Fa’asifo le Ola-toe-fuata’ina

PM
By Pai Mulitalo Ale, 06 June 2016

Na matua tulaga-‘ese le silasila a le afe ma afe sa maimoaina fa’afiafiaga o le Sisigafu’a o lenei tausaga i le Malae Ta’alo i Tuana’imato, ina ua fa’ai’ui’u fa’afiafiaga a le Vaega o le Ola-toe-fuata’ina mai Tafa’igata, i le fa’atinoina lea o sa latou fa’ato’esega fa’alaua’itele mo le atunu’u, e ala i se ifoga.  

O se taimi fa’amomoiloto tele mo le ‘Au-vala’aulia fa’apea le atunu’u sa ‘auai, ina ua va’aia i latou o lo’o nofosala i le to’ese i Tafa’igata, a’o punonou e ifo ma fa’ato’ese mai fa’apea i le atunu’u aoao. 

Na ta’ua e le so’o-‘upu a le Vaega o Falepuipui ma ‘Au’aunaga Toefuata’ina a Samoa, le Susuga a Sagaga Galu Frost, ua latou fa’aaogaina le avanoa lea, e fa’ato’ese atu ai pagota uma, i le atunu’u aoao.

“Ua fa’amanu’alia finagalo o le atunu’u, e to’atele fo’i e le o fiafia ona o aga ma amioga a nisi o pagota ae maise ua ta’uvalea ma fa’aleagaina la latou ‘au’aunaga i le pulega ma le va’aia lelei o falepuipui,” o le fa’aaliga lea a Sagaga.

Na ta’ua, sa latou uia lava ala-o-mea e pei ona masani ai, se fa’atagana mai le Ali’i Komesina ae maise le Afioga a le Ali’i Minisita, mo se avanoa e fa’atinoina ai sa latou fa’ato’esega fa’alaua’itele i le atunu’u ae maise i latou sa a’afia ona o a latou fa’atinoga ma mea fo’i sa mafatia ai, ona o pagota.

“Ua ‘ou va’ai ua tele lava se suiga; ma ‘ou te tatalo, ia o’o-o’o ifo i loto, o mafaufau ma agaga o latou nei se agaga salamo ona o a latou fa’atinoga ma mea sa fai, ua tiga ai isi tagata o le atunu’u ona o latou,”

Na fesiligia Sagaga i ni finagalo fa’aalia o le atunu’u e uiga i fa’afiafiaga ma le ifoga a pagota, ae saunoa, e to’atele lava le mamalu o le atunu’u ua f’a’ao’o atu le agaga fa’afetai ma le agaga fiafia, ona o le mata’ina o fa’afiafiaga a le Vaega o le Olatoefuata’ina.

‘O se lagona fa’amomoiloto mo matou uma, le ‘Aufaigaluega talu ai, e leai se manatu o le a tali mai fa’apea le malo e pei ona va’aia i lea aso.

ADVERTISEMENT

Na ta’ua fo’i e Sagaga, na matua o’otia lava lona loto ina ua afifio atu sui e to’alua o le palemene, e talia le ifoga a sui-aupito matutua o le Vaega a le Olatoefuata’ina.  

“O le tali mai a le atunu’u, lea na fa’aalia i lea lava aso, na iloa ai lava le talia aloa’ia o le ifoga sa fa’atino e le Olatoefuata’ina.” 

Na ta’ua fo’i, e 150 pagota sa iai i le ‘Aufa’afiafia fa’atasi ma nisi o leoleo ma ofisa sa ‘auai fa’atasi i le fa’afiafiaga o le fu’a.

O le toniga atoa sa fa’atupeina lava e tupe-teu a pagota mo vala’aulia fa’apenei ae maise lava pe a fa’afiafia ma ‘auai i mea-tetele fa’apea.

Na ta’ua fo’i, e silia i le tolu-afe tala ($3000.00) le seleni na latou maua mai le alofa ma le agalelei o le atunu’u i le taimi na fa’atino a latou fa’afiafiaga e ‘ese mai le tolu-afe tala ($3,000.00) o le siaki-tupe mai le malo.

O tupe uma ia, ua tonu i le pulega ma le ‘aufaigaluega o le fa’atino ai se aso fa’apitoa o ta’aloga mo pagota uma i le to’ese. 

O le avanoa lea e fa’ailoa atu ai ia latou uma, o lo’o manatua pea ma aloa’ia i latou e le atunu’u aoao, ma ia aoga mea ua tutupu i o latou olaga e toe fuata’ina ai le soifua i le lumana’i.

Na fa’afetaia e Sagaga le Komiti o le Sisigafu’a ona o le vala’aulia fa’apea sa tu’uina atu, ua maua ai le avanoa e fa’afiafia ai i le fa’amanatuina o le 54 Tausaga o le Tuto’atasi o Samoa.

E momoli fa’apitoa le fa’afetai i le Ao Mamalu o le Malo, le Afioga a Tui Atua Tupua Tamasese ‘Efi, le Afioga a le Ali’i Palemia, le Susuga a Tuila’epa Sa’ilele Malielegaoi ma Sui o le Palemene, ona o le talia fa’atamali’i o la latou ifoga. 

E le fa’agaloina fo’i le lagolago a le atunu’u aoao, i talosaga fai-fai-pea aua se suiga lelei mo latou ma e tatalo fo’i, ia avea le ifoga sa faia, o se a’oa’oga aoga mo latou o lo’o fa’aauau pea ona taumafai e soli le tulafono.

PM
By Pai Mulitalo Ale, 06 June 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?