Samoa ne’i Galo Talatu’u ma Tala o le Vavau a Samoa - LE VAI O LE TAMA

30 July 2016

E pei o se lamepa lotolotoi i le pogisa, ma o le a le-mate le susulu o lona malamalama e ofaga iai mafaufauga o tupulaga au i luma o Samoa

O nisi nei o Tala ua ‘oto mai le Tusi, Samoa Ne’i Galo (Volume 1) sa tu’ufa’atasia ma fa’amaumauina e le Matagaluega mo Tupulaga, Ta’aloga ma Aganu’u, ua ‘auina atu e lau Nusipepa, le Samoa Observer aua tupulaga ma le mamalu o le atunu’u e pei ona fa’ananau iai. O nei tala, o le a ‘auina atu i Aso Lulu o vaiaso ta’itasi. 

Upu Tomua:

Ua o se galu na ona faafua ae le fati. E na ona saua i le ea le faalogo, ae le mautinoa lelei. O le taofi lea e uiga i le ‘autu o lenei mataupu. Ona tupu lea o le lagona e ao ona sailia se faamatalaga moni. O le su’esu’ega i ni tusitusiga faamaumauina, ua iloa ai e leai se Tusitala ua ia tusia se mau vagana ai e sa pueina ata o le “Vai o le Tama”. O le nu’u o Amaile i le Atu Aleipata o le motu o Upolu, o le nofoaga lea o i ai le vai lenei. O Aleipata, o le itu lea i matu sasa’e o le motu o Upolu i Samoa. O ona laufanua lafulemu ma e iligia pea e matagi malu e le aunoa. 

Faapei ona nauta’i le mutia i le sau e foliga fo’i i ai finagalo ma taofi logomalie ma eseese o nisi nu’u aemaise Aleipata, o ai e ou le tala, ao fea o iai le Vavau: “Vai o le Tama”

O le tala:

“Ta fia pa’i i Vai o le Tama”

Sa lalama Tagaloaalagi ma lona toalua i se tasi po, na amata i gatai o le nu’u o Ti’avea ma faasolo atu ai i le talafatai i sasae. O ia aso o feagai le faletua ma le maitaga tau fafine. Na faafuase’i ona faa-tiga le fafine ma ua fanau i luga o le papa. Sa le mamafa i ai le finagalo o Tagaloaalagi aua na o se alualutoto, ona tuu lea i luga o le papa a ua fo’i i le po. 

Ua ao, ua faaifo ane manulele o le tuasivi agai i le tai mo sailiga o ni mafua o le taeao o loo tamosi i le fogatai. 

Ua ‘apelepelea luga a’e tonu o le ‘alu’alutoto i gogo o loo tau fai tagi. O nisi manu sa faapau’u ifo ma tuutogi i le ‘afu’afu o loo taatia. 

Mulimuli ane, ua gaoioi le pepe ma ua maina ae le leo iivale o le pepe meamea. O se tasi mau o le tama lea sa tausia e nisi ilamutu o Tagaloaalagi ma sa ola ae ai i lea ogavao i le talafatai. 

O aitu poo ilamutu fo’i nein a latou uluai faaigoa le tama lenei ia “Tu’u togiagogo”.

O le ola a’e o le tama ua le ese fo’i ma se uiga faasaualii e pei ona faamatalaina lona faafailelega. O se aso fo’i e usu seu se faiva o le tama aga’i i sasa’e a o’o fo’i i le po ua alu se lamaga. Ona ite lea o Tagaloaalagi e le taumate o le alualutoto na lafoa’i lea ua tupu ae ai le tama nei. 

“Poo fea na tu i ai faiva o le Tama?”

O le gataifale o le nu’u o Amaile ma Samusu sa matua i ai le tu’u, ma ua masani ai i lea aso ma lea aso. O le tama, sa lei fiafia e feiloai i ni tagata, o le ala lea sa ‘alo’alo ai ma fealofai i vaai i le fegasoloa’i o tagata. I le o gatai tonu o le nu’u o Amaile e i ai se Ana o puna mai ai le vai. Sa fale i ai le alii lenei ae sa le iloa e tagata o le nu’u ma sa latou le iloa fo’i se punavai. 

Sa ‘a’auina e Tagaloaalagi lana masaga teine e saili le tama in aia latou malaga ane i le lagi tuaiva. O Ila ma Tualalafa poo Tualafalafa fo’i le ta’u a nisi, o igoa ia o teine. E le matea na matua faatapito ona saili solo i le gataifale seia o’o lava i gatai o Amaile. Na segia mauli ma tete’i tama’ita’i ina ua la vaaia se alii o loo ta’eleele i totonu o le ana, o le puna lea. 

 

“E leai la se isi o le tama la lea, o le atalii lava o lo ta tama”, o manatu ia o teine. 

Sa taumafai teine e taofi le tama se’i o latou tautala. Ae peita’i e le gata ina musu ae le fia feiloai fo’i i tama’ita’i. E a Ila ma Tualalafa e tau taofi le alii ae a Tuutogiagogo e tata ese ona lima ma ia mamulu ese ae alu. 

Ua ‘avea le vavao ma tapisa o mumufaloga na logo a’e ai i’uleo i tagata o le aai ma ua alu ifo le tuli se’i vaai pe se a o loo pisao nei. E le tatali e tama’ita’i le malosi o le tama ua vaivai fo’i Ila ma Tualalafa, aua ua leva ona faataugagase le tauiviga. O le vaivai o le masaga pei ona ta’ua, ua fai ma faitotoa na segia ese ai o la ola ua liuma’a uma i la’ua i totonu o le Ana, o le punavai lava lea. 

“Vai o le Tama, mafua i se a?’

Na feauga le lologi ane o tagata, ae vaaia loa le tama ua savali aga’i i le mulivai o lo’o tafe atu i le sami. Sa fono nisi o le nuu i le tama ina ia faatali ma liliu ane mo i latou, peitai e le gagana le alii a ua savali pea aga’i i le talafatai i sisifo ma mou malie atu lona tino. Sa vaaia e tagata le vai aua latou te le’i iloa anamua atoa ma ma’a tetele e luau a tutulala’i ai i totonu o le vai. E tasi le upu ua musuva ai tagata o le nu’u a’o ai le igoa o le tama, o le tali ma le gagana “se o le tama lale ua alu atu”. O upu ia ma le lagona maofa o le nu’u. 

Amata i na aso, ua ta’u lava le vai lenei “O le vai o le Tama”, le alii o Tuutogiagogo. O le molimau a le afioaga o Amaile o maa tetele e lua sa i totonu o le Ana o le punavai ua faaleagaina i le malosi o galu fafati i taimi o afa ma peau. O Ila ma Tualafalafa na sa liuma’a ai e tusa ma le taofi. O se vai malu ma le manino, e faaaoga fo’i mo vai taumafa, ae o se taelega logo i tino lona malu pe a taele pe auau ai fo’i. le mafuaaga fo’i la lea o le upu – “Ta fia pa’i i vai o le Tama”, ona e tupu ai le malosi faafouina pe afai e taele ai. Anamua, sa pumo’omo’o ma vaiti le vai, ae talu ai o galu malolosi ua faaleagaina ai, atoa ma le lautele pei ona ua i ai nei. 

“Le Vai o le Tama o Tuutogiagogo i le nu’u o Amaile”.

Manatu faaopoopo:

1. E ese le taofi o nisi o le nu’u lava latou e uiga i le vai, e mau nisi o le vai o Tagaloaalagi ma o ia fo’i na foaina le mata o le vai. 

ADVERTISEMENT

2. I le sailiiliga i nisi o tusitusiga faamuagagana e le o maua ai se faamatalaga e uiga i le upu ua autu i ai le Tala – Vai o le Tama. Atonu fo’i o se uluai tusitusiga lenei ua faia i le mataupu lenei. 

3. Manatu nisi o le ‘au teu upu o Samoa o le upu ‘au’au, “ta fia pa’i i vai o le tama”, e fofoa mai i le vai faamalu o Tamaalelagi, o Mataiva le igoa. Sa mo’omo’o nisi o manaia ma taupou e fia taeele ai, ona saafi lea, “ta fia pa’i i vai o le Tama”.

4. E le faumalo le taofi o le afioaga o Amaile ao le talitonuga, o le tama lava o Tuutogiagogo ma lona vai na mafua ai lea upu ua avea ma ‘autu o le Tala. 

5. I le o manatu faaopoopo ua faaalia ma le ‘ese’esega o taofi o le mamalu o e na tuuina mai le agaga fesoasoani o se itu taua ma le lelei e le gata e faatonutonuina ai le autu, a o le atili mauo’a ai fo’i finagalo ma le silafia e tagata o Samoa.  

Alagaupu:

1. “Fia pa’i i le vai o le Tama”

a) o se faamoemoe poo le naunau o le taofi i se mea matagofie ma lelei 

e) o moomooga o le loto i le fia taunuu i se mea

i) moomooga lelei mo le lumanai 

 

Uiga o Upu: [ua le aofia ai uiga lasi o upu, a ua faatatau lava i le faaaogaina i le Tala]

‘apelepelea – ufitia atoa, lilofia, punitia atoa, lilo 

Iligia – savili malu, matagi agi malu, saviligia 

Usuusu – alausu, usupo, alafa’i, vave usu

Faatagagase – tauiviga, taumafai atili, falologa

Lalama – faiva, fagotaga, fagogota, faifaiva

Logo i tino – logo lelei, matagofie, faamalie loto 

Maina – maona a’e, leotele faafuase’i, pisao 

Mafua – i’a nini’i o le moana, tama’i i’a laity 

Matua i ai le tu’u – faaiu i ai, gata ai, muta mai ai 

Mumu faloga – tauivi, fefaloa’i, tauiviga, fete’enaiga

Nauta’i le mutia i le sau – naunautaiga 

Na tu i ai, sa fale i ai – mau ai, masani ai, nofo ai, mau, mautu i ai, faamautu i ai 

Segia mauli – faatei’a, te’i, lagona fefe, mata’u, tete’i

Talalasi – taofi eseese, le tasi se mau, eseese manatu 

Tamosi – feasioai, soona fema’aua 

 

Faamatalaina:

Poualae Ovasene ma nisi o le nuu o Amaile i Aleipata – Upolu

30 July 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?