LAUGA - “Talitonu ma talia le Upu”

RP
By Rev. Petaia Setu, 23 April 2017

(Teuterenome.30:11-20)

O taimi sili ia ona apo’ia gofie ona lagona, o taimi o taumavaega. O upu tu’ua. O upu e taiala ai taeao ma aso uma o le olaga. O upu e mamana ona tala’aga, e tuā foi lana gagana. E lotolotoi ai le alofa, ae taula’i i le ola.

O le mavaega na i le fanua laugatasi o Moapi, Faatuatua ma usitai i le Atua, e ola ai oe atoa ma lau fanau. O lona faafaigofieina, Talitonu ma talia le upu.

Ua iai Mose i si’ui o lana auaunaga, ae le mafai ona tuugūgūina mafutaga. O le alofa faa mătua alofa moni e tautala, faufautua ma faamalosi’au i aiga ma fanau.

Ua naunau le auauna ia gaua’i le nuu ia latou iloa le faamaoni o le Atua ma faatuatua iai. Ia fausia ai le ola usiusitai mai le salamō ma le faatuatua, i tulafono ma poloaiga uma mai i le Atua. Lea ua ta’oto ma fofola malamalama lelei e Mose ala ua finagalo ai le Atua, e tapasa ma limataitaiina ai lona nuu a o aga’i  atu e nofoia eleele o folafolaga.

O aiaiga  o le vavau, e saoloto ma ola manuia ai i lo latou faavavau. O le ki, o le usitai. O le faamoemoe, o le ola. O fea o iai la lea ola? o  loo i le poloaiga lava a le Atua. E le o i le lagi poo i tala atu o le sami le upu taiala o lou ola. E le faigata pe su’egātā. Fai mai Mose, o i lou gutu, ma lou loto, ina ia e faia.

O le gutu, e tautino atu ai le upu liutino a le Atua; o le loto e talia ai le manumalo o le usitai na faatuina e le Atua mo lou faaolaina (Rom.10:9) Auā o le faatuatua e tupu mai ai le amiotonu, a o le usiusitai e maua ai le ola.

O le ata manino lea o le faamoemoe o Mose ua tomatauina ai le nuu a o le i tuua e le auauna nei Iosua ma le nuu. Ia le na ona faalogo, a ia galue le faalogo.

O lona uiga, o tino o le faalogo, o le usitai. Ia faia. O le mea taūa lea. Ia faia le finagalo o le Atua. Ia savavali i ona ala, ma tausi i ana poloaiga ma ana tulafono, ma ana faamasinoga. O lona taunuuga, o le ola, ma le faatuputeleina, ma faamanuiaga mai le Atua i mea uma e te alu iai. 

E le tusiesea oe ma a’u i poloaiga ma taiala nei mo le nuu o le Atua. O le fua lava lea e tasi e fafauina ai lelei ma manuia o oe ma lau fanau, o tatou ma o tatou aiga. Manatua le faataūa a le toeaina o Samuelu, o le faalogo ma le usitai.

E sili lena i le taulaga ma le ga’o o mamoe po’a (1 Sam.15:22) E le o le toilalo popo ea lea o le nofoaiga  a Saulo, o lona le usitai i le Atua? Pe le o le le usitai ea e faapogai mai i le le talitonu? Uso e, o le malosi lena o loo tu’itu’i atu ai pea Mose ia Isaraelu, talitonu, ina ia fanau mai ai le amiotonu i lona olaga usiusitai. O tala atu o lena, o le ola mălie, ola saoloto, ola fiafia, ma le ola manuia. 

O le isi itū taūa, o le tuusaolotoina o le tagata e fai lana filifiliga. Filifiliga i le alofa, manuia, ma le ola e pei ona faamalosi’au atu ai Mose i le nuu; ia poo le inosia, malaia, ma le oti, i le le usitai ma le tetee i le Atua.

Ua uma le galuega alofa a le mătua moe po. O upu taumavae o le alofa, o upu faaola. Ia maua lou fiafia ma le sa’olotoga. O ai e faia? O oe lava. O oe e faia le faaiuga.

Ua na ona ta ta logo atu pea Masefau, a o le filifiliga, o lau lea aiā tatau. Manatua fai mai Mose, o loo i lou gutu, o loo i lou loto le poloaiga ma le upu. O le a la le faigata? O ia te oe le lelei ma le leaga; le fiafia ma le faanoanoa; le pologa ma le saoloto; le manuia ma le malaia; le ola foi ma le oti. O lē fea la e te filifili ai? 

ADVERTISEMENT

Samoa e, ua e ’ae’ae ma ua tatou sapi i faamanuiaga e tele ua le masino. Ua ’e oloa luuluu ma tatou inu mălie i mea o lenei olaga ua tatou maua, a o mea e mavae. Fai mai le poto o Solomona o mea faatauvaa ma le ’ai e le matagi (Fai.2:11). Poo e iloa o le olaga nei e iai lona mutaaga? E gata mai lo tatou ola i le lalolagi  nei.

A o tua atu o lo tatou lalolagi o iai le faavavau, e leai sona fua pau. O lona uiga, afai e te maua le isi ola faaeaina i tua atu o le oti i le tino nei, o lou faavavau lena. E le toe iai sona mutaaga. Ae afai e le faaeaina oe i tala atu o le ola nei, o lona uiga ua e malaia i le faafanoga i le afi; o lou faavavau lena. E le mafai ona toe pe lena afi, auā o lona lava lena faavavau (Luk.16:22-26).

Uso e, ua i lou gutu le upu ma le poloaiga a le Atua. Ua i lou loto le ola. Ne i mea ane ua ou fau malo i lau filifiliga. A o le tuualalo a Mose, ia e filifili i le ola, ina ia ola ai oe atoa ma lau fanau.

’Aua le vaai lata mai, a ia mamao le tōfā. O faiva o faafaleupoluga, e sua le aulapa tai, sua le aulapa uta. E aami le uta mamao ma le uta lalata. Ia faauta le moe. Ia poto le filiga. Filifili ma le tonu. O lau filifiliga, o le filifiliga ola. E ola ai oe, e ola ai lau fanau.

Samoa, o le toe manatu, o lau matafaioi, poo lou tiute fai – alofa i le Atua. Alofa iai o Le na faia oe. Alofa iai o le Tamā ia o tatou uma. Alofa iai o le Atua foafoa.

Alofa i Lē na mua’i alofa mai ia te oe ma lou aiga. O lou Atua; o lou Alii; o lou Faaola. O le ala lea o le fai mai o Iesu o le poloaiga sili lava, o lou alofa atu i le Alii lou Atua ma lou loto atoa, ma lou manatu atoa, ma lou malosi atoa, ma lou agaga atoa, (Mare.12:30) O le alofa lena e mausalī ai le mafutaga ma le Atua e le aunoa. E le toe maua ai e le fili se malosi e save’u ai oe.

O le alofa na te avatu le manumalo i lou olaga. Na te ta’uleleia ma faaeaina oe. Se a se malosi e mafai ona pipii ai oe i le Atua? Maifea ona loto gatasitasi? E mafai ona e pipii i le Atua pe afai  e te inoino iai?

E feoa’i faatasi ea se toalua pe a le loto gatasi i la’ua? (Amo.3:3). Samoa e, o le talitonu e talia ai. O le faatuatua e usitai ai. A o le faavae o le talitonu ma le usitai, o le alofa i le Atua.

 O le poloaiga  ua fai ma tulafono a Mose i le Feagaiga Tuai, ua liutino tagata ia Iesu Keriso, o le Upu ia a le Atua sa iai i le amataga. O lana feagaiga lea o le alofa tunoa, ina ia fai i tatou uma ma molimau e tautino atu ai i o tatou gutu le upu  na toe faatuina mai e le Atua nai e ua oti , e faaolaina ai oe ma a’u.

Lo’u atunuu e, pipii i le Alii. Fai mai Mose, auā o lou ola ia. Ioe, o i le Alii lo tatou ola ma o tatou aso. E le faamoemoe le ola o oe i mea ua e maua. E le o le tofi poo sou malosi e faafualeva ai lou soifua; e leai. Pipii i le Atua e pupula ai ou mata i le mamalu o le Atua.

E te molimauina ai lona silisili ese ma ona vavega. E te tautala ai i ana faamalologa i lou olaga ma lona mana faaalia i lou aiga. E saga faafouina ai pea lou taulealea faapei o le aeto. E le na o lena; ae e manuia ai oe ma lau fanau.

E tutumu ai ou maota ma laoa, o tuā maota ma tuā laoa i manuia faasoa mai le Atua. Faauta i le tua lelei o le pipii i le Atua. Manatu i le taūa o upu taumavae a Mose. Fau se amataga fou o lou olaga. A’oa’o ai lou aiga ma lau fanau. Taiala ai taeao ma aso uma o la tatou folauga. E taūa le usitai. Auā o i le usitai le ola.

Ae mafai ona usitai pe a le talitonu? Uso e, faatuatua ma usitai i le poloaiga a le Atua. Talitonu ma talia le Talalelei, ina ia ola ai oe atoa ma lau fanau.

 

Amene

7737063/7783782

RP
By Rev. Petaia Setu, 23 April 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?