I nisi taimi ua mavae atu, o la matou Tusitala o Pa’i Ale-na matua o’o atu lava i luga o ala tetele e tau saili mai ni tali. O le taimi lea o loo tauivi ai lo tatou atunuu ma lu’itau lautele, faale-agaga ma mataupu tau le tamaoaiga-ia na faailoa mai ai le faateleina pea o tulaga faigata, mativa, faateleina o tagata e faatauina atu oloa i luga o ala tetele- e ese ai mai isi lava faafitauli lautele.

Sa fia iloa e Ms. Mulitalo poo a isi mataupu e manatu o tatou tagata –o loo sili ona faatiga i aso nei. E le gata i lea, sa fia faalogo le tamaitai i o latou mafaufauga e uiga i nisi o faiga e mafai ona fo’ia ai. Matou te manatu o manatu na faaalia i lenei taimi sa matua taua tele ma e tatau ona toe asia.

Mo se faata’ita’iga, fai mai Teutonu Vaoau o Si’usega-e anoano mataupu e tatau i le malo ona tilotilo i ai. 

“I le avea ma tina, o le mataupu o loo sili ona faapopoleina ai a’u-o sauaga ia e pogai mai tamaiti a’oga ma tupulaga talavou,” o lana faaaliga lea,” I tausaga ua mavae, o mea faapenei e seāseā ona tupu-aemaise ai lava i nofoaga faitele.  I lenei la taimi-ua matua le mafai lava ona taofia. E mafai e Leoleo ona gafa ma sauaga. E tatau ona i ai ni tulafono e taofi ai nei tamaiti a’oga mai le taua’i-misa i nofoaga faitele  ma e tatau ona tapuni a’oga pe a toe tulai mai. 

O Kelemene Saoalai o Vaitele-tai sa matua lagolagoina lava lea tulaga. “O le mataupu ogaoga e tatau i le malo ona faamuamua o sauaga i le va o a’oga. O Samoa ua lauiloa i isi atunuu o se nofoaga e sili ona saogalemu e alu i ai mo se asiasiga. Ae paga lea, ua tatou ‘ausia le tulaga lea o le a faatatauina ai Samoa o se atunuu e sili ona leaga mo tagata tafafao maimoa. “O a’;oga o loo taua’i-misa i nofoaga faitele lea o le a faamata’u ai soifua o le toatele o tagata ma isi lava tamaiti a’oga. Ou te talitonu e tatau i le malo ona tapuni soo se aoga e amata mea i nei fusuaga.” E ioe Enele Tuumatāvai o Safune e faapea o ia misa i le va o a’oga ua le mafai ona taofia.

“E to’atele ua taunuu i le falepuipui ae o le a le ituaiga o fesoasoani o loo latou maua mai lea nofoaga? E tatau i le malo ona saili ni auala e tagofia ai lenei mataupu. E mafua ona ua le gata ina valiina ai se ata mataga o Samoa i tagata o le lalolagi-ae o se faamata’u lea i turisi-ia latou te faasili Samoa-e avea ma atunuu e aso malolo mai i ai.” O Setefano Pati Romeo o Fasitoo-tai na ia faailoa mai se faafitauli e sili ona mata’utia. 

 “O le mataupu ua sili ona faatiga mo a’u o le ola faale-agaga ma le tafea o mea e faataua e aiga,” o lana faaaliga lea. Ua sili ona ‘ou popole i mataupu tau le talitane ma le toso teine e aafia ai tamā ma o latou afafine. O i matou uma lava o tane, e i ai o matou tuafafine, afafine ma tamaitai o aiga ma latou te faalagolago ia i matou mo lo latou puipuiga. Ae o le a le mea lea ua tatou vaaia?  “Ua ‘ou fiu  e faalogo atu i lenei mataupu i lea taimi ma lea taimi i vaiaso uma mai Leoleo ma mai tala feavea’i o loo salalau. Ua o’o i le taimi e taofi ai. O se ituaiga lenei o mataupu e tatau ona faamuamua e lo tatou malo. O nei tagata e le tatau ona toe tuuina atu i ai se isi avanoa-ma ua tatau ona tuuina atu i le falepuipui i o latou olaga atoa-ona o mea o loo latou faia e le mafai ona galo ma taliaina.” 

O sauaga i le Aiga na faaalia e MatenoaTavita, o Faleula-uta, e faapea o loo sili ona faatiga. “ Ou te manatu e tatau ona tilotilo le malo i sauaga i le aiga. E tele solitulafono matuiā ua maua i totonu o lo tatou atunuu. O mea sa leai so tatou mafaufauina o le a o’o mai i Samoa. O le faateleina pea o le aofai o osofaiga tau feusuaiga-e le o se mea lea e mafai ona talia. E tatau i le malo ona saili nisi auala e ‘alofia ai nei ituaiga o mea mai le tutupu mai. O nei tagata e tatau ona loka e faavavau.” Na ta’ua e Voau Taula o Si’usega ni tagata o loo faatau atu oloa i luga o ala tetele ua avea pea ma faatiga.  “Ua ‘ou vaai i le toatele o tamaiti o loo faaau atu oloa i luga o le alatele. Ou te le talia lea tulaga ona o le faapea ona pau lava lea o le mea e mafai ai e lo latou aiga ona maua se tupe eola ai. “Afai la o le tulaga lea, o ane matua e fai lea galuega ae aua le auina ane nai tamaiti. Na ‘ou maua foi i latou o feoa’i solo i le taimi o a’oga ma o le tulaga lea e le tali-talu ai o lo tatou tiute i le avea ma matu o le totogi o a latou pili o le a’oga.” Tama’ita’i e ma alii, o nei manatu faaalia –e le o ni o matou manatu ia. O nei manatu o manatu o sui masani o le atunuu ia e foliga mai ua latou malamalama lelei i lu’itau o aso nei. A fua la i manatu e nei lava tagata e to’aono na talanoa i ai Ms. Mulitalo, e leai se mea e mafai ona faafitia ai le mea moni e faapea o a tatou faafitauli ua matua lelei ona faamaumau. 

I se tasi faaupuga, ua tatou iloa uma lava le mea o loo sese. Ae peitai-e faapefea la ona tatou toe faaleleia? E faapefea ona tatou taofi le papa-vivi ua i ai nei? E faapefea ona tatou toe suia lona faataamilosaga?