Tala faasolopito o Samoa mai le amataga

05 January 2016

Tapena ma Tuufaatasi e Fuimaono Na’oia Fasavalu Touli F. Tupua mo le Samoa Observer.


O LE FEAGAIGA I PERELINI

Mataupu 1

“O le Tulafono lautele na fai ma sainia e Malo e pei ona ta’ua muamua i Perelini i le aso 14 o Iuni, T.A. 1889 ma o isi feagaiga muamua, fono ma maliega e faasino ia Samoa, ua faaleaogāina.

Mataupu II

O le toe aveeseina e Siamani ona o le aloa’ia o le Iunaite Setete o Amerika, o ana aia tatau uma ma pule ia, ma i le itu i le Motu o Tutuila ma isi motu uma lava o le Atu Samoa i le itu i sasa’e o le laina Logitū e 171 tikeri i le itu i sisifo o Greenwich.

“Ua faafo’i atu foi e Peretania Tele i lea lava faiga e tasi, ona o le aloa’ia o le Iunaite Setete o Amerika, ana aia tatau uma ma pule ia, ma i le itu i le Motu o Tutuila ma isi lava motu o le Atu Samoa e i le itu i sasa’e o le laina Logitū 171 tikeri i sisifo o Greenwich.

“Ua faapea foi ona toe faauiese e le Iunaite Setete o Amerika ona o le aloa’ia o Siamani , ana aia tatau uma ma pule i luga o ma le itu i Motu o Upolu ma Savaii ma isi lava motu laiti o le Atu Samoa e i le itu i sisifo o le laina Logitū 171 tikeri i sisifo o Greenwich.

Mataupu III

ADVERTISEMENT

“Ua manino ma malilie i ai e faapea o le a ta’itasi ona faaauau e Malo Tetele o loo saini i lenei feagaiga, ona faaaoga pea, i le itu ia latou fefaatauaiga ma vaa-oloa tau fefaatauaiga, i motu uma o le Atu Samoa, aia tatau ma aiaiga e talafeagai ma aia tatau ia o loo faaaoga e Malo Tetele, i taulaga uma ia e ono mafai ona tatala i fefaatauaiga a soo se tasi o i latou.

Mataupu IV

“O lenei Faaiuga o le a tatau ona toe teuteu i se taimi vave e mafai ai ma o le a tatau ona faamamaluina i lea lava taimi pe a uma ona toe faafesuia’i teuteuga.

“Ona o le faatuatuaina o lea faaiuga, o i matou, o malo auai ta’ito’atasi, ua matou sainia lenei feagaiaga ma tuuina atu i ai a matou faamau-faailoga.

“O lenei feagaiga na faamauina i ni ata se tolu i Uosigitone, i le aso lona lua o Tesema, i le tausaga o lo tatou Alii tasi le afe valu selau ma le ivasefulu iva.

Sainia:

John Hay (FAAMAU FAAILOGA)

Holleben (FAAMAU FAAILOGA)

Pauncesote (FAAMAU FAAILOGA)

 

Malietoa ma Mataafa

E tusa ai ma aiaiaga o le Feagaiga i Perelini, na toe taliu mai i Samoa Malietoa i le faaiuga o le 1889, ma na toe tofia e avea ma Tupu. Na ia toe teuteu lea feagaiga, ae sa le maua mai ai ni faamanuiaga sa mana’omia. E lea gata ina sa nofoia pea e Malietoa le nofoalii, ae pulea e Malo Tetele ia sa latou le tuuina atu ia Malietoa se pule, ae to’atele foi tagata  sa latou le aloa’ia o ia e avea ma tupu. Ona o le leva ona toesea o ia, o lea na mou ai le faatuatua o tagata ia te ia a ua suitulaga Mataafa ia te ia i loto o tagata. Ua tutū malosi foi e lagolago Mataafa, ma ua foliga mai ua tala lo la va ma ua fasaga tau le tasi i le isi. Peitai sa lagolagoina Malietoa e Siamani, o Fagalii ma Vaitele le malae o le isi to’ilalo o loo manatua pea. Sa tumau pea ona toto lima o Mataafa ona o le toto o seila Siamani e le’i tauia. E ui lava i nei fetaua’iga, ae sa mulimuli ane ona maua le to’a. Ua fai le tonu o le a Tupu Malietoa, ae faaauau pea ona pulea e Mataafa toetoe lava o mataupu uma o le atunuu. Ae a’o le’i aulia le faaiuga o le 1890 ua aliali mai faailoga o le a toe malepe. O le tuai ona auina mai o ofisa sili maualuga-o se faamasino Sili ma se Peresetene o le Fono o le Eleele Sa e pei ona aiaia e le Feagaiga i Perelini ua faatuputeleina ai le ita o tagata. Sa folafola mai foi o le a o mai ni komesina e su’esu’e mataupu tau eleele ma suafa matai, ae le’i taunuu mai lava. Ua faigata le tulaga ua i ai. Ua faafuase’i ona aumai tala faali’ali’a, ma ua salalau atu i tagata ma ua le maua ai se mapu. Fai mai ua amata ona tafe toto vaitafe, ua fetolofa’i solo se pili e leai se ulu i luma o le fono a matai, ua fetaua’i aitu o Upolu ma Savaii i le po. Peitai, o Ianuari 1891 na taunuu mai ai i Apia le Faamasino Sili o Cedarkranatz, o se alii Suiti, ona faapea loa lea o tagata Samoa, e le toe umi ae mou atu o latou faafitauli. Ae ui o lea, ina malele mai se alaga leo tele mo se tupu fou, ma ia faae’e i ai Mataafa e suitulaga ia Malietoa, sa le mafai e le Faamasino Sili ona fai se tonu ma tosotoso ai lava lea mataupu. E toatele tagata Samoa ua manana’o ia Tupu Mataafa, ona fai mai latou o le Feagaiga i Perelini na aumai ai ia i latou le pule e tofi ai so latou tupu “e tusa ai ma tulafono ma aganuu mamalu a Samoa. Sa talosagaina Cedarkrantz ina ia faatulaga se aso e fai ai se filifiliga mo se tupu fou, ae sa le mautonu, to-manatu ma faatuai, ma o lea na uma ai le onosa’i o tagata Samoa.

05 January 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investigative articles.

Ready to signup?