“Tumau i la tatou Tautinoga ia Keriso”

PS
By Petaia Setu, 05 June 2016

O le kiriti (creed) ua fai ma mau poo le talitonuga faakerisiano e faapea : “Ou te talitonu lava i le Atua le Tamā e ona le mana uma lava. O lē na faia le lagi ma le lalolagi.

Ou te talitonu foi ia Iesu Keriso o lona Alo lava e toatasi ma lo tatou Alii, o le na faatupuina e le Agaga Paia. Na fanau mai lava e Maria le taupou. Na faasauāina e Ponotio Pilato, na faasatauroina, na maliu, na falelauasi.

Na ia afio ifo i Hetesi. Na toe tu mai lava i lona po tolu. Na ia afio a’e i le lagi, o loo afio mai ai lava o ia i le aao taumatau o le Atua le Tamā e ona le mana uma lava.....”O le tautinoga ua fau mai i le talitonuga  i le Iesu Keriso, na ositaulaga i lona tino ma lona toto mo le faamagaloina o a tatou agasala. Ua faapea mai le tusitala nei, “ia tatou taofi mau i le faamomoe ua tatou tautino atu.”

Ua uma ona maliu Iesu. O lona maliu o le tatalina lea o le ala i le fesilafaiga ma le Atua. Auā  foi o lo tatou ala i le lagi, o le Keriso faasatauroina. O lo tatou faatuatuaga lea. Fai mai le fautuaga a le aposetolo nei, Ia taofi mau ai i le tautinoga o lo tatou faatuatua.

O lona uiga, e le tatau lava ona tatou toe o ese ai mai lo tatou talitonuga. O le tiute lea o le tagata faatuatua, ia maua’a, ma ia taofi mau i le moni o lona talitonuga ma lona faatuatuaga.

Samoa, ua le moemoenoa le alii o lenei lalolagi. Ua anoanoai auala a le fili e taumafai ai e talepe ma faaumatia lo tatou faamoemoe mautinoa na tatala e le Atua e ala ia Iesu Keriso. Auā ua le atoatoa le soifua o Iesu pe ana le maliu.

E le atoatoa foi lona maliu pe a leai se toe tu. E le mafai foi ona atoatoa le toe tu pe a le toe foi le Alii i lona mamalu. O le mamalu lava lea faatasi ma le Tamā. I le manatu la o le tusitala o le Eperu, ia le faamata’uina lo tatou faatuatua e se malosi ese, a ia taofiofi mamau i lo tatou talitonuga e mautinoa o iai le ola, e ola ai pea lava pea.

Samoa, ua iai le amio ua faailoa mai tatou te tutumau ai i le mea moni – aua le fefoifoia’i. O le fefoifoia’i, o le lē mautonu lea. E femoumoua’i. E ola masalosalo. O ona faiva e fai lē mautinoa. O le taimi ua iinei, o le taimi foi ua iinā. Fai mai Iesu, “Tou te le mafaia ona auauna i le Atua atoa ma mamone” (Mat. 6 : 24).

O le mamone, o le tupe poo le oa. O le tagata e fefoifoiai lona olaga, ua i le vanu o le ata o le oti. Ua toe toe lava a palasi atu i lima o le alii o lenei lalolagi. ’A ua e tautino loa e te alu ia Iesu, alu loa. Savali ma le faamaoni i lau tautinoga.

Alu ma le loto faatuatua ua e saoloto i le mafutaga ma le Atua. Aua le faalotolotolua (Luk. 9 :59 – 62) Aua le palaai (Isaia. 40 : 10) Fai mai le tusitala o le tusi nei i tagata Eperu ua oo iai le tala o le toe tu, “E faamaoni o ia ua folafola mai” Ioe, e leai se pepelo i lona fofoga; e leai foi se faa’ole’ole i lona loto.

O Ia lava lea Samoa, na o ia lava, na saeluaina ai le ie puipui o le malumalu i lona maliu i luga i le satauro. O le faailoga lena o le avanoa o tagata uma e ulu atu i le Paia o le Atua Silisili sa punitia e le ie puipui.

Samoa e, o le masoe ma le tuimomomoina o le tino o Iesu i luga o le satauro, ua mafai ai e tagata uma ona iloa atu le Atua. Ua avanoa ai oe ma a’u ona oo atu i le mafutaga poo le fesilafaiga ma le Atua.

ADVERTISEMENT

Samoa e, tu mautinoa; ‘aua le tu taumālua solo. E le toe iai se isi taulaga . Ua uma ona saunia e Iesu Keriso le taulaga mo agasala uma. E le toe manaomia se isi mea. O lou tiute, ia talia ma le loto salamō, ma taofi mau i lou talitonuga ua tautino atu i lau amio ma lou ola o aso uma.

Ia e mataala Samoa, “ona o lē ua fai outou mona fili , o le tiapolo foi lea, o loo fealualua’i o ia e pei o se leona tagi, ua saili se tasi e ‘aina e ia. Ia outou tetee atu ia te ia, ma ia mausalī outou i le faatuatua...”(I Pet. 5 : 8 -9).

‘Aua ne’i seetia oe i le mălū o le tai taeao. Ua e masani i le apa memea ma le sumepalo. E taalili vale ma soona tagitagi, ae lipi se mea o iai. Vaai sa’o oe i le Alii o le toe tu. Faailoa i lau fanau ma lou aiga. Auā e faamaoni le ua folafola mai.

O ia na toe tu manumalo mai i le oti ma le tuugamau. Ua faamanatu pea lava e le au faatuatua i tausaga uma (le Eseta) ma aso uma e talisua ai. O lona uiga o le talitonuga o aso uma. O le mau faifai pea o le olaga. O ai na te liliuina? A o ai na te taofia? Po ua le atofaina ea e le Atua o aso ma taimi ua finagalo lava ia iai?

Lou atunuu e, inā tatalo ia ma taofi mau i le faamoemoe ua tatou talitonuina ma tautinoina, “auā e toatele o e faasesē na o atu i le lalolagi, o ē le tautino ua maliu mai Iesu Keriso i le tino; o  le faasesē lava lea ma le anetikeriso”(2 Ioane. 7).

Ioe, ua atagia i totonu o aiga. Ua alia’e i aoga ma falefaigaluega. Ua leotetele i totonu o faalapotopotoga ma lotu; o le malo foi ma le ekalesia! Uso e, se ā se mea e taofi e oe i lou loto? Pe faapefea ona e tautino atu le faaolataga i tagata pe afai e fefoifoiai lou olaga?

E faapefea ona e fai mai e te talia Iesu Keriso pe afai e te teena le Eseta? Po ua le nanea ea le soifua o le Alo o le Atua na ositaulaga ai mo lou faaolaina? Samoa, manatua le upu a Pilato i faifeau pepelo, ‘O le mea ua ou tusia, ua tusia lava’(Ioane. 19 : 22)

O fuafuaga paia a le Atua, o lona finagalo lava lea. Na ala ai ona tauave toatasi e Iesu Keriso o tatou leaga ma fasia i luga o le satauro, ina ia le fano se tasi e talitonu ma faatuatua ia te ia, a ia maua e ia le ola e faavavau (Ioane. 3 :16) O le faamanatu Samoa,

Ou te talitonu i le Atua le Tamā....

Ou te talitonu ia Iesu Keriso....

Ou te talitonu i le Agaga Paia....

O la’u tautinoga lenā. Inā tatou taofi mau ia i le faamoemoe ua tatou tautino atu ma le lē fefoifoia’i; auā e faamaoni o ia ua folafola mai.

Amene

E-mail: [email protected]

7737063/7783782

PS
By Petaia Setu, 05 June 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?