Malelega Afioga i le Ao Mamalu o le Malo mo le Sisigafu’a 2018

AP
By Admin Peršon, 02 June 2018

Tuimalealiifano Vaaleto’a Sualauvi II


Lau Susuga le Faafeagaiga Maauga Motu - Taitai o le Sauniga

Lau afioga i le Peresetene o le Malo o Nauru, Your Excellency Baron Divavesi Waqa and Your First Lady

Lau afioga i le Peresetene o le Malo o Fiti: Your Excellency Jioji Konousi Konrote and Your First Lady 

Lau afioga i le Kovana o le Malo o Amerika Samoa: Afioga Lolo Matalasi Moliga and Your First Lady

Lau afioga i le Ulu o Toelau: Hon. Afega Gaualofa & Your Good Lady

Lau afioga i le Sui o le Fono a Sui Tofia

Lau afioga i le Alii Palemia ma le Kapeneta, ma Minisita Lagolago

Lau afioga i le Faamasino Sili ma le Vasega o le Faamasinoga

Lau afioga i le Fofoga Fetalai ma Sui Mamalu o le Palemene

Lau afioga i le Tui Atua Tupua Tamasese Efi ma lau Masiofo

Sui o Malo Mai Fafo

Faauluululuga o Matagaluega ma Faalapotopotoga a le Malo

ADVERTISEMENT

Le Paia o le Aufaigaluega a leAtua i soo se tafa o Samoa

Le Paia o Samoa ua potopoto i Aiga ma Tama, o Tama ma Aiga, Tumua ma Pule, Ituau ma Alataua, Aiga i le Tai ma le Vaa o Fonoti. Sua ma le Vaifanua, Fofo ma Aitulagi, Sa’ole ma le Launiu Saelua, Afifio Faatui ma Tootoo, ma upu i le Manuatele.

E fia faatalofa faapitoa atu foi i alo ma fanau uma ua potopoto mai i lenei taeao.

I le agaga o le fiafia oute faatalofa ma faafeiloa’i atu ai i le paia maualuga ua potopoto mai i lenei taeao fou, ae le gata i lea o i latou uma o lo’o faafofoga tapuai mai i maota ma laoa, i Samoa nei ma atunuu e mamao, i lenei sauniga mamalu o le faamanatuina o le atoaga o le 56 tausaga o le tutoatasi o Samoa. 

O le avea ai o Samoa o se malo e faavae i le Atua le Tamā, le Alo ma le Agaga Paia, e ao ai lava ona tatou mua’i momoli laau i Foga’a, auā le viiga, le faamanū ma le faane’etaga i le tapaau sili i le lagi; auā o lona alofa ma lona filemu o lo’o malutia ai pea Samoa, o le atunuu e pele i o tatou loto ma agaga. Ana le seanoa le taitaiga ma le puipuiga a le Atua i lo tatou atunuu, e galulue fua o tatou tua’a, o tatou taitai, ma i tatou uma lava, i le tulituliloaina ma le faataunuuina o le miti, ia pulea Samoa e ona lava tagata i le pule sili faamalo tutoatasi.

O le asō, ua logo itu uma o le atunuu i le agaga o le fiafia ona ua tatou aulia mai ma le manuia lenei aso faamanatuina; auā o le tagata e lotonuu e mitamita ma faafetai ua avea lo tatou atunuu o se malo tutoatasi, e pulea e ona lava tagatanuu ma faafoeina i ana lava tulafono, aganuu ma agaifanua, atoa ai ma le faakerisiano. O ia mea uma o loo lagolago le tasi i le tasi, ma ua tu mātila ai lo tatou atunuu mai isi atunuu uma o le lalolagi. E manatua ai foi ma le mitamita o le agaga nai ō tatou tuaa sa tauasaina mai le gasū o le taeao, auā so tatou malo tutoatasi, ma ia avea ai Samoa o se malo lelei ma manuia ai o tatou tagata.

O le silasila mamao a ō tatou tuaa ma matua, ma a latou tatalo, ma lo latou talitonuga, o le a lava saunia i tatou, i le faaletino, faalemafaufau ma le faaleagaga, tatou te fa’aauau ai galuega lelei sa latou amata mea ai, ina ia siitia lo tatou atunuu i le malosi e sili atu; auā o lo tatou faatuatuaga faakerisiano, e maua lo tatou malosi, ma le atamai, ma le tamaoaiga, ma le pule, mai lo tatou alii o Iesu Keriso, tatou te faafoeina ai, ma faamamaluina ai lo tatou malō, ma manuia ai Samoa. Auā o le Atua ua faavae ai lo tatou malo o Samoa, o le Atua e ana vavega o loo saogalemu ai si o tatou atunuu mai le tele o mala faalenatura ma faalavelave matuiā o loo aafia ai le lalolagi i nei ona po.

Samoa e, afai e taula’i pea la tatou vaai i nā o ni itu faalēlelei ma tatou su’esu’e masei, poo a ni uiga vaivai ma le toilalo, oute tatalo atu i le agaga maualalo, aumaia le filemu o le Atua tatou te galulue faatasi ai, ina ia avea Samoa o se faigamalo ma se atunuu e lelei mo ona tagata, ma faamaoni lona faavaeina i le Atua Silisili ese, o le puna o manuia ma mea lelei uma.

E momoli le faafetai tele i lau afioga i le Alii Palemia ma Minisita uma o le kapeneta, ma lau afioga i le Fofoga Fetalai faapea sui mamalu uma o le Palemene o Samoa, mo lō outou tautīga, o le onosai ma le alofa ia manuia Samoa. E momoli atu foi le faamalo i le afioga i le Faamasino Sili ma le vasega o faamasinoga auā foi le tauaveina o lā outou pitolaau. Oute fia faafetaia foi le atunuu atoa i lō outou sao taua i le atina’eina atoa ai ma le puipuiga o si o tatou atunuu ina ia saogalemu. E le faagaloina foi a tatou paaga mai fafo mo lā outou lagolagosua faifaipea i le atinaeina o Samoa. 

Ae oute valuvalusia pea a’a o le fau, e avatu pea se faamanatu. A oo ina o tatou taumamao ma le Atua o loo faavae ai lo tatou Malo, ona fetaiai lea o tatou ma faafitauli, ma afaina ai lo tatou nofo filemu. Oute faatepa lo tatou atunuu i le feeseeseaiga na tulai mai nei i le amataga  o lenei vaiaso, i le va o tupulaga o ni afioaga e lua. Oute matua’i faafetaia ai auauna a le Atua ma le pulega mamalu a Alii ma Faipule o nei afioaga e lua, faapea le Malo, ma le afioga i le alii komesina o Leoleo ma le mamalu o le matagaluega o Leoleo, ua vave ai ona foia lenei feeseeseaiga, ma toe maua ai le nofo lelei. O le faamaoniga lea, a galulue faatasi lo tatou Malo, ma a tatou pulega faalenuu, ma auauna a le Atua, e manuia ma filemu Samoa. 

Ua ou talitonu o lo tatou atunuu, o loo tapuai ma tatalo le toatele ina ia manuia faiva o o tatou taitai, ma Samoa aoao, aemaise nai o tatou aiga o i atunuu mamao. O loo tatalo foi o tatou taitai ina ia aoga o latou Soifua aua se manuia o le atunuu. 

Afai foi tatou te tatalo malosi mo le finagalo o le Atua ina ia faia i lo tatou atunuu, e liligi mai e le Atua faamanuiaga e tele i luga o lo tatou Malo, o o tatou tagata ma o tatou laueleele ma le siosiomaga. O se atunuu tatalo e faamausaliina pea e le Atua lona malo ma ona tofi ma maua lona filemu faaleagaga. Le atunuu e, ia susulu atu lo tatou filemu i le Vasa Pasefika ma le lalolagi atoa, ma ia tatou tatalo foi mo le filemu o Isaraelu ua auala mai ai le faaolataga a le Atua i le lalolagi atoa.

Fai mai le afioga a le Atua, ‘Aua tatou te atuatuvale i se mea e tasi, ae i mea uma lava i le tatalo ma le faatoga atu, atoa ai ma le faafetai, ia tuuina atu o tatou manaoga uma i le Atua. O le filemu o le Atua o le a leoleoina ai o tatou loto ma o tatou mafaufau ia Iesu Keriso”

Ia manuia le faamanatuina o le 56 tausaga o lou tutoatasi Samoa.

Ia faamanuia tele le Atua i si o tatou atunuu.

Soifua

AP
By Admin Peršon, 02 June 2018

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?