E manatua pea lea aso fa’anoanoa!

VM
By Vatapuia Maiava, 02 October 2016

E o’o mai lava i le taimi lenei e le’o faigofie e le tamā i a Mose Kamu, 64 le matua o le soifua o Lalomanu le fa’alavelave mata’utia na ‘a’afia ai le tele o aiga o le afioaga e aofia ai ma lona ‘auaiga i le 2009.

O le Aso Tofi na se’i mavae atu nei na atoa ai le fitu o tausaga talu ona tula’i mai le mala fa’alenatura o le galulolo lea na pagātia ai le atunu’u ma maliliu ai le silia ma le selau i Samoa nei.

 “E lūlū le mafu’ie i le taeao o le aso tonu lea o lo’o o’u i luga o le pasi ou te alu e faigaluega aua o a’u sa ou galue i le Matagaluega o Fa’ato’aga.

ADVERTISEMENT

“Ia na tetele loa le mafui’e ona afe loa lea o le pasi na ou alu fa’atasi ai ma le to’atele o le pasese i le lotoā i Avele.

“Na ese lagona sa i ai i lea taeao e pau lava le tulaga o lo’o mana’o i ai o le taumafai lea e fa’afeso’ota’i mai aiga i tua nei, ia na fa’alogo atu i le taimi lava lea o fa’apea le avepasi o lo’o taumafai e vili mai lona aiga. “Ia na vilivili mai i tua nei ae tali atu se tasi tagata e leai se isi o le aiga o i le fale, ia na ia fa’apea mai loa e tatau ona toe fo’i mai. “O le toe fo’i mai ai o le pasi na to’atele nai isi o ‘auaiga na matou omai ma piki mai ona o le manana’o se’i omai e asi mai aiga i lea taimi ona ua alu fo’i i luga o leitiō e fa’apea ua taia le pito nei i le galulolo. “Ia na sau le pasi, e le’i o’o mai ona ua fa’aleagaina le tele o vaega, ia  o se va’aiga uiga ese na ou tau mai i ai a’u ia , ua matua’i sosola lagona lelei ona o le mata’utia o va’aiga sa i ai lea aso.

“O le falema’i ua matua’i fa’atumulia, ia na’o le la’u atu lava o tagata ma fa’apulou i kapoleni i fafo aua ua maliliu le to’atele.

 “Sa taumafai e sa’ilia aiga….ma o se aso fa’agalo gatā…e le mafai ona galo fa’anoanoaga sa i ai i le to’atele. “O nisi o aiga ia o lena ua outou iloa, e ta’ito’atolu na to’esea.“O a’u o si o’u tinā sa apilitia i luga o le ulu, ma sa taumafai e taua’i i ai i luga lavalava ona ua le lavālavā.

O le taimi lenei na fa’ailoa e Mose o le to’atele o aiga ua aga’i i nofoaga maualuluga talu ona uma le galulolo i le 2009. “Ia sa faia le Lotu Fa’amanatu o le tausaga lenei ma manatua ai le to’atele na maliliu i lea fo’i mala fa’alenatura.

 “Ia o le Atua lava na aumaia o Ia Lava fo’i na te toe ave’esea.

VM
By Vatapuia Maiava, 02 October 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?