PULEGA SOOFAATASI O SAMOA

FN
By Fuimaono Na'oia Fasavalu Touli F. Tupua, 19 August 2016

E ao foi ona ta’utino atu o le sefulu o tausaga o le pulega-malo soofaatasi na i’u ina aafia ai le to’atele o Papalagi iloga ma le faatuatuaina i upufai ma le pulega o Samoa. O nei tagata e aofia ai ni Faamasino Sili se to’atolu e pei o Cedercrants i le 1890, o Ide i le 1893 ma Chambers i le 1897, faatasi ai ma Peresetene e to’alima o le Komiti Faatino o le Eleele Sa, e pei o Pilsach 1891, Schmidt i le 1893, Blacklock i le 1897, Raffel  i le 1897 ma Solf i le 1899, ma Komesina o Eleele e to’afitu e aofia ai ma Alii Faufautua iloga mo tagata Samoa o Edwin Gurr mai le 1892.

O le isi alii Papalagi o Robert Louis Stevenson-lea foi sa tele lona sao i upufai o le malo o Samoa i le faagasologa o lea lava vaitaimi. O lana tautua ia Samoa sa fai to’atasi lava e ia e ala i le alofa ma se ala manino so faagasolo lona nofo i Samoa mo le lima tausaga, a’o le’i maliu i le 1894-ma o loo tumau pea ona avea o ia ma tagata Papalagi logologoa i tagata Samoa. Ae ui o lea, o le Feagaiga i Perelini na alia’e mai ai se malosi uiga ese e manaomia ai le galulue faatasi i le va o Konesula e to’atolu ma o latou malo, ma sui aloa’ia faava-o-malo e to’alua e pei o le Peresetene ma le Faamasino Sili, le Komiti Faatonu o le Eleele Sa ma Alii o Samoa.

Ua le ma’alofia le tula’i mai o faafitauli. E le gata i lea, ae o le leai o se pule a le Aiga-Tupu o Samoa, o le fetaua’i o Tagata Papa’e ma le leai o se pulega faatonu maopoopo –lea sa le mafai ai ona faatonu ma ua faatetele lona malosi. Ua tuuina mai e le Pulega-Malo fai to’atolu se faiga-malo taugata lea na te manaomia ai le maua i taimi uma o fesoasoani tau tupe mai fafo. O mataupu tau le lotoi-fale ia na tula’i mai ina ua tuumalo le Tupu o Malietoa Laupepa i le 1898 ma fete’enaiga tau le filifilia o se tasi e suitulaga ia te ia –na toe sasao ai le fetaua’i o le atunuu faatasi ai ma le fetaua’i o Sui Konesula ma Fuāva’a Tau-na faamuta ai loa le pulea o Samoa e Malo Tetele e tolu ae faavae loa le Komisi Faava-o-Malo, Na faamuta e le Komisi le fetaua’i o itu-taua ae fai le maliega lea sa tu’u atu i totonu o le Fono Faavae a Samoa i le 1899-ma faasa ai loa ona toe fai ni Tupu ma se faiga-malo e pulea e se pulega fai to’atasi.

E ui lava ina sa faaauau pea ona lagolago e Peretania le pulega fai to’atolu-ona o le manatu i e o nonofo i Ausetalia, ae na faaalia manino  e le Komisi e faapea e pau lava le ituaiga o faiga-malo lelei ma talafeagai mo nei atumotu, e tasi foi le faiga e mautinoa ai le manuia ma le filemu, o se malo lea e tasi lona pulega. Ua solo lelei le pulea e Amerika o le Taulaga i Pago Pago ma ua aloa’ia foi e malo tetele e tolu atoa ai ma le tulaga malosi o Siamani e fai fetuunaiga.

ADVERTISEMENT

Ua faamalosia atili Peretania ina ia solomuli ese talu ai le Boer War i le 1899 ma le tulaga le ma’alofia o le ono mafai e Peretania ona fai se sootaga e tete’e ai isi malo i totonu o Europa. O le musu o Ausetaralasia e faatiga le faiga-malo ma latou folafolaga le taunuu e pulea le Atu Solomona ma Toga-atoa ai ma le tuu avanoa o Siamani i le mana’o o Peretania na te pulea Aferika-na tua i le vaevaeina o Samoa i le va o Siamani ma le Iunaite Setete. O lea na sisi ai loa le Fu’a a Siamani i Mulinuu i le aso 1 o Mati 1900.

Sa manatua lelei e Misimoa e faapea o se vaega tele o le Eleele Sa o Apia i le 1890-sa leai ni auala, ala laupapa, nofoaga e fai ai fonotaga, falepuipui poo isi lava mea sa tatau ona i ai.E le gata i lea, ao faagasolo le 1890, sa le faamanuiaina taumafaiga a le Pulega fai to’atolu e una’i le faavaeina o se nofoaga mo Papalagi, aua o le faitau aofa’i o tagata mai fafo i Apia-sa na o le 260 i le 1895…..sa leai foi se uafu lelei i Apia i le 1895, leai se a’oga mo tamaiti uma, leai ni masini tinei-mu, leai ni auala savali lelei, ae lima faamasinoga sa i ai e su’esu’e ai solitulafono tau le faaoo-lima.

I le 1889-o le faamatalaga lenei a Sir Rober Stout e faasino i Apia: “O le ala autu pe afai ou te faamatalaina-e faataamilo solo i le matafaga e le atoa lona lapotopoto-ma e eseese lava lona lautele mai le sefulu futu i le fa-sefulu futu, pe o le luasefulu futu le fua faatatau e laugatasia ai. O le ituala i tai o le auala, e tele ni uafu laiti o loo i ai, o isi vaega o loo tutū ai fale. O isi lava vaega, e leai ni fale o i le itu i le uafu. O fale o i luga o le auala e mafuli lava if ale papalagi e fausia i la’au ma e fai o latou taualuga.

E le tele ni faleoloa e ato i ‘apa. E lau-tetele poletito o isi fale. O faitoto’a ma faamalama o isi fale e matala, a’o isi e i ai faitoto’a vane ma faamalama. Ae ui o lea, sa manino mai le i ai o se tulaga auiluma tau le fausia o fale a’o faagasolo le 1890. O le 1890 na faatu ai se komiti o se Fale Tele e fai ai fonotaga, i lalo o le ta’ita’iga a le Ta’ita’ifono o Misimoa poo Harry Moors ma lē na suitulaga ia te ia  o Robert Louis Stevenson poo Tusitala. O le fanua sa lisi mai le Ala o le Tivoli poo le Tivoli Road i le ala i Falealili poo le Falealili Street-pe tusa lea ma le 150 iata mai le Ala i Luga o le Sami poo le Beach Road-ma o le na fausia lea Fale Tele mo Fonotaga o Mr. Bahn, ae faatupe i saofaga a tagata lautele.

O totonu o lea Fale e leai ni teuga, ae sa avea lava ma totonugalemu o soo se sauniga faitele i Apia, nofoaga o fonotaga mo Komiti Faatonu a Konesula, sa fai ai se A’oga o le Gagana Peretania ma sa faaaogaina foi mo sauniga-lotu ao faagasolo le fausia o le Falesa i Matafele. Sa mulimuli ane ona faaleagaina lenei Fale ma tuu ai loa i lalo i le 1960. E le’i umi se taimi talu ona faavae-ae faatupe loa e le Fono o le Eleele Sa le fausia o se fale o le Malo i Mulinuu i le 1891-e tuu-faatasi ai le Maota o le Peresetene ma Ofisa o le Malo.

O lenei fale sa faafesaga’i ma le Maa Faamanatu o Siamani ma sa tusia le ata ma faafoe e Mr. J.S. Walker, le Tusiata a le Malo. Ona nofoia loa lea e le Faamasino Sili le fale e soso’o ai- lea na fau mo Brandeis i le 1887, ae se’e  i Motootua i le 1894-lea na fausia ai e Mr.A.A.Willis se fale fogafale lua na te faaaogaina i luga o le maupu’epu’e i tua ane o le fale tuai o Mr. Weber i Motootua. O lenei fale na toe si’i atu i Si’usega ma sa faaaoga mo le Aoga a Tusitala poo le Robert Louis Stevenson, ae sui atu i ai le maota o le Faamasino Sili o lena taimi-sa i Motootua.

FN
By Fuimaono Na'oia Fasavalu Touli F. Tupua, 19 August 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?