LAUGA - “Tuu i le Atua na te faataunuuina”

RP
By Rev. Petaia Setu, 09 December 2018

(Salamo. 37:5)

O upu masani o Faleata, A mălū, afe ia Faleata; a galuā, afe ia Mataafa. O lona uiga, o le mautinoa o loo ia Mataafa. A fetaia’i tatou ma faalavelave ma ua le mautonu, o leo e masani ai la tatou faalogo ‘Tatou tuu i le Atua’ E tuu e a i le Atua? Fai mai Tavita, o le Toomaga le Atua. Tatou te mapu i le Atua. Auā ua taoto ia te ia le au peau (Sala. 107:29). Ia e tuuina atu lou ala ia Ieova, ma faatuatua ia te ia, ona faia lava lea e ia.”

O le taulagi a le fai pese Eperu, o le apoapoa’i ma pese faamanatu i lona nuu atoa foi ma oe ia e mataala ma ia faautauta, o iai le maa tui ma le maa gao; o iai le maa faalavea aao. ’Aua le fefe, ’aua le popole i pisaga o ou tafatafa faa tagata. Vaai ma le loto faatuatua i le Alii lo tatou Atua.

Tuu i le Atua lou ala. O ia na te faafoeina ma faatautaia i le lelei ma le manuia a tatou fuafuaga. O ia o lo tatou Taiala e maua ai le to’a ma le mafanafana. Ua malamalama lelei Tavita i le natura o le Atua ma lona finagalo alofa i tagata. O le faamalosi a le fai Salamo, ia manino lau vaai i le Atua. Ia sa’o lou loto i le Alii. ’Aua le ola taumatemate. ’Aua le ola faavaeluātai. Ia talitonu i le Atua. O le ute lea e ala ai ona tuu i le Atua lo tatou faamoemoe. Tuu ina ua mautinoa i le loto lona taunuuga manuia. Tuu iai ina ua talitonuina i le loto le alofa ma le faamaoni o le Atua. Ua mautinoa lelei, e malu lou soifua ma lo tatou ola i ona aao faaola. Ioe, ua ia te ia lo tatou malosi ma lo tatou ola.

O le alofa lea o le Atua i aso uma ua tupu atili ai pea lo tatou fai aso i le Alii i aso uma. Ona fai pea lea ma tatou masani le – Tuu ia i le Alii! E alu alu ā ua uma, tuu i le Atua! E gase loa, tuu i le Atua! E le tagolima loa, tuu i le Atua! Ua tau foi ma le Atua, ai ua tumu le lagi i au tuu i le Atua a? E le na o le Atua. E iai foi si au pitolaau e tausi. E le i taalo Leatieogie, ae moe Feepo. Leai. O faiva o Feepo o le tapua’i. O le tapuaiga sa tu’i mai le loto ma le agaga. Sa tapu ai mea uma ae tasi i le faagatama. Sa lolo ai se manatu mo ia ae faatili manū mo le tama. Sa fai ma le loto iai. O lona uiga, sa faamaoni ona fai. O lana pati ta’oto, ua tali le momoo. Auā sa faamaoni le loto.

Samoa e, e tuu i le Atua le faamoemoe, ae tatalo oe. Fai mai Tavita ia e tuuina atu lou ala ia Ieova a ia moni lau tapuaiga. Ia e faatuatua. Ia talitonu i le alofa o le Atua i lana Tofa Faasoa i o tatou manaoga o aso uma. O lana tausiga, o lana taitaiga, o lana puipuiga, ua le ’ole lea. Viia lava le Alii. I le, e le tatau ona tatou fematea’i i le faamaoni o le Atua ia te oe ma lou aiga. Auā e le liua e se malosi le faamaoni o le Atua.

E mai le vavau lava ia e oo i le faavavau. O lona faamaoni lea fai mai Tavita, “ona faia lava e ia.” Afai e sa’o o tatou loto i mea ua tuu i le Atua, e le siligia lona taunuuga lelei. E le taumatea ona faamanuiaga. Auā e faia lava e ia i lona finagalo pule. E le maulalo le vaai a le fai Salamo i le Atua o ona tamā. Ua na iloa le alofa faa tamā o le Atua. E faafofoga mai o ia ia te i tatou. O le Atua tali mana’o. Ai o la lea ua fai mai ai Tavita ia tuuina atu lou ala ia Ieova. Auā ua alofa mai lava o ia ia te i tatou. Ua tatou faamanatu lena vaiaso ua mavae lona afio mai i le lalolagi, ina ia le fano se tagata e talitonu ma faatuatua ia te ia, a ia saoloto i le ola e faavavau. (Ioane. 3:16)

Malo folau! Malo foi finau. E ui ua toe o se aga, ae e le o tuusaolotoina i tatou e le alii o lenei lalolagi. E le o fifilemū le fili. O loo fesoua’iina pea i tatou i puapuaga ma faigata o le olaga. O ma’i eseese ma tiga faifaitetele.

ADVERTISEMENT

O le oi ma le oono e le uma; o le maliu ma le oti i aso uma. Ae faafetai o loo soifua lo tatou Atua agalelei. Faafetai o loo silasila ma faafofoga le Alii to tatou Atua, fai mai Tavita, o ia ua ta’oto iai le au peau. Ioe, o ia e tuuina atu iai o tatou manatunatuga, o a tatou fuafuaga, o o tatou atugaluga, o o tatou faanaunauga ma moomooga. O ia ua lafoa’i atu iai o tatou taeao ma i e luā, auā e faia lava e ia. Ioe, o la Tavita lea. O le Atua na te faataunuuina o tatou manaoga. Pau a le mea o le tuu atu iai ma le loto atoatoa; le loto ua mautinoa. 

Samoa, o le vaitau foi lenei e masani ona oso faalava ai matagi malolosi ma afā. O le malosi faa natura faatasi ma le mau faama’i eseese. A o le taimi tu lalata foi lenei o le tiapolo i lou olaga a o faataumuā āva lo tatou sa i le taulaga. Tuu atu i le Atua ma le loto faatuatua. O lana pule e ifo iai mea uma na faia. O lona finagalo e faalogo iai galuega uma o le foafoaga. E le o mea uma e gafatia e le tagata. E le mafai ona ausia e so tatou malosi mea uma. O lou iloa e gata mai ia. E faapefea le maa tui ma le maa gao? Pe mautinoa e te saogalemu i lou poto ma lou malosi? Uso, fai mai Tavita, Na o le Atua e laveai i le puapuaga (Sala. 124)

O le toe Aso Sa lenei o le 2014. Ua faitau aso ma itula o la tatou malaga o lenei tausaga. Ia onosa’i ma faamalolosi. Ia loto tetele ma faatuatua ma le loto faamaoni. Afai na e talitonu i le alofa o le Atua, tuu la ia i le Atua lou faamoemoe. O mea uma e mamafa i lou loto, o fili sa faataututū mai ma oe i lenei malaga umi, tuu i le Atua. O ou ma’i ma ou mafatiaga, o ou faafitauli ma ou leaga, na o le Atua e laveai ia te oe. O fea o iai lou loto? E te talitonu e taitai oe e le Atua i toe sekone o lenei tausaga? E te mautinoa e te maua i le filemu o le Alii lena tausaga ua tau vavala mai? Samoa e, o le alofa lava le Atua. E faamaoni lava ia. Se a se mea na te faamata’uina i tatou pe afai ua ’au le Atua ma tatou? O fea e alalai ai le maa tui, maa gao ma le maa faalavea aao pe afai o lo tatou Atua e pule aoao? (Rom. 8:31, 37-39). E le ma faatusalia le alofa o le Atua. Afai la ua fai mai Tavita e tuu i le Atua, o lenā. Pei o la le isi toeaina Faasaleleaga, Ae tuu e a?

Tatalo ma le faatuatua. Tapuai ma le loto iai. Afai ua mautinoa e malu ia Mataafa, pe le sili ai ea le alofa tausi faapelepele o le Alii lo tatou Atua ia te oe ma a’u? Tuu lou faamoemoe i le Alii. Faaofi e le Atua lo tatou sa i fanua, ae tapuai tatou ma le loto faatuatua.

Ia manuia le faamavae atu i le 2014, ma le feiloai atu i le Tausaga Fou, 2015.

 

Amene

7505152/7737063/7783782

E-mail: [email protected]

 

RP
By Rev. Petaia Setu, 09 December 2018

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?