Lauga - “Ou te loto i le Alofa”

RP
By Rev. Petaia Setu, 05 November 2017

Ua tafa mālama e pei o le tala ia Paiatea ma Paialalo. Ua ifo foi augā aso a le atunuu i ona po o le valea, ina ua faagata e Poluleuligaga taulaga faasolo a Samoa sa pologa ai. Ua tupu le alofa. Ua galue le alofa. Auā e loto faaola le alofa.

O le tala tuu a le atunuu, ua ofo atu e le tama o Poluleuligaga ia lava (lona ola) e fai ai le taulaga i lona tamā. Ua faasaoina le au uso na fa’i a oti i le aso lea. Ua le o le taulaga na tāūa i le tama, a ia laveaiina le ola o ona tagata. Ua gase toa; ua mālō le alofa. A o le fatu lea o le feagaiga a le Atua ma ona tagata, ua faamanatu e Iesu ia Iutaia e ao ina malamalama iai. “Ou te loto i le alofa….”

O Mataio (Levi), o le tagata ao lafoga. Ua nofo i le fale e tali ai taulaga. O le galuega nei, o le agasala i le vaai a le au faresaio ma Iutaia. A ua valaau Iesu i le uso nei, ona tulai gūgū lava lea, ma mulimuli ia Iesu. Na ia saunia le taumafataga mo Iesu ma soo se tagata. Faauta foi, o le au telona e toatele ma e ua agasala ua o mai ai.

Ua leaga tele lea i le manatu o le au faresaio (f.11). Auā ua faapea foi o tatou lagona faa Samoa. E le tatau ona iai le faifeau poo le a’oa’o poo ai lava ua iai sona tofi i le lotu i se mea o tumu ai le au lē taupulea! E le tatau ona milo faatasi ma e amioleaga! E le manaia ona vaavaai atu o filo mai ai se tagata e maualuga ma aloa’ia ma ta’uleleia lona olaga i se potopotoga o tagata gaoi tagata faatuputupu leaga, tagata fai mea matagā. Tainane lava, o se feau o le talalelei o loo taumafai atu iai. Fai mai lava  Iesu e le aogā le fomai pe a ua leai ni ma’i.

O le alaalafaga ua tumu ai le fale o Mataio i lea aso, e mama’i uma. E tasi lo latou ituaiga ma’i, o le agasala. (f.11) I le, ua talafeagai lelei  lo latou itu aso. Ua latou maua le Fomai sili o fomai. Le fomai na te silafia le faavae o le faiva faafomai (f.13). E malamalama i lana galuega. E le fua faatatauina sona taimi auauna. Na te talia ma’i, ma asia ma’i. E savali i ma’i. E milo faatasi ma ma’i. E maua i le mea o iai ma’i. Auā na afio mai mo e mama’i (f.13). O faapea sau auaunaga faafomai? O faapea ona fai lau galuega faafaifeau? Ae a oe le faiaoga?

Le matai, tausi aiga? Faauluuluga o galuega eseese ma Matāgaluega? Samoa, e tāūa tele le malamalama. Ae sili atu ona tāūa le savali ai ma ola ai i le malamalama. Ua faapea le upu na tusia e Oscar Hammertein e fautuaina ai se tamaitai pese lauiloa: “E le mafai ona iloa, o se logo le logo, vagana ua e taina. E le o se pese foi le pese, vagana ua e usuina. Ua le o se nofoaga o le alofa le faapulou i le loto. Foai atu. Faasoa atu. “Love is not love till you give it away” E faapefea ona tau faapaleni le taulaga ma le alofa?

E le mafai ona iloa sou alofa pe afai e te nofonofo ai pea ma lou alofa. Fai mai Iesu, “ou te le i sau e valaau i e ua amiotonu, a o e ua agasala ina ia latou salamo.” O le auga atoa lea o le liutino tagata o le Atua, ia ola le ma’i. O lona afio mai i le lalolagi, ia faaolaina le tagata agasala. O le ala foi lea o le taūa tele o lea mafutaga i le fale o le ao lafoga. E taūa i le foma’i, ae sili foi ona taūa i ma’i.

O le alofa, o le uiga pa’ia lea o le Atua. Auā o le alofa lava le Atua (I Ioa.4:16) O lona lea natura mai le vavau e oo atu i le faavavau. E le faatuaoia lona alofa. E le faailoga tagata. O lana faamua o le mativa. O lona lava alofa tunoa e faamamafa i e ua puapuagatia. O i latou ua manaomia le fesoasoani. O e ua maua e le alii o lenei lalolagi.

Fai mai Iesu, “Ua ou sau ina ia latou maua le ola, ia maua atili ai lava. (Ioa.10:10). Uso e, poo e iloa o oe na liutino tagata ai le Atua? Poo e malamalama na afio mai le Atua i le lalolagi ona o oe? Le oe ua faamoemoe e faamălie le Atua i au taulaga, ua e manatu e tafa le finagalo o le Atua i au tupe? O au oloa siiatoa ma au taulaga meaai e faitaulia ia e le Atua? Toe faalogo i le upu a Iesu, “Ō e a’oa’o poo le a le uiga o lea upu….” E a’oa’o e a? Afai ua fai mai Iesu e ō e toe vaai lelei iai ma a’oa’o ia malamalama ma iloa, o lona uiga e oti uma mea ia tatou te faia.

ADVERTISEMENT

E sesē le mea na e te soona mălō solo ai. E fafo ma le maafala a tatou taulaga. E fano oe i le ala o loo taitaisesēina ai oe. Fai mai Iesu, a’oa’o ia iloa le upu lea – “ou te loto i le alofa” Vaai i le fuaina o upu ia e lua, Alofa ma le Taulaga.

Le ekalesia e, ua mamao lava i Sapanī lo tatou faauigaina o le alofa o le Atua. E loto le Atua i le alofa, ae tauanau e tatou le taulaga ia lapo’a. E manatu le Atua i le faaolaina, ae pupū tatou i o tatou tamaoaiga. E pele i le Atua le tagata agasala, ae faamamapo e oe le agasala fai pea lava. O le olaga galue lena o le au faresaio. E togisala i le tagata ua agasala, ae leai sa latou fofō i le agasala. Ua manatu o le togiola e maua i taulaga, ae leai. E loto le Atua i le alofa. O lē fea alofa o loo mana’o Iesu ia e malamalama ai?

Samoa, e le ta’ufaaleaogaina lau taulaga. Ae sili le alofa i lo le taulaga. Se a le uiga o le taulaga soona fai ae le aooga ai fanau ma fia aai? E le o se alofa lena. E popole i le taulaga ae le popole i le mau pili ua fausasaga? E le o se alofa lena! Le au uso e, e le o le faamuamua o le taulaga a o le galuega faaola i agaga o tagata. O le alofa moni lena o loo finagalo ai le Atua.

O le aoaoga lena a le Tusi Paia. Ia fausia lou olaga i le alofa. Auā a alofa, ua nanea le taulaga. A alofa, ua mamā le taulaga. A mamā le taulaga, ona maua lea o le viiga o le Atua. Ia manatua lena mea Samoa. E le sailia i ni taulaga se viiga o le Atua, a o le loto e fai ai le taulaga. Auā o le alofa, e fanau mai i le loto fuatia ifo ua lelei.

Lea na totonugalēmu ai ia Iesu le potopotoga i le maota o Mataio. Ua tumutumu iai le au lafoga ma e agasala. Auā ua fiu e faatutumu a latou taga, e mamafa lava i le agasala. A o le alofa lenei na valaau, “Ia outou o mai ia te a’u, outou uma o e tigāina ma mafatia i avega. Ia outou amoina la’u amo, ma ia outou faaa’oa’o mai ia te a’u…ona maua lea e outou o le malologa mo outou agaga.” (Mata.11:28,29). Le alofa lea sa sui tulaga ia Paiatea ma Paialalo, ma faaolaina ai tagata o Samoa i na ona aso. Ioe, o le alofa lena e finagalo ai Iesu.

E ui lava ina agaleaga Iutaia ma teena e ona lava tagata, ae le i ’alo ese pe faafiti ai lo tatou Alii. Pe upuia ma maosiosia ma fasiotia, ae na alu lava iai e milo faatasi ma tagata le malamalama, ina ia faaolaina i latou i lona malamalama. Fai mai Isaia, “o ia foi ua faapei o le tamai mamoe ua taitaiina ia fasia; e pei o le mamoe foi i luma o e sele lona fulufulu ua faalologo ia, o ia foi ua le tautala mai” (Isa.53:7) “Ua na tauave o tatou tiga, ma na tauave o tatou faanoanoa” (Isa.53:4) Auā o lona loto lea – o le alofa.Fai mai Paulo, ‘a o lē sili o na mea o le alofa lea” (I Kori.13:13). “e lautua ia i mea uma, o le fusi e atoatoa ona lelei ai.”(Kol.3:14).

Manino lelei! E loto Iesu i le alofa. A o le a lou loto?

 

                           Amene

 

7737063/7783782

RP
By Rev. Petaia Setu, 05 November 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?