LUPESOLI’AI LA’AULI JOSEPH PARKER UA SAUNI MO ANTHONY JOSHUA

PM
By Patrick McKendry - The NZ Herald, 23 May 2016

O le manumalo a’ia’i ai o le tama-Samoa i le tama-uli Cameroon o Carlos Takam – i se fusu’aga na fa’atoa tofotofo moni ai Joseph Parker i le maualuga o fusu’aga i le paga-mamafa o le lalolai, na fa’alauiloaina ai e Lupesolia’i La’auli Joseph Parker, ua sauni e fa’afeto’ai le tama-Peretania o Anthony Joshua mo le fusi a le lalolagi (IBF) o lo’o ia umia.

Ona o Parker ua fa’atulagaina fa’aleTulafono e avea ma ulua’i lu’ia Joshua, o le a fa’atinoina ai lea fusu’aga i Lonetona, atonu po o le amataga o le tausaga fou – pe a o’o atu lava iai o siamupini pea le ali’i lea, ma o le fusu’aga lea anapo ma Carlos Takam i Manukau, ua ta’u atu ai i le to’atele, ua lava-tapena ma ua sauni fo’i Parker mo lea fa’amoemoe. 

E mautinoa lava, o Takam le tama-fusu aupito lelei ua la feiloa’i – e na o le lua ana faia’ina i fusu’aga e 33. O le mea moni a, e le’i fusu muamua Anthony Joshua i se tama-fusu tutu’a, malosi ma lelei e pei o Takam.

E o’o fo’i ia Parker, e le’i sili atu lava i se 10 ta’amilosaga muamua. A o le mea aupito mata’ina, e le’i matua tigaina lava muamua ma tele ina lavea fa’apea i so’a ma tu’i, e pei o le fusu’aga lea i le Aso To’ona’i, ae maise lava i le ta’amilosaga lima lea na tau-teteva ai ui sa toe vave lava ona toe-fusu malosi ma fa’afetaui mai le ali’i Cameroon. 

 “’Ou te finau lava a’u ma fa’atuatua i le malosi e fa’afeto’ai so’o se tasi ma te iloilo i le maea…o Joshua le siamupini o le lalolagi (i le IBF),” o le fa’aaliga lea a Parker a’o tafe-lauga’o lona afu i totonu o le potu mo tapenaga. “A maua loa le avanoa, ua tatau ona fa’aaoga ma e lagona, o lo’u taimi lea.”  

Ina ia ‘ausia le tulaga lea, sa lua’i uia e Parker le ‘auala faigata e sa’ili ai po ua talafeagai mo le maualuga lea, lea na tu’u mai ai le tamaloa 35 tausaga lea mai Cameroon. 

Ae na ia ta’ua, sa ia lagona lava e le’i matua afaina tele i le ta’amilosaga-lima e pei ona manatu ai le to’atele. “’Ou te leiloa sa ‘ou fa’aletonu. O le tele o ana tu’i ma so’a na tau’ai mai na tele ina misi. E iai taimi na ‘ou lavea ai…ae sa to’a-to’a lava.” 

Na toe osofa’ia e Parker le meauli ma matua lavea ai lava i le ta’amilosaga-valu lea na mafai lava e Takam ona sao mai ai.

ADVERTISEMENT

Na fesiligia Parker i sona lagona i le feto’ai ai ma Takam ae saunoa: “E foliga e matua malo lava le ulu o le tagata. Ua tele tama-fusu lelei sa latou fetaui muamua. E iloga-gofie lava ua leva ona koleni. 12 ta’amilosaga tutu’a lava ma e tele tele le a’oga ua ‘ou maua mai le fusu’aga lenei.  

 “E tele le loto o le tagata ma na sau tapena lava. Fa’apea ua ‘ou maua i le ta’amilosaga valu, aua sa tele tu’i ma so’o na lavea ai lona ulu. Ae pau lava le mea na galo ia a’u, o le tino…ona ua ‘ou vevesi na aga’i ai lava i le ulu.” 

Na fa’aalia e le Faia’oga o Kevin Barry, sa i tafatafa lava o Parker: “Sa fa’asolosolo malie lava, nai la’ala’a lemu mai tausaga e tolu ua mavae, ae ‘ou te fai atu, e le o se la’a la’iitiiti le mea ua fai nei. E matua mata’utia ma lelei tele Takam. Sa taumafai lava e fa’amalamalama i tagata, e iai lava le taimi e o’o ai Joe i le maualuga lea – lea la ua sili mamao atu i lo se isi lava fusu’aga muamua. 

 “E tele atu a’oa’oga ma mea aoga ua iloa nei e Joe nai lo isi ana fusu’aga uma e 18 sa faia muamua. Ua ‘ou matua fiafia lava ma mitamita ia Joe, ua mafai ona fo’ia taimi vevesi ma taimi faigata, nisi o ta’amilosaga sa matua afaina ai.

“O le mea aupito manaia ia te a’u, o le fa’alogo atu, e ‘au-‘au-fa’atasi uma fa’amasino ia Joe. Leai se fa’aluafesasi, e o’o lava i le fa’amasino mai Farani… sa matou fa’apea ai a fa’a’au-‘au ia Takam, ae leai, sa fai lava fa’ai’uga e fa ‘ai e sili ai Joe ia Takam.” 

Pei lava fo’i Kevin Barry o le to’atele o le ‘au-taua’i sa iai i le Maota Tele o le Vodafono Events Centre i Manukau, na matua tumu i le popole i nisi taimi. “Na fai iai i le fa’ai’uga o le ta’amilosaga iva, ‘o le mea tonu lea e ta’u o fusu’aga a le paga-mamafa’,” o le tala lea a Barry ia Parker. “O le fusu’aga tele lenei ma o lea ua e o’o iai, ma ‘ou te mana’o ia e malo i ta’amilosaga e tolu o lo’o totoe. E te malo i ta’amilosaga uma nei e tolu ma ia amata i le ta’amilosaga 10 ona e malo, lea lava na ‘ou talitonu, sa fa’apena ona malo ai Joe. Na malo i le ta’amilosaga 11 ma le 12 ae na taufao lava le mulimuli.

“Sa ia fa’aila fo’i, o Joseph Parker e le iai tama-fusu aupito maualuluga i le lalolagi, aua e na o le 24 ona tausaga. E tele lava ma ‘umi se ‘auala o le a aga’i atu ai ma e tele lava vaega e tatau ona masani ma fa’aleleia atili. Ioe, lea ua iai le tatou tama-fa’amoemoeina i Niu Sila nei i le taimi nei, lea ua numera tasi i le fusi a le lalolagi, i le vaega o le IBF.” 

Na fesiligia fo’i pe na fa’ate’ia Parker i osofa’iga a Takama, ae tali Barry: “Tasi lena o fesili na matua lelei lava ona tali i le aso. E matua to’atele na fesiligia le tulaga o Joe  pe a tau-tonu ai se tu’i i le ‘auvae – e le fa’atasi pe fa’alua fo’i a ua fesiligia so’o. ‘Ou te talitonu, na outou iloa lelei le tali o lena mea ma e leai se afaina o le ‘auvae o Joseph Parker na iai.” 

E le’i taofiofia le pule o fusu’aga a Parker, le ali’i o Dean Lonergan ina ua fesiligia se fusu’aga a Parker ma Anthony Joshua i Lonetona ia Noveva, ae tali: “’Ou te le mimita ai, ae ua ‘ou fiafia.

“Lea ua fa’ailoa atu lava e Joseph i le fusu’aga ua uma nei, o ia o se tasi aupito lelei i le paga-mamafa i le lalolagi.” 

Malo lava finau. Malo lototele. Ia alo i ou faiva-manaia, IA MANUIA!

PM
By Patrick McKendry - The NZ Herald, 23 May 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?