E tele se sao o faifaatoaga i le atinaeina o nuu ma aiga

By Talimalie Uta 06 August 2017, 12:00AM

“O le auga lava ia po'o le faamoemoe o le faifaatoaga, e le nao le ola o le maumaga ao le galue malosi male tinou e fai le faatoaga,” Toa Samoa Lepale.

O le aso ananafi, sa maua le avanoa a le Fofoga o Samoa e faatalatalanoaina ai le alii ia Toa ao galue i le latou faatoaga i le nuu a lona tina i Saoluafata. Ua 21 ona tausaga ma ua fai si leva ona galue i le faatoaga.

“Sa ou tuputupuae lava au ia i le galue i le maumaga ma ua fai lava ma a'u galuega masani.”

“E fai ma ou malaga i fafo oute faigaluega ai i galuega faavaitaimi a le malo, a ou toe mai foi i aiga ma fanua, e pei ole maumaga lava le galuega taua lea ou te fiafia e galue ai.”

O Toa o lona tama o le faifeau Assembly of God i Falefa.

Sa taua e Toa, poo le a lava lona matua pe tuputupuae foi, e usitai lava i faatonuga a lona tama.

“O au ia, oute usitai lava i le mea e manao i ai lou tama, oute mulimuli foi i ana faatonuga, a manao lava oute nofo e fai le faatoaga oute malie lava e fai.”

“Aua, o lou tama o se faataitaiga sili lea i lou olaga ma ou te fia pei foi o ia i le lumanai.”

“I lenei vaitaimi, ua faasolosolo foi ina matutua ou matua, ma ole galuega sili lea ona taua o le nofo e tausi ou matua.”

Sa fesiligia foi e le Fofoga o Samoa Toa i taimi ao galue ai i atunuu i fafo.

“I taimi sa ou galue ai i atunuu fafo, e moni lava e faigata ae peitai, e tele foi se alagatupe sa ou maua mai ai. Sa faatau ai matou povi ia o loo i totonu uma o le matou faatoaga.”

Sa taua foi ele alii talavou ilea so ananafi ile fofoga o Samoa, 

“O loo sologa lelei lava mea uma i totonu o si o matou aiga ma e leai lava se faaletonu.”

“Ae pau lava le faafitauli o loo feagai mai matou fai faatoaga o auala, ua fai lava si leaga tele ma ua umi, e tusa male 10 tausaga talu ona faapea.”

O Toa lava ia, o se alii talavou o loo fiafia lava ia i lona olaga o loo iai.

“O matou lava ia fai faatoaga, a galue malosi le tagata ia e ola ma lelei foi le faatoaga ma e tua mai ai foi aiga ma tagata nuu.”

By Talimalie Uta 06 August 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>