Lauga - “O le toasā o le Atua i ē sauā.”

RP
By Rev. Petaia Setu, 30 September 2018

(Iakopo. 5 : 1 – 6 )

E lē nāmalelāina lo’u sauā i alo ma fanau a le atunuu, i le tolusefulu tausaga ua mavae i le auaunaga faafaiaoga. 

O loo sāūa pea i le faalogo e o’o mai i lenei vaitau, le faalagiga, na ou faalogo ai i nisi o fanau a Samoa i Kalefonia, sa matou feiiloai ai i le lua sefulu tausaga ua mavae, O Petaia sauā? Poo fesili foi i le amataga o le masina nei, Ua uma le sauā o le tou faifeau? Ae fai mai le ulutala o le Iakopo lea e 5, O le to’asā o le Atua i ē sauā.

O le ata lea o loo vaai iai le aposetolo nei, o le faataugaina o le tagata mativa ma lima vaivai, e le au mau mea ma ē o loo saofafa’i mai i tofiga maualuluga ma taualoa. 

O le olaga ma pulega soona fai, ua matuā faasāolo ai ma lē gata ai ina le iloa le va, a ua matuā leai lava se alofa. O i latou tonu ia, ua fofola atu i ai e Iakopo le to’asa ma le faamasinoga a le Atua. 

O tiga ogaoga ma leaga matautia o le a sasaina ai e le Atua, e faatitino lava i mea ua faasilisili ma pele ia i latou, o lo latou oa lea. 

Fai mai Iakopo, ua pala au tou oloa, ua ’atia e mogamoga. 

Ua elea a outou mea taugata ma fe’ilafi o loo outou faamemelo ai. E sautia ma pologā; e matafi ma eloeloā. 

O foliga na, na te faamatalaina ia foi ituaiga tagata, i lo latou sauā ma lo latou ma’ema’eā. Ma o’o ai ina le mafai ona natia I o latou tino le toasa ma le faamasinoga a le Atua.

Samoa, o le mea sili lea ona tiga ai le finagalo o le Atua, o lou ta’alo’alo i le afu ma le ola o le isi tagata. 

O lou vaai faatauvaa i le tagata o loo faamoemoe iai le ola o le toalua ma le fanau; faalagolago iai mātua ma le aiga; tagata o loo faatinoina le mamafa o galuega i le vevela o le la, e oo lava i le maulu i le sami ma sigo i lugā! 

E le o punitia le lagi i le silafaga ati a le Atua. Latou ia ua faaputu, faaputu, ma faapea ane, Tatou aai ma feinu ma fiafia; ae faapea mai le Atua, ia outou fetagisi ma uiō. Aisea? 

O le sauā lea e faamasinoina e le Atua. O le sauā lea e inoino iai le Atua. Ua faatau fanua ma fai taavale i le afu o le vale. 

Ua fai solo teugatupe i faletupe o atunuu eseese i fafo, ae ola fālōlō le atunuu ma valiano! Ua le masino le mau auala su’e tupe e pu’e ai le faasoa a le mativa. 

ADVERTISEMENT

Ae a siligia e le mativa ua aligaliga foliga o le tiapolo i le ita! Ua fetosoaiina   i le olaga tuinanau. E fa’i o le malo ma faalapotopotoga, a o ekalesia ma faifeau. 

Ua suamalie i isi le gamble i tupe o le lotu ma taulaga a tagata; a o se tautua lotu o loo faananau mo le faatupuina o faamanuiaga ma le soifua faaleagaga.

Samoa, o le telē ia o le mea lea e misi ia tatou. 

O sauaga uma, e oo lava i le faatonutonuina o amio ma olaga o a tatou fanau, ua faatulafonoina e Samoa ma i’u ai lava i le falepuipui. 

A o le sauā lea e matuā tiga ai le finagalo o le Atua, lea o loo sasao faaafi i a tatou pulega faale malo, faalapotopotoga ma ekalesia, e matuā ’ela ai lava  le vaai a la tatou tulafono. 

O le fesili, Aisea? A o Samoa e tumutumu le Atua. E totonugalemu i le Atua. E faavae i le Atua! Pe ona o tatou, e law breaker le law maker?

O lo’u sauā sa faamatalaina, e le o le su’ea o so’u lelei poo so’u viiga poo ni a’u mea mai alo ma fanau o le atunuu. A o le gagauina o le amio le popoi ma le ola le pulea sa aumai e nisi o fanau. 

Ina ia le pisia ma aafia ai le toatele sa aoaoina mai i se siosiomaga lelei. Ia liliuina le leaga i le lelei; o le loto maaa i le usitai; o le pouliuli i le malamalama; o le inosia ma le faalumaina i le ta’uleleia. 

Peitai o le toasa o lo tatou Atua, ina ua tatou sauā ma fasioti i ē ua vaivai ma amiolelei; o ē, tiga lava ona soona fai iai faiga a le poto ma le mau mea, ae gūgū lava e le faasaga tau mai (f.6.). Samoa, o le agasala le sauā ona o le tuinanau. 

Ua le mā’ona le mana’o, ua lē popole ai i le ola o le isi tagata, ma saga fa’inaelo ai pea i le tagata mativa. 

Outou o ē malolosi, o mai i lalo e pei o la Paulo: Na ou faapei o se Iutaia ia Iutaia, ina ia ou maua ni Iutaia; ua ou faapei o se le nofo i le tulafono, i ē ua le nofo i le tulafono; ina ia ou maua ni e ua le nofo I le tulafono; ua ou faapei o se vaivai I e ua vaivai, ina ia ou maua ni ē ua vaivai. 

(I Korinito 9:20-22)  Ia avea oe ma mea uma mo tagata uma, ina ia i’u lava ina ola nisi ia te oe. Oka, se manaia o lea loto!

Uso e, o le sauā o le Atua i lona nuu, ina ia salamō Isaraelu ma liliu ese mai le leaga, ae foi i le Atua e maua ai le ola ma faamanuiaga. O le sauā ia ola, ae le o le faamo’amo’a. Auā, e toasā le Atua i ē sauā faale alofa.

Amene.

 

E-mail: [email protected]

7737063

RP
By Rev. Petaia Setu, 30 September 2018

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?