Tala faasolopito o Samoa mai le amataga

13 January 2016

Tapena ma Tuufaatasi e Fuimaono Na’oia Fasavalu Touli F. Tupua mo le Samoa Observer.

 

Ina ua mae’a ona faailoa faalaua’itele e Mataafa ma isi tamalii e faapea o le a latou tausisia folafolaga uma na o latou faia, sa faitau loa e le Konesula Siamanai o Rose, i le avea ma sui auai sinia o le Komiti a Konesula, lana saunoaga autu, e faafeiloa’i atu ai i lo latou toe taliu manuia mai i Samoa.

“O le faamoemoe e tasi o i latou uma ua potopoto mai iinei, o ana upu faai’u ia, “ia avea le toe taliu manuia mai o le Afioga a Mataafa ma isi sui o Alii ma Faipule o le a faamaonia ai se faamanuiaga tele mo le atunuu o Samoa ma ona tagata uma o nonofo ai, tagata mai fafo ma tagata Samoa āuliuli. 

Ae peita’i, e le’i mautu lelei lona afio ai i Mulinuu, ae toe pa mai loa le alaga-“Ia avea Mataafa ma o matou Tupu”! Ma o lea na toe talosagaina ai loa le Faamasino Sili ina ia atofa se aso e fai ai se palota.

O le vaega toatele o tagata Samoa ua matua tula’i mai e lagolago lenei alii matua o lo latou atunuu; ma ua na o ia lava e talitonu i ai. O le tali na aumai, fai mai-“E le mafai ona fai lena mea.”

“Ua tapu Mataafa e faavavau”.

O le feagaiga na ia sainia e lē mafai ai ona toe fai sea tulaga” Ae afai e silasila toto’a i lea feagaiga, talu mai le tuumalo o Malietoa Laupepa, e tele suiga ua i ai. e matua leai lava se mea e ono taofia ai Mataafa mai lona avea ma Tupu o Samoa, poo le faapea fo’i, poo le a lava le tulaga e o’o i ai, sa’o pe sese, o le loto lea o i latou uma sa lagolagoina Mataafa. Sa tumau pea ona lagolagoina le faamoemoe o Mataafa e lana uo pele, o le alii papalagi o Mr. H.J.Moors poo Misimoa, o se tagata Amerika lelei lea e pei lava o Tusitala poo Stevenson, i la’ua ia sa matua lagolagoina le finauga a Mataafa, ae le faaalia ni o la manatu.

ADVERTISEMENT

A fono ina filifilia se Tupu fou, e matua leai se faaletonu o Mataafa; ae ina ia alofia le ono le toe tula’i mai o nisi feteenaiga, sa faatu atu loa e Misimoa le aveeseina o le tulaga tau Tupu. Na malie i ai Mataafa i le tonu a Misimoa; ona e leai sona faamoemoe e fia Tupu, se’ia vagana ai lona naunau mo se filemu ma le fiafia o ona tagata. Peitai, e lē ioe i ai tagata Samoa; latou te manana’o lava i se Tupu, ma o le agaga i lea taimi e peiseai e mafuli lava ia Mataafa, ona e leai lava se isi tagata ua aliali mai, ma o lea na malie ai loa Mataafa ona o le mana’o o tagata. 

O le a tatou se’e mai loa i le tusi ta’uta’ua na tusi e le Faamasino Sili o Chambers e ave ia Misimoa. 

Faamasinoga Sili o Samoa

Apia, Samoa, Oketopa aso 5, 1898.

Lau Susuga Misimoa

O lau tusitusiga o le aso 3 na tuuina mai ia te a’u ananafi, ma sa faitauina i ni taimi se tele ma le fiafia.

E sa’o a oe ua o’o mai ia te a’u nisi o tala’ave, e ui lava ina sa ‘ou taumafai e tu’uese. O ia tala’ave ua pei lava o le timu e pa’ū i le tua o le pato, ma ua vave ona toe mou atu e pei ona o’o mai. O le mea moni, ua tele na’ua o’u taimi e ta’u ai i tagata e leai sa’u mea e fai i le Alii o Mataafa, ona o loo ia te ia lea lava  aia tatau e tasi e pei lava o isi tagata Samoa uma, e mafai ai ona avea ma tupu, ma afai e filifilia o ia e tagata e soso’o ma Malietoa i le faiga e tatau ma talafeagai ai, “e tusa ai ma tulafono ma aganuu a Samoa,” aisea e lē mafai ai ona ia umia lea tulaga? 

Ae o le itu i ana gaoioiga, e leai sa’u upu e fai atu i lea itu; o le mataupu patino lena a Konesula.

O lou faamaoni,

W.L. Chambers.

13 January 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?