O LA’U TALA FO’I

03 April 2016

1. Matauina i Tala Fou le tulaga le manuia poo le tulaga palapalā o le Falepuipui i Tafa’igata….fai mai e tumu i isumu ma mogamoga-e pei ona matauina e se asiasiga.

O le tulaga mata’utia la o lea mataupu-o le nofoaga lea o loo taofia ai pe o loo faa-falepuipui ai se vaega faatupula’ia pea o pagota. O ia la atugaluga i le tulaga o loo i ai le Falepuipui i Tafaigata- e faapea na lagā i le lipoti a le Ofisa o le Komesina o Sulufaiga.

O loo i ai foi faafitauli tau le soifua maloloina-fai mai o sela o le falepuipui e palapalā-ua mafa’ifa’i ma malepelepe faleui ma fale taaele-ma o le tulaga lea o lea nofoaga o loo nonofo ai pagota-ma fai mai ua toeitiiti lava solofa i lalo.

O le faafitauli tele la o lea nofoaga o le lamatia ai lea o le nofoaga o loo tapena ai mea’ai i isumu ma mogamoga. O le fesili la-o a mea a le Vaega o Falepuipui o fai? O lona uiga e totogi i tupe o le afu o le atunuu-ae nofonofo e leai se mea e faia?

E le tioa lava a sosola so’o i fafo pagota! O le fesili la-faamata ua iloa e le Malo le faaletonu na’ua o le vaaia o le Falepuipui? O lona uiga- afai o le nofoaga o pagota-ona ‘aua lea ne’i faia ia lelei ma saogalemu mo ia tagatga ola?

E ui lava ina falepuipui ona soligatulafono-ae o tagatanuu moni o Samoa-e i ai foi a latou aia tatau e pei o tatou uma! O le a la le aoga e saga faamaumau ai tupe o le afu maligi o le atunuu i lenei Falepuipui-pe afai e le o taulamua le Pulega ma le Aufaigaluega i le faaleleia o ia nofoaga aemaise ai o le toe faaleleia o olaga o pagota?

O le a sou taofi? 

2. Matauina foi i Tala Fou fai mai ua una’ia Sui Usufono o le Palemene ina ia fo’ia le faafitauli lea o le faafaigaluega o tamaitai e faatau atu oloa i luga o ala tetele i totonu o le Taulaga. E peiseai la o le fuafuaga mo le faatinoina o lea tulaga-ona o le mataupu lea tau aia tatau!

ADVERTISEMENT

Afai la o lea fuafuaga e afua mai le Komesina o Sulufaiga-o le fesili la-aisea ua le taulamua ai le HRPP ae o le latou Vaega fai mai na te puipuia aia tatau a tagata!

Afai la e le o taulamua le Faiga-malo i lea taumafaiga-o le fesili la i le atunuu atoa-“O outou silafia o puipuia a outou aia tatau e le faigamalo o loo i ai nei? 

Afai la e le o popona le Vaega Faa-Upufai e Puipuia Aia Tatau a Tagata i lea faafitauli-e le tioa lava a fai mai –“e leai se mativa i Samoa” –ae o lea lava e vaaia tamaiti i luga o ala tetele o faatau atu nei olooa i le ao ma le po.

O lea e faafetaia ai le Komesina o Sulufaiga ma lona Ofisa ona o le taulagalaga i mea lelei-ae afai o le Faiga-malo o le Vaega e puipuia Aia Tatau a Tagata ae leai se mea o faia-o lona uiga –ua na o le ta’u lava ona o le igoa-ae o se upu i le puipuia moni o aia tatau a le atunuu-e matua fuamoa lava.

O le a sou taofi? 

3. Matauina foi i Tala Fou le matagofie o le saunoaga a le Palemia ma lana fautuaga na tuuina atu i le ‘Au-Faau’u a le Iunivesite Aoao o Samoa i le Papaigalagala. O le matagofie la o lea tima’iga mo le ‘au-faau’u-“Ia Faamaoni.”

Ona faagasolo ai lava lea o le saunoaga ma fai mai-“E leai ni togafiti e mafai ona natia-ma o le pogai lea ua toatele ai le ‘au-talavou ua ave o latou aso malolo i le Falepuipui i Tafa’igata-ona o a latou togafiti…!

O le manatu la ua oso mai i le mafaufau- e faapefea pe ana fesili atu se tasi o le ‘au-faau’u-pe faapefea la togafiti a lana faigamalo? O lea ua uma ona faaalia e le Pule ma Su’etusi Sili ma toe faamaonia e le Komiti a Alii Ofisa o le Palemene-le faitau miliona ma miliona o tupe a le atunuu ua maumau talu ai ana ia togafiti?

O a la ituaiga o togafiti lea na saunoa ai le Palemia? Ni togafiti laiti pe o ni togafiti tetele e faitau miliona ma miliona tupe a le atunuu na liu suāvai ai?

E manaia lava timaiga ma saunoaga faapenei pe a ta’u atu i isi tagata-aua e leai ni a latou togafiti ua faia-ae afai ua uma ona fai ana togafiti ma maumau ai le faitau miliona ma miliona o tupe a le atunuu-ae fai atu i isi e ‘aua le faia-o lona uiga-o upu moni sa tatau ona saunoa ai le Palemia i le ‘au-faau’u-o le ‘aua le fai togafiti-ua matua ‘ou iloa le leaga o le fai togafiti lea ua matua afaina ai le atunuu!

O le a sou taofi?

03 April 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?