O la’u tala fo’i

17 August 2016

1.Matauina i Tala Fou le anoano o sauaga ua tulai mai totonu o Samoa i aso nei. O nisi o sauaga e faasaga i tina a’o isi e faasaga i nai fanau teine laiti.

A tatou tilotilo la i le faateteleina pea o nei sauaga mata’utia-o le fesili la e ono tula’i-“Faamata e i ai se mea ua sasi poo ua faaletonu ai Samoa pe a fua i le tula’i mai o nei faiga mata’utia ma le mataga-ae sa leai se tulaga mata’utia faapenei i aso ua mavae?

O le pogai la o nei faafitauli uma-e pogai mai lo tatou lafoa’i o le Atua ma lona finagalo! Afai la ua faateteleina-o ai la e tatau ona faia se fuafuaga e titina ai ia mate? E fai e ta’ita’i o le malo-ta’ita’i o ekelesia poo ta’ita’i o le atunuu? Afai la tatou te le o manatu mamafa i nei faafitauli-o le fesili-o ai la ia o loo sili ona afaina ai? O le tali-o tagata e sili ona afaina ai -o outou alo teine ma ni a matou fanau! Afai la o se faafitauli maoa’e lenei ua tulai ma i o tatou taimi-a tuu ai lava la le faiga o se vaifofo se’i o mai nisi taitai i le lumana’i e fai? O le a sou taofi? 

2.Matauina foi i Tala Fou le matua faafiafiaina o Tamā uma o Samoa-ona o lo latou Aso Faapitoa…..! O ai a le fiafia pe a vaai atu i le fanau ua o mai faatasi e mafuta i lea aso faapitoa e pei ona masani ai a’o iti?

ADVERTISEMENT

O le taua la o lea aso-o le toe faamaopoopoina lea o le fanau ma latou fanau aemaise ai o le aiga atoa. Poo ai lava la na mafaufauina ma taulamua i lenei fuafuaga-o le tatalo-ia faamanuia atu le Atua ia te ia-talu ai-o le aganuu a Samoa e faamuamua e le matai lona aiga-ae o le aiga e taulamua i le siitia o le tulaga o le matai.O lea la ua i ai le Aso o Tama-ua ai foi le Aso o Tina ma le Aso o le Fanau poo le Lotu Tamaiti! Ia-o le a le leaga pe afai e mafuli a tatou fuafuaga uma i mea e manuia ai o tatou tagata lautele? O le a sou taofi?

3. Ua matauina foi i Tala Fou-e ui ina tele tala e fiafia ai-ae sili atu foi ona tele tala e popole ma faanoanoa ai. Afai la e mafua lea itu ona o le taofi-“E o faatasi lava mea lelei ma mea leaga…”ae a tatou tilotilo lelei i le faagasologa o mea o loo tutupu mai totonu o le atunuu-e peiseai e mafuli lava le tele o mea i mea leaga! Ua tatou faitau so’o i le gaoi ma le talepe fale-ua tatou faitau so’o i pagota e sosola i tua mai le falepuipui-ma toe fai isi soligatulafono……..!

Ae a tuufaatasi na mea uma-toe faaopoopo i ai ma feusuaiga solitulafono ie e fai i fanau teine laiti ma le sauaina o tina-ua lava ma totoe lena e faamaonia-ua matua taavilivili lava Samoa i totonu o le afi ma le teiŏ.

Afai la o lea-o lona uiga la-o le ituaiga o foma’i tatou te manaomia ina ia fo’ia ai lea faafitauli-o le foma’i o le tino-agaga ma le mafaufau! O lona uiga la- e le aoga i ai se fomai o le lalolagi nei-se’ia vagana ai le Foma’i o foma’i o loo faavae a’i le Malo Tuto’atasi o Samoa-na te silafia lelei loto ma agaga o tagata uma! O le a la sou taofi? 

4. Fai le isi ulutala o Tala Fou ua toe maua foi isi paipa e ula ai fualaau faasaina i totonu o Samoa! O le molimau la a lea Tala Fou e tusa ai ma le Matagaluega o Leoleo-o le faafitauli lenei ua avea ma mataupu tele ma le maoa’e i totonu o Samoa…..! Afai la o lea-e le tioa a leaga mafaufau o isi tagata pe a fua i solitulafono o loo latou faia! Ae afai la o mautinoa afioaga ma alalafaga o maua ai ia fualaau faasaina e faaaoga i ai paia e pei ona maua-faamata o le a se finagalo o lea afioaga poo le alalafaga?

O latou silafia aiga ma tagata o faia lenei solitulafono? Faamata e le o le itu tonu lenei e tatau ai ona fesoasoani mai nuu ma afioaga i taumafaiga a Leoleo- ina ia fo’ia lenei faafitauli? A silasila la i le matuiā o solitulafono ua vaaia nei i totonu o le atunuu-o le fesili-faamata e le o vailaau nei ua pogai ai ona le fefefe tagata e fai nei soligatulafono? O le a sou taofi?

17 August 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?