O LA’U TALA FO’I

05 June 2016

1. Matauina i Tala Fou se ulutala fai mai o se “Unaiga Faa-Tamalii mo se Kapeteni loto maulalo”-ma o lea ulutala-e faafino i le Kapeteni o le Manu Samoa Ta’ito’afitu-o Falemiga Selesele.

O lea la unaiga-o le faae’eina atu lea o le suafa matai o “Toleafoa”o le afioaga o Satupa’itea- ia Falemiga Seleele- le Kapeteni o le Manu Samoa Ta’ito’afitu-a’o lei toe malaga ese atu le Manu Samoa-talu ai nei.Ia afai o le tofā lea ua a’e i le paia o Tamalii ma Failauga o Satupa’itea-ia-o se faaeaea lea e lē lau maua –ae ua mafua-ona o le tautua a Toleafoa i le atunuu atoa e ala i Taaloga.

Ia-o lea foi ua toe alo faiva le Manu Samoa-ma e i ai le faamoemoe-o le a lagona e le ‘au atoa a le Manu Samoa Taito’afitu lea faaeaea-ona matua sagai ane lea e tau le taua aua Samoa atoa lea e tapua’i atu ma tatalo! O le a sou taofi?

2. Matauina foi i Tala Fou fai mai o lea o loo fai suesuega a Leoleo e uiga i se fusuaga-ma o lea la fusuaga-fai mai o se misa lea a ni alii talavou o Taufusi-ma e faapea na maliu ai se isi alii talavou.

E ui la ina leai ni faamatalaga se tele mai Leoleo e uiga i lea faalavelave-ae ua faamaonia fai mai o le Aso Faraile talu ai na tupu ai lea faalavelave.

Fai mai le Ofisa o Leoleo o lea alii ua maliu na fasi e ni alii talavou se to’atolu- ia ua uma ona pu’e e Leoleo ma taofia- e faatali ai le aso e tula’i ai i luma o le Faamasinoga! Ia-a tatou tilotilo la i nei mea o loo tutupu mai-e aliali mai e matua leai lava se faiga e mafai ai e aiga o nei alii talavou -ona taofia i latou i totonu o aiga-mai le aafia so’o i nei faalavelave!

ADVERTISEMENT

Afai la ua maliu ai se tasi-o lona uiga- o i latou nei o loo aafia ai-e ono mafai ona falepuipui. Ma afai la e leai se aoga o ia faasalaga mo i latou-o lona uiga- e toe fai fo’i-talu ai le faatamala o matua poo aiga foi e faasino i ai nei fanau.

A tatou tilotilo la i le Falepuipui i aso nei-o le upu moni lava-“ua matua tumu saisai” –aua ua le gata ina faato’ateleina  pagota tama-ae ua faapena foi ona faatoateleina pagota tamaitai-ae le o se mea lea e masani ai. Afai la ua suamalie ia i latou ona nonofo i le falepuipui-o le mea mautinoa la- e na ona magalo mai lava-ona toe fai foi lea o nisi solitulafono-e toe foi ai i Tafaigata! O le a sou taofi?

3. Matauina le felanulanua’i o ata na pu’e mo le faamanatuina o le 54 tausaga o le Malo Tuto’atasi o Samoa-ma e ui lava ina ua mavae atu-ae atonu tatou te matauina lava le anoano o mea -aemaise ai lava o mea na tutupu i le amataga -ona o le fia maua e matua ua mavae atu –se malo e pulea lava e tagata o Samoa!

Ia o lea ua sui le nofoaga na faamanatu ai le Tuto’atasi talu ai nei-aua ua leai se mea e tasi o totoe i Tiafau le Malae o le Atunuu! Ua leai se fale e tasi o i ai-vagana ai tulaga o fale sa i ai muamua!

E o’o lava i le Maota Afolau Samoa o le Palemene ua uma ona tala ese! Sa fai mai faaupuga e na ona tala ese -ona toe fai lea o se fale Samoa fou-ae o lea lava ua leai.

O la’au o le Fale Fono Samoa tuai lea sa i ai-sa la’u ane ma teu i le Ofisa tuai o le Fono- lea foi ua uma ona tala i lalo-ona o le faaupuga fai mai e toe fai lava le Fale Fono Samoa tuai. I le taimi nei la-e leai lava se mea o faia-ma ua le iloa pe o ai ua na aveina laau tuai sa faaputu o le Fale Fono tuai.

Afai latou tatou te fesili pe o fea na aumai ai laau na fau ai se Fale Fono Samoa tuai lea ua tala i lalo- o le tali- “o laau uma ia na ta mai Savaii-ona avane lea ua lafo i le Vaitafe o le Mali’oli’o i Samalaeulu-ona aumai lea e lona taetafe lea e a’e ane i gatai o Saleimoa, ona o atu lea o nai toeaiina i tulula-tau alo ma tatoso mai i Mulinuu i lalo o Pulu tetele-e fau ai le Fale Fono Samoa tuai.

O silasila la i le fita o le galuega na fai e matua ona o le naunau ia faatu lava lona Maota Fono i Tiafau o le Malae o le Faautuga-tagi a Samoa! O le a le uiga o le upu “faautu-ga-tagi”?

O le tali-o le malae na masa’a ai le toto ma loimata o tatou matua-ona o le naunau ia tulai mai lona Malo Tutoatasi- e pulea lava e tagata Samoa! Aisea la na tala ai fua i lalo le Fale Fono Samoa tuai? Ia-o lea ua tala i lalo-toe tala i lalo ma le fale Fono o le 1972-ae o faamanatu le 54 Tausaga o le Tuto’atasi i le Malae Taalo! O le a la sou taofi?

05 June 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?