Lauga - “OLIOLI I LE ALII”

RP
By Rev. Petaia Setu, 24 June 2018

(FILIPI. 1:29)

O lē fea taimi e tatau ai le olioli i le Alii? A o gafea o lou olaga e mafai ai ona tupu o se mea faapea? E ese le fiafia lea tatou te lagonaina i lea aso ma lea aso i mea ua tatou maua; o mea ua iai. A o le taimi o loo tautala agai iai le aposetolo, o aso leaga. 

O aso e le taugalemu ai. O taimi ia o loo uuna’ia ai e Paulo le ekalesia i Filipi e tatau ona olioli ai because they were allowed to suffer for Christ. (f.29).

O le tofa mamao a le Tusi lenei o Filipi ia Iesu Keriso, o lo tatou Fiafia (Our Joy). O faigata ma puapuaga e faasaga mai ia i tatou, e folo e le olioli i ile Alii. Auā fai mai Neemia (8:10), o le fiafia i le Alii o lo outou malosi lea. O ā tafega e felutiaiina ai oe, e to’a lava i le Alii (Sala.107:29). 

O le tala’iga a Paulo i le aai nei i Filipi na pu’eina ai la’ua ma Sila. Na sasaina o la tua ona tuuina lea o i la’ua i le potu tuloto o le falepuipui. Ae fai mai le tusiga a Luka (Galuega 16:23-26), o le tulua o po ma ao ua tatalo ai Paulo ma Sila ma pepese. 

O taimi tūgā ia o le po e mălosi ai ma gāoi manu’a ae molimau Luka,  ua pepese ai le au uso nei. O faailoga ia o le faatuatua ua mautinoa le faamoemoe ola. La lea ua lagi e le faafetai ma le olioli i le Alii i le taaligoligoa o le po.

O le uluai ekalesia kerisiano lea i Europa. O loo lu’i e le taufaamata’u ma le tele o faafitauli. A o le faatuatua o loo faamalosi atu ai le aposetolo i le tutū faatasi i le maopoopoga ma le olioli i le Alii.  Olioli i taimi o puapuaga ma tiga e fetaiai ma oe i le olaga nei. Olioli i le tuuaifuaina ma le sauāina. Aisea? Le au uso e, ua faataga e le Atua. Ioe, ua faataga e le Atua tiga ma mea leaga uma o lenei olaga e save’uina lou faatuatua. Na fau mai i le falepuipui le fofō o nei faafitauli. Fai mai Paulo, olioli i le Alii (3:1). Ona văsa’i lea. Ua le ma iloa e le aposetolo pe se a se isi upu e sili atu nai lo le olioli ona ia toe ‘anau mai lea, “ou te toe fai atu, ia outou olioli i le Alii”. 

ADVERTISEMENT

Ua lava lea. Leai se isi mea. Na o le olioli i le Alii e fofo’eesea avega mamafa ma faafitauli i lou olaga. Fai mai Paulo, “e le na ona ia faatuatua i le Alii, a ia faatigaina foi outou ona o Keriso.” O lona uiga, o le olaga lea o le kerisiano i aso uma. E le o se olaga faafifilemu. E le ola faasamasamanoa. E le taamilomilo ma lafi i tua o le isi. E le tago faatumutumulima i mea fai. E le ‘alo i taimi o faigata. Na te le sii taua i le leaga, a ia malo le filemū, le loto maualalo, le onosai, loto faamagalo, le loto alofa, ma le lelei i le leaga (Rom. 12:9-21). Aisea? Ona o Keriso. Fai mai le aposetolo, “a ia faatigaina outou ona o Keriso.” O suamalie ia o le faaeaina.

Samoa, o le apoapoaiga ma le faamalosi lenei o loo tusi mai totonu o le falepuipui. Ua iloa e Paulo, e iuvale pulega ma sauaga a le lalolagi. E le faamata’uina le faatuatua i faasalaga ma le oti. E le mafai foi e filifili ma maea uamea o loo loka ai ona lima ona taofia le folafolaina o le talalelei o le alofa tunoa o le Atua. E tupu pea le Atua (Ioane 3:30). Ia maua maopoopoga Samoa. Ia tutū faatasi. Talia puapuaga ma mea faigata e faasaga mai ia i tatou (Iopu 2:10). Manatua, o le tele o puapuaga ma faigata, e silisili ona tele atu ai o le alofa tunoa o le Atua tatou te tau malo ai. (Rom. 5:19-21).

Ua mafai ona e faafetai atu i le Atua ona o ma’i? Ua e vivii i le Alii ona o faafitauli o loo feagai ma oe? E te ma’i ai i lou oono. E iu ina e fasa i lou ita. Fai mai Tavita, “Ia e fiafia lava oe i le Alii, ona foaiina lea e ia ia te oe o mea uma e te mana’o iai” (Sala. 37:4).

Ua viia e Paulo le ekalesia lenei i Filipi e le gata i lo latou faatuatua ma le lototetele, a o le agalelei ma le lima foa’i. E galulue  ona tagata. Faigofie po o le faigata e le solomuli. Ua iloa  le Atua i le loto faatuatua. Ua suamalie tiga ona o le faatuatua. Ua faigofie mea uma ona o Keriso. Ua māmā faafitauli ona o le olioli i le Alii. Fai mai Paulo, o loo finau pea outou ma ia faafitauli e pei ona sa outou vaai mai ai i o’u puapuaga, o loo outou faalogo pea lava o ia te a’u.

Samoa, e le uma faafitauli o le olaga nei. Ae vave uma lo tatou malosi pe afai tatou te faatau atu foi i so tatou malosi. Fai mai Paulo, Olioli i le Alii, pau lea. O le tatalo ma pese a Paulo ma Sila na le gata ina gase ai tiga o o la manu’a, ae na to’ulu ese ai loka ma filifili uamea nai o la lima!

A tuuaiina fua oe ma inosia ona o Keriso, vivii i le Atua. A sauāina oe i upu ma tala ona o lou tausaafia ma lou fai mea lelei, valaau i le Atua, Faafetai Tamā! Inu i mea leaga uma ua faaleagaina ai lou lelei. Talia faifaiga ma tiga ogaoga ua faalumaina ail ou faamaoni. Ioe, e le na ona ia faatuatua i le Alii, a ia tofotofoina le malosi o lou faatuatua i le faatigaina o oe ona o Keriso. Fai mai Iesu, e faamaulaloina le faamaualuga; ae faamaualugaina le faamaulalo. Ua e iloa la taimi e faailoa ai le olioli i le Alii? O upu o le gatai fale a le atunuu, E iloa le tautai i aso leaga. Ae fai mai Tavita, o le toa le tagata na te pulea lona loto. A o oe, e faapefea ona e tali atu i ou faafitauli ma faigata e feagai ma oe?

O la Paulo, “Ia outou olioli i le Alii…ou te toe fai atu, ia outou olioli i le Alii.”

Amene.

7737063

RP
By Rev. Petaia Setu, 24 June 2018

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?