LAUGA - “E faapefea ona maua le Ola e faavavau?”

RP
By Rev. Petaia Setu, 18 June 2017

O le mea e lelei i Apia, e lelei foi i Savaii? O le mau lea a se tasi taitai ua mavae atu o le malo o Samoa. O se mea ua fiafia ma manuia ai Apia, e tatau foi ona fiafia ma manuia ai Savaii. Ua faapena le uiga lata mai o le vaega lua o le tulafono faaauro a lo tatou Alii. E te alofa atu i lē lua te tuaoi, ia pei o oe lava ia te oe.

O le saolotoga, ma le manuia, ma le fiafia, o le olaga mamā lea ma le paia sa faamanuiaina ai le uluai tagata i le amataga. Ae ona ua finau vale, ma soli tuaoi le tagata; ua na tofotofo, ma sosopo ai i Lē na faia mea uma, na fāōa ai mea uma mai le tagata, ma ta vavae ese ai mai le pa’ia o le Atua, ‘ne’i aapa atu lona lima, ma tago atu foi i le laau o le ola, e ’ai ai, ma ola e faavavau’ (Ken.3:22).

O lona uiga, e umi se taimi o le sailiga; e le faigofie foi ona finauina.

Manaia le fesili; e ui o le fesili tofotofo i le Alii. A o se fesili tāūa mo tagata uma ina ia mautinoa so tatou taiala i le faaolataga. O le fesili a le tagata ua maualuga lona aoaoina, ae pogisa i lona faatinoina. “Se a se mea ou te faia…?” O le sailiga o le saolotoga ma le lelei sa iai i le amataga. E faapefea ona toe faafoisia i le mafutaga sa fiafia faatasi ai ma le Atua i Etena? Ua toe moomoo i le ola sa i le vavau! E toe maua faapefea? O le fesili i le lalolagi mo le lagi. Se a se mea ou te faia i lalo nei? I lo’u lalolagi? A o o’u ola? A o maua lo’u malosi, ina ia ou maua ai le ola e faavavau?

Ua uma ona faataatia e le Atua le taiala. O le tulafono e toe faafoi ai le tagata i le Atua ma sapi ai i le ola e faavavau. Muamua, alofa i le Atua; Lua, alofa i le tuaoi. O lenā, sa faafetoai ai e Iesu le loia. Afai o le loia o le tulafono, o le a la sau faitau i le tulafono? (f26) Ioe, ua toe tali lava e le a’oa’o tulafono lana fesili (f27).

O le faataoto sa faaaoga e Iesu (f.30-35), sa matua solofa ai e Iesu pa vaeloto sa ati tu e le au faitulafono ma le au failotu o Iutaia (f.31+32). E laulauvivilu i le alofa i le Atua ma le alofa i le tuaoi, ae matuā le faatagaina ona alofa ma fesoasoani i se tagata mafatia; aemaise lava pe a oo ina tausia mamalu faalelotu ma tulafono faa Iutaia.

O le tuaoi o loo tautalagia, o le tagata puapuagatia. Le tagata ua matelāina; le tagata ua agaleagaina ma tuulafoaiina; le tagata ua tuua’ifuaina ma faasauāina. O le tagata ua lailoa i le mativa; faataugāina i le mana’o o isi; fesēa’i i le pouliuli; puleesea e le lima malosi. O le tuaoi, o le tagata ua toe toso lona fale, ona o le tele o mea mamafa ua tauave; le aooga fanau ona o le maualuga o le tau o le soifuaga. O ē o loo mama’i ma e o i le toese; o ē iai manaoga faapitoa ma e o faanoanoa. O ē ua pagatia i mafuie ma tsunami; ma e ua fia maua lau fesoasoani. 

Samoa e, e le o le tuaoi o loo tausi i la tatou faa Samoa. Se’ia aumai se mea ona ave foi lea. Tatou ō iai ona sa agalelei mai foi. E le o le tausi ai lava na o ē maualuluga ma maua mea. Aua e te fagota i le tai papa’u. E le o le papa’u e maua ai le Ola e faavavau. O lou ola! Ia pei o oe lava ia te oe.

ADVERTISEMENT

Vaai lelei i le faataoto: O le faitaulaga? O le faifeau! O le sa Levī? Aisea na faamamafa ai e Iesu le lē alofa i le pito lea? 

Ne i manatu le aoao tulafono o loo fesili i se faatau fa’i. Leai, ua fesili tonu lava i le foma’i. Ua silafia e Iesu, o le mea lea o loo tupu i le toatele o le au faitaulaga ma le au sa Levī. E mă’ati le theory, ae matatupa le pratical. O le tele o aiga e iai matua tausi, o ma’i manaoga faapitoa, o ma’i eseese, o manu’a o le mafaufau, faafitauli o fanau; e fiu e autilo le ituaiga lea, e faatafatafa mamao, e oono se’ia aulia le Aso Sa o le Faamanatuga. A o le tasi Samaria, o le tagata o nuu ese. E le o se faifeau, a o se tagata fai pisinisi. E inosia e Iutaia, ae tauleleia e le Atua [Samaria agalelei]. Ua tatala lona loto, ua ia iloa atu le Iutaia ua tali oti, ona mutimutivale lea o lona alofa. Ua ia faainu, solo, fusifusi ma faaofu. Ua opoopo mai ia te ia ma sii a’e i luga o lana manu. Ua savali ma taitaiatu i le faletalimalo ma tausi ia te ia. Ua na totogi le pili ma tautino e toe afe mai e vaai ma totogi uma nisi pili! Oka! a faapea uma sa Levi o lona uiga e malaga tuu sao tagta uma i le ola e faavavau. A faapea uma foi tagata o lo tatou atunuu o lona uiga ele toe lata mai ia Samoa ni malosi faale natura.

O le ola e faavavau, o le ola e i tua atu o le ola nei. O le ola faifaipea e leai sona mutaaga. O le ola ua tuu saoloto i e ua sao atu i le malo o le Atua. O le ola ua tuu mălie ia i latou ua manumalo mai puapuaga ma faigata o le lalolagi. 

Samoa e, o le faamamafa lea a Iesu i le vaega lua o le tulafono faa auro – Ia e alofa atu i le lua te tuaoi, ia pei o oe lava ia te oe. 

O lona uiga, e le faapito le alofa. E le fuapau. E le faatuaoia. E le faale-aiga, faale nuu, faale uo. E vaai tutusa i tagata uma. ’Aua le inoino i le tagata mativa. ’Aua le ‘alo i le tagata ma’i. ’Aua e te faatafatafa mamao i le tagta fia ai, le tagata faatauvaa, ma le tagata o loo manaomia oe. O le auiliiliga lena o le tali i le fesili a le loia. Ia manatua, o le totonugalemu o le tulafono o le Alofa – o le galuega faaola. Faalogo ia Iesu, “O ai so latou nei e toatolu la te tuaoi ma le tagata na fasia? Tali le loia, “O le na alofa atu ia te ia” O lena tonu  lava le mea e te faia e te maua ai le ola e faavavau. Fai mai Iesu, Alu la’ia; fai le mea lena na fai e le Samaria. “Afai ua outou iloa ia mea, amuia outou pe a outou faia”(Ioane.13:17).

E le i faapito ia Iutaia le afio mai o Iesu i le lalolagi. E le i ‘alo’alo ese Iesu mai nuu ese. Ae na afemai lona alofa mutimutivale, ma fusifusi i ou manu’a; faatietie ta’ua i le nofoalii o le alofa tunoa, ma totogi i lona soifua o tatou leaga, ma tausi pea oe ma lau fanau i aso uma lava. Fai mai Iesu, Tago e fai e te ola ai (f.28). Ioe, fai la’ia faa Samaria agalelei, e te maua ai le ola e faavavau. Afai e faaolaina ai le Samaria agalelei, e tatau foi ona faaolaina ai le faitaulaga ma le sa Levi. Afai e lelei ia te oe e tatau foi ona lelei i isi. Afai e maua ai e le loia le ola e faavavau, e tatau foi ona maua ai e oe ma a’u le ola e faavavau. 

Samoa pele e, galulue fiafia, ma ia e faapea ona fai.

 

Amene

 

7737063/7783782

RP
By Rev. Petaia Setu, 18 June 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?