ma to’atele lava tagata e fa’atauina.”

Na ta’ua foi e Atamamao, e le’o na’o le tapa’a o lo’o latou totoina. 

“E fai foi le fa’ato’aga a lo’u to’alua. 

“O ia foi la na te kilivaina ma fa’atauina atu a matou tapa’a. E iai foi nisi o le mamalu o le atunu’u e afe mai lava iinei ma fa’atau atu ai a latou tapa’a.

“O le nu’u foi lenei o Le’auva’a, o le atina’e lava lenei o lo’o faia e le to’atele o aiga. O le mea fo’i lea e seāseā ai lava ona fa’ataua e le isi aiga tapa’a mai i le isi aiga, auā foi o lo’o tofu lava ma le fa’ato’aga tapa’a.

“E ta’i tolu lava masina ma mafai ona fa’atau atu tapa’a.”

Na ta’ua e Atamamao, o le tupe latou te maua mai i le fa’atauina o tapa’a, e fa’aaluina lea auā le tausiaina o lona aiga aemaise o mea e fai i le lotu ma le nu’u. 

 I lana saunoaga mulimuli, na ia fautuaina ai le mamalu o le atunu’u ina ia o latou fa’atinoina foi lenei atina’e aua e tele le tupe e maua mai ai.

“O se tasi lenei o atina’e e maua ai tupe i totonu o Samoa. 

“E lelei i tatou, fa’afetai i le Atua mo ana fa’amanuiaga aemaise foi o fanua ua foa’i mai. E tatau lava la ia te’i tatou ona fa’aaoga ma le tatau.”

VM
By Vatapuia Maiava ma Sarafina Sanerivi, 31 October 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?