Alo le Siteki a Apia Ogatotonu e fa’atāua Tu ma Aganu’u Fa’aSamoa

IL
By Ilia L. Likou, 06 June 2016

O le afiafi o le Aso Faraile talu ai – i le vaiaso o le Fa’amanatuina o le 54 Tausaga o le Tuto’atasi o Samoa, na fa’amae’a ai se fa’aaliga o tu ma aganu’u fa’aSamoa a le Siteki a Apia Ogatotonu, o le Ekalesia A Iesu Keriso o le ‘Au Pa’ia O Aso e Gata Ai, e ala i se Fiafia o le Tutoto’atasi na fa’a’Autuina “O le Po Fa’aleAganu’u”.

O le polokalame i le vaiaso atoa, sa aofia ai se ‘ava o le feiloa’iga, o le savali i le Sisigafu’a, o ta’aloga fa’aSamoa, o le Savali ma le Fa’aaliga Tausala, o le Fa’aaliga o le Gaseseina o Taumafa Fa’aSamoa, o le taua’aoina o meaalofa fa’aleAganu’u fa’apea le Tauvaga a Tausala ma Manaia.

Na fa’aalia e le Peresetene o Jason Joseph, o se vaiaso sa fa’atumuina i le fiafia ma le ‘oli’oli o sui o le Siteki, ae maise o le agaga fa’ananau e ‘auai ma tauva fa’asamasamanoa i ta’aloga ma fa’afiafiaga ‘ese’ese e maua ai le fealofaniga o sui ta’itasi uma ae maise ia saga fiafia fa’atasi ai ma le atunu’u i le fa’amanatuina o le Tuto’atasi i lenei tausaga. 

ADVERTISEMENT

 “O le fa’amoemoe ‘autu lava o lenei vaiaso, o le tu’u-fa’atasia lea o sui uma o le Siteki, ia o-mai fa’atasi e opogi fiafia o so’o se fuafuaga a’o se fa’amoemoe lelei, e lagolagoina ai galuega a le Ekalesia mo Le Atua ma Lona finagalo,” o lana saunoaga lea.

“E le tāua na’ua le taimi e fa’atino ai o so’o se mea, a’o le taimi umi sa tatou fa’aalu fa’atasi e galulue fa’atasi ai mo le lumana’i, e le gata i le ta’ita’iga o Ekalesia ae fa’apena fo’i le malo, i o tatou aiga ma nu’u ta’itasi.

“O nisi o tama’ita’i lalelei nei, ua fa’au’uina i tikeri ma fa’ailoga maualulua tauLoia ma tulaga Tau-Pisinisi mai Iunivesete, o isi o lo’o a’o’oga pea i le taimi nei, o nisi fo’i ua foufou e fa’alauteleina a latou a’oa’oga i le BYU ma isi iunivesete i fafo.   

 “Ia te a’u lava ia, o se fa’ata’ita’iga lelei tele, le avea o latou nei e fai ma ta’iala, e ta’imua i mea lelei ina ia mulimuli ma fa’ata’ita’i uma iai isi tupulaga ma fanau a le Ekalesia e mulimuli mai.” 

Na saunoa fo’i le Sui o le To’afitugafulu, le Faife’au Toea’ina o Meli’ula Fata, e fa’amamafa le taua o tu ma aganu’u masani i totonu o aiga-Samoa ta’itasi. “O le fa’avae mautu lea o o tatou aiga, e tumau ai pea i le fealofani ma le feavata’i po’o fea lava tatou te iai, ma tatou fa’afetaia ai le sa’olotoga ua tatou ‘ae’ae ai nei, lea sa finauina ma asa mai e tua’a ma matua ua ta’o’oto mai malae,” o lana saunoaga lea. 

“E ao ai lava ona tatou mitamita ma taofi-mau i la ta aganu’u ma tautua le Finagalo o Iesu Keriso – le malo e tasi tatou te maua ai fiafia e fa’avavau.

Na fa’afetaia fo’i e le Peresetene o Joseph, sui uma o le Siteki, o uo ma aiga ma ‘aumea-mamae sa lagolagoina fa’atinoga uma ma tapenaga i le vaiaso atoa. O le ulua’i tausaga lenei ua fa’atinoina ai se Vaiaso o le Aganu’u e le Siteki a Apia Ogatotonu ma o le a avea o se fa’amoemoe e fa’atinoina i tausaga ta’itasi.  

IL
By Ilia L. Likou, 06 June 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?