E FAAVAVAU LE OLA AOAOINA

TM
By Theresa Meaole, 02 October 2016

Na faaiu i le tagata le foafoaga a le Atua,

Faalogo ma usitai o le aoaoga lea na muamua.

O le afuaga lea o le ola aoaoina,

I le va o le Atua ma le tagata na fausiaina.

Sa i le amataga la o le foafoaga le ola aoaoina,

Lea lava o loo faaauauina.

E amata mai i totonu o aiga,

O tatou ola ia tatau lona faaaogaina.

Tu,savali,nofo ma le tautala,

Usitai faalogo ma ia iloa ona ava.

Aoao ia i le tama e tusa ma ona ala,

Fetalaiga tuusao lea a le Atua i o tatou olaga.

O le va ma le faiaoga i le faleaoga lona lua,

Latou te aoaoina le poto salalau mo i taua.

ADVERTISEMENT

Amio pulea ma ia ola tumama,

Manatua e atagia ia i taua le tama ma le tina.

Ia faaaloalo ma tausaafia,

Uiga lelei na e ao ona faaalia.

Le va ma le faifeau i totonu o Ekalesia,

Se tasi lea o nofoaga o aoaoga ua lausilafia.

Ia aoaoina i le ola faatuatua,

Aua nei galo le upu a le Atua.

O le sulu foi lea i o tatou ala,

E faavavau lona malamalama.

Pe toeaina pe loomatua,

E aoao mai pea le upu a le Atua.

Aoai faatonu ma faapoto,

Ina ia o ta maua le ola saoloto.

E ola pea i totonu o aiga,

Le ala lea o le faavavau o le ola aoaoina.

TM
By Theresa Meaole, 02 October 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?