St. Marcellin Champagnat – O le alofa e leai sona tua’oi

11 June 2017, 12:00AM

Tui Atua Tupua Tamasese Ta’isi Efi Mulivai Cathedral 6 June 2017


I le taligasua mulimuli a Iesu ma ona ‘au soo, na ia saunoa ai, “Ia outou faia lenei mea ma faamanatuga o a’u”.

O le asō o le aso o le faamanatuga.  O le faamanatuina i le ‘oli’oli ma le agaga faafetai, le olaga ma le faautaga a Sagato Marcellin Champagnat, o le tamā Faife’au na faavaeina  le ituaiga o Felela Malisi i le 200 tausaga ua tuana’i.

Tatou te faamanatuina i le alofa ma le agaga faafetai le tautua ma le ma’elegā o Felela Malisi e faatūina ia a’oga e a’oa’oina ai le fanau talavou i le tele o atunuu o le lalolagi e aofia ai ma Samoa.

E i ai le tatalo iā Maria e amata i upu nei, “Ia e manatu o oe le Taupou e sili ona agaalofa...”  O se tatalo ma se talosaga, ‘aua ne’i galo mai, ae ia tumau pea i lou mafaufau ma le agaga, o oe o le matou tinā ma o i matou o lau fanau.

Tatou te manatua Marcellin Champagnat ma Taua i totonu o le lotoifale ma fafo sa aafia ai le malo o Farani ma le mata’utia o le afaina o aiga ma fanau.  Tatou te manatua le alofa ma le agalelei  na ‘apo’apo ai e Marcellin Champagnat  tamaiti ua matelāina ma mātuaoti, ua sauāina ma faasino’esea;  ma tausi ma agalelei ma alofa i ai.

I lenei galuega, e le pine sa limata’ita’iina lana faautaga e le Tinā o Malia.   Na māfua ai ona ia faitau o le fe’au ma le galuega a Felela Malisi latou te faaali ma faailoa le agaga to’afīmālie ma le faafailele a le Tinā mo fanau ua pagātia ma ua tuulafoa’ina.  O le agaga o le ituaiga o Felela Malisi i le faafoeina o fanau talavou, ia o latou maua le agaga o le tinā; ia ‘auai ma aafia; e fiafia e faalogo ma le to’afilemu; e alofa ae mau le toovae. E malamalama ma agaga faamagalo.  E faato’a filemu; ina ia faaosofia le agaga o le fanau ia puipui i lona faamaoni ma lana faautaga amiotonu.  Ae faamuamua le tupu ma ola o le faatuatua iā Iesu ma le alofa iā  Malia lo tatou Tinā.

O le upu ‘Felela’ e mai le upu ‘frere’ mai le gagana Farani,  o lona uiga o le uso.  O le faalagi e le tasi Felela o le isi Felela ‘o le uso’, o loo faatāua ai le uso i fanau tama e tasi lo latou tinā – o Malia lea.  O se mafutaga faaleaiga e alala ai Malia, o le Tinā, o le ta’iala, o le puipuimalu ma le toomaga.

E faapefea ona mataali le agaga faa-Malisi i le latou fe’au ma le galuega mo le fanau talavou?  O le ā sa’u molimau i lo’u manatua?

Ou te manatua ia Felela Pafelio po o Brother Pamphelius  i le savali mai Mulivai i le aoauli i le mutigitigi o le la, ma lau lana Losalio, e aga’i i le falepuipui i Tafa’igata.  E tele ma ‘anoa ia uiga o lenei taulaga,  Muamua o loo fai lana taulaga tatalo iā Malia, o le Sulufaga o le Ituaiga.  Lona lua, o loo fai lana taulaga togisala i lona savali i le mūgālā i le aoauli.  O se isi fe’au o lana taulaga, ona o a’u nei sa fai ma faia’oga ma tamā faaleagaga, e ao fo’i ona ou togisala i le lape o la’u fanau a’oga.  Ae taualuga ia lenei fe’au, o loo faapea mai le taulaga, e leai se isi e faasino’esea mai le aiga Malisi po o le fanau a Malia ona ua alu i le falepuipui.

Ou te manatua ia Felela Casimir ona o lana galuega faafailele iā Felela Iulio ona o lona talitonuga o ia o se tagata valaauina.  Ma ou te manatua fo’i upu nulimuli o la’u molimau i lona falelauasiga, “Talu ai nei sa ou feagai ma se tofotofoga tūgā ma sa iloga ona ou faanoanoa.  Ae o le maliu o Casimir, ua avea o se faaola totoga.  O lona maliu o se faamanatu, o mea tāua i le olaga tainane tofotofoga, e tumau.  E avanoa pea e faafiafia iā i tatou ma faasoa atu i o tatou uso tagata.”

Ou te manatua Felela Leo ona sa faia’oga i lo’u tamā ma sa ia pulunaunau ina ia ou to’aga i le a’oga e maua ai so’u lumana’i lelei.

Ou te manatua ia Felela Afelē ona o ia o le foma’i o faafitauli.  A oo loa i se mea tūgā ona aumai lea o Felela Afelē e apoapoa’i iā i matou i le gagana Samoa.  E ma’eu le gagana a le toeaina, ou te manatua ai le upu faa-Samoa, e aumai lava le talo matua e to’a ai le moa.

Ou te manatua Felela Dennis ona o lona sauā.  Ae na ou lagona le aogā iā te a’u ona ua ou misi le Vasega 4 ae siitia a’u i le Vasega 5.

Ou te manatua Felela Jerome  ona sa ia tuumumusu i lo’u tamā a o ou i le Form 3, a lē suia la’u amio e lē pasi la’u su’ega.  Sa aogā le faauilavea ma le fautuaga a lo’u tamā iā te a’u.

O le a faai’u la’u faamatalaga.

Ina ua faatautō a’u i Vailele i le tofi o le Sui Tofia, na afio atu ai le afioga a Polataivao Fosi, o lona faletua o Ipu ma ona alo.  

 

Na fai lana ta’utinoga, “ua ou oo mai ma le tinā o le aiga ma le fanau e fai atu la’u ta’utinoga lenei.  O mea sa tutupu i le ta va i le Palemene ma mea faapolokiki, ua uma i le asō.  Sa ou tatalo ia e oo i le Sui Tofia.  Lea la ua faamaonia i le asō, o le a liliu atu a’u ma le aiga e tautua oe.  A e mana’o i se toga, tupe, povi, puaa po o le ā lava, logo mai.  O le a fuli a’u ma le aiga e tautua oe.  Tupua, e māfua lenei mea, ona o ta’ua o tama o le Malisi”

Ina ua tuumalo Polataivao na oo mai le sāvali a ona alo, o le finagalo o Polataivao, ia ou faia se molimau mo ia.

O le matua o la’u molimau i le maliu o Polataivao, e sii mai upu a se tasi o Faifeau iloga o le Ekalesia Katoliko, Father Paul Ojibway:  I le aoao tetele o mea e faamatalaina, o le fe’au tumau e a’oa’o mai e ulua’i tagatanuu o Amerika iā i tatou:  ina ia faatāua se mea e sili ona manino ae atonu o se mea e sili ona faigatā mo i tatou o tagata ola – pe faapefea ona fefaamagaloa’i ma le uso tagata.

I le aiga Malisi sa faafailele mai i le matua-tausi a Marcellin Champagnat, “o le alofa e leai sona tua’oi”,  e lē se mea faigatā le fefaamagaloa’i ma le uso a tagata. Soifua.

11 June 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>