O TALATU’U A AANA

01 May 2016

O LE TALA IA LETUFUGA O SAFOTULAFAI.

Na nofo Faauluulumaga le alo o Tuiaana Uotele ia Letufuga, ona o le taua na si’i e lona tama i Savaii. Ona o atu lea o ‘au a le Tuiaana-tau le taua, a’o seu lupe Letufuga i le vao. Ona tulia lea o ‘au a le Faasaleleaga i le vao.

Ona tago lea o Letufuga ua gaui le na’a o lana upega seu lupe, ae momo’e ane i tai ma le ulu o le na’a. Ona alu ane lea o Letufuga ma ‘alo’alo solo i le vao. Ona tulia lea o ‘au a Aana i le sami e Letufuga. Ona fesili lea o Tuiaana-‘O ai ‘ea lea tagata e ma’alo’alo mai le vao?

O ia lena ua na tulia a’u nei! Ona fai atu lea o isi tagata-“O le Alii o Letufuga lea ua na fasi lo tatou faleupolu! Ona faapea lea o le Tuiaana-“ia faaigoa lena alii o ‘Letufuga-ma’alomaivao’.

Ona toe faasaga lea o Letufuga ua sasa le Faasaleleaga ma fai atu-“Aua le tuliloaina Aana i le sami!. Ona faapea lea o Tuia’ana: ‘O le a ave le teine lea e fai ma o tatou togiola e fai ma avā a Letufuga; ae o le a e Tufugapule ma Tufugato’atama’i.

 

O LE TALA IA TAMALELAGI, SO’OA’EMALELAGI MA SALAMASINA

Na tautu le fale o Tutuila ma Ape ia Tuiaana Vaema i le tamaita’Iio Vaetamasoa ma ua le fafagaina i la’ua i le feti’i na i Amoa. Ona fai ai lea o le faatonuga a Le’ulu i Faga ia i la’ua. Ona le talia lea e Tuiaana Vaema ona o le inoino o le tamaitai i le papala o vae o le alii.

Ona toe o ai lea o Tutuila ma Ape, ua aumai Selaginato le atalii o Tagaloafaaofonuu, le tama a le afafine o Letufuga. Ona tautu a’i lea o lo la fale; ona faatoa talia ai lea.Ona to ai lea o le tamaitai ma ua fanau.

O le pogai lea na faatonu ai e Tutuila ma Ape i Ta’elegalolo’u; ina ua la o atu e gaoi mai le tama, ina ua faatoa fanau. Ona gaoi mai lea o le tama tuu i Fasitoo-uta.

O le taimi na gaoi mai ai lea tama; o le taimi tonu lea o le taua a Tutuila ma Ape i le tuasivi, lea na ta’ua ai Li’o e ana le ‘ave’ave. Ona fai lea o lo la lumā’ava ma lo la Alii. Ua tele taeao e le o maua lava se ‘ava o Tutuila; ona faapea lea o Tutuila:

E lelei ona si’i le tama i Sagameauta. Ona sii lea i ai o le tama; ona maua ai lea o le igoa o le nuu o ‘Nofoalii ’ ma ua nofo ai loa le alii. 

ADVERTISEMENT

Ua tele foi taeao, ae le o maua lava e Tutuila se ‘ava o le taeao. Ona fai ai lea o le la tonu-‘E lelei ona ave le tama i Matātao-ona si’i lea i ai o le tama, ae valaaulia ane Alipia ma Suluga- e avatu i le Malae o le Vavau; ona afe lea i ai.

Ona faapea lea o Alipia ma Suluga-“Aumai lo lua Alii ma te tausia.” Ona faapea atu lea o Tutuila ma Ape-‘Paga lea ua uma ona ave le tama i Matāto! Fai mai Apenamoemanatunatu-“E a pe a tu’u ia lo ta Alii iinei i le Tumua ma o ia foi e pule i le Papā?

Ona tu’u ai lea o le Tama; ma ua fau ai lona ulumoega o Tamalelagi. O le pogai lea na faaigoa ai lea Alii o Tamalelagi, aua na aumai ina ua faatoa fanau mai i le manava o lona tina; e le’i susu foi o ia; ae sa fafaga i talo ma niu; ma o le pogai lea na ola ai o ia.

O ona po ia o nofo ai Sagate i le Malaeolevavau, a’o igoa ia Tuiaana; ma o loo potopoto foi i ai ituaiga e fitu; e na o Sausi lava ma Samoa e tausi Tamalelagi. Ua matua le tama, ona alaga lea e Alipia ma Suluga o le pāpā ia Tamalelagi.

Ua lua Tuiaana i Leulumoega; ae ave lava e Leulumoega mea taumafa lelei ia Tuiaana Sagate; ae ave mea leaga ia Tamalelagi. Ona faapea lea o Tamalelagi ia Sooa’emalelagi-‘sau ia ina alu i Savaii ia Tausunu ma Tauasotasi, fai ia Nafanua ia alofa mai i lota tiga-‘ua ave lava mea lelei ma Sagate, ae aumai mea’ai leaga mo ta’ua.

Ona alu ai lea o Sooaemalelagi i Savaii; ona talia lea e Nafanua ma fai mai-“Sau ina alu:-“E si’i atu i ‘ie e lima le taua- ae a i ai ni ‘ai o lena taua- ia tutu’i le alafale, i’u mai papa, ae ‘aua nei nofo ai se Tupa’i, ona o oe o le tamaitai.

Ona fai lea o le taua ma ua manumalo Tamalelagi ae to’ilalo Sagate; ona tu’u lea o le malo ia Tamalelagi ma ua alaga loa i ai e Alipia ma Suluga pāpā, ma o le papa lena na ave ia Nafanua ae ua nofo Tamalelagi e aunoa ma se papa vagana ai lona malo ua faasavali i Aana uma.

Ona alu lea o le fe’au a Gato’aitele e ‘aumai ni ‘au e tauina le taua i Malie. Fai mai Tupa’i-‘ou te le alu atu se’i muamua ona logo Nafafua i Salafai. Ona o lea i Savaii o Tupai ia Nafanua. O le tali a Nafanua-“O inā tau le taua, o upu ua uma ona ma faia ma Gato’aitele-ae afai e malo le tatou itutaua- ia tutu’i le alafale i Tanumafili e nofo ai le Tupa’i ae tali le tanoa e Tuisamau.

‘A e ia e tuvao fono ia Tuisamau i Malie, ae ‘aua nei e tuvaoina se fono a Auimatagi. Ona tau lea o le taua ma ua toilalo Malietoa ma Auimatagi, ae malo Gato’aitele ma Tuisamau. Na ave foi e Nafanua le Gato’aitele i Savaii ae ua na o lona malo-o le Savali i le Tuamasaga. 

Ona sau ai lea o le fe’au a Tuiatua Foganiutea-E alu atu Tupai e tau le taua o loo fai I lo la va ma Tuiatua Fogaoloula. O le tali a Tupa’i- ‘Se’i o’u alu muamua e ta’u ia Nafanua le tagi a Tuiatua Fogainiutea. Ona fai ane lea o Nafanua-O inā tau le taua.

A faapea e maua se malo, ia tutu’I le alafale i Pulema’ava, ae nofo ai Tupai e fai ma nofoa sa o le Tuiatua. Ona tau loa lea o le taua, ma ua manumalo Tuiatua Foganiutea, ae to’ilalo Tuiatua Fagafogaoloula. Ona avea foi lea o le Papa o le Tuiatua ia Nafafua.

Ona soso’o ai lea ma le tagi a Satunumafono ia Tupai e avatu ni ‘autau e faia lona tiga ona o lo la va ma le Alataua. Ona faapea foi lea o Tupai-se’i alu muamua e logo Nafanua i Salafai pe finagalo ai pe leai.

Ona alu lea o Tupai i Savaii ma ta’u atu ia Nafanua le tagi a Satunumafono. Ona fai mai lea o Nafanua-‘O ina tau le taua- a faapea e maua se malo, tutu’i le alafale i Niusuatialemanū, ae nofo ai Tupai e leo i le alafale e fai ma agatonu o Satunumafono.

Ona ave lea o le Papa o le Tamasoalii i Savaii ia Nafanua, ae ua savali lava le malo o Satunumafono i le Alataua. O le malo foi lea na alu i ai Imoa e ‘tali pisi’ i le Alataua, ma o le pogai lea o le ta’u o Imoa ‘o le pitolua o Satunumafono!  (Ina manuia tele le Aso Sa Samoa).

01 May 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?