O LA’U TALA FO’I

22 July 2016

1. Matauina i Tala Fou se ulutala fai mai-“O loo matagofie pea Samoa”ma o lea la ulutala e peiseai e faasino i se faalavelave na tupu i se ulugalii Papalagi mai Ausetalia- e faapea na o mai e tafafao i Samoa nei  i le 2015-ae toso ai faamalosi e se pagota na solo i tua lea tamaitai ae saisai lona to’alua.

O lea la faalavelave na matua faalumaina ai le suafa o Samoa i le lalolagi atoa-ae matua ese lava le tali a le Palemia e uiga i lea mataupu-ma e peseai ua na otegia ai sia tamaitai ma fai mai o le ‘alu fua i le nofoaga sese……., ma o lea la tali ua salalau i le lalolagi atoa-ma e aliali mai ai- e le o kea le Palemia o Samoa i lea faalavelave ua faalumaina ai le suafa o Samoa! Afai la ua fai mai le ulutala-“O loo manaia lava Samoa”-o le fesili-o le a le mea o loo manaia ai pea Samoa?

O se manaia lea o Samoa o le ta-toso faamalosi e pagota ma tagata leaga tagata e tafafao mai i Samoa? Afai la e moni le faaupuga a le Palemia e ‘faalagolago tele le tamaoaiga o Samoa i le Alamanuia Tau Turisi-o le a le pogai ua le mafai ai ona fai se faiga lelei e taofi ai nei pagota i totonu o le falepuipui?

O fea le faitau miliona ma miliona o tupe o loo faaune mai nei ae totogi e le atunuu-ae le o faia se Falepuipui lelei e matua saisai ai nei tagata leaga ma le faalumaluma atunuu? Afai e le o lelei ona vaai le Falepuipui mo le saogalemu o le atunuu ma tagata mai fafo-toe sui le pulega i ni tagata e mafai ona faatinoina lea galuega mo le saogalemu o le atunuu-ae soia le faamaumauina o tupe o le afu maligi o le atunuu! O le a sou taofi?

ADVERTISEMENT

2. Matauina foi i Tala Fou se ulutala fai mai ua nofosala le pagota lea na ia osofa’ia se tina i Fale’ula-i le taumafai e fasioti lea tina. Fai mai o loo feagai foi lea pagota ma se moliaga tau le faa-auupegaina o ia i se auupega mata’utia-ma o lea o le a faasalaina ai o ia i le masina fou….!

Afai la e moni ma faamaoni nei tala fou uma-o lona uiga la-“ua matua lamatia lava le atunuu atoa i nei ituaiga o pagota. Ma afai la e leai se fuafuaga a le Malo mo lenei faafitauli-ma ua le mafai lava ona maua se tupe e fau ai se Falepuipui Tele Faa-ona-po nei-faamata la e le lelei loa ona ave nei pagota i se motu tuufua e faasala ai?

Atonu e lelei se fuafuaga faapena-ma afai lava ua fia oti le pagota ia-ona aau lava lea i le mea e fia alu i ai-ma a osofa’i ai lava e se i’a fe’ai ma uma ai-ua uma foi lea ma le popole o le atunuu! O le a sou taofi?

3. Matauina i Tala Fou se ulutala fai mai –“Ua faamalosia e Saina le Lakapi a Samoa”-ma o lea ua vaaia ai le ata o le Palemia o Tuilaepa ma le Amapasa o Saina i Samoa-lea o loo ona taulimaina se ‘ofu taalo o le Manu Samoa!

O loo faaalia ai foi ma le faata’ita’iga o le faaaogaina o masini e fai ai koleniga a le Manu Samoa! O le vaaiga la ua tula’i mai-o soo se mea lava e o’o i le lakapi-o Saina lava lea e peiseai ua faamoemoe foi i ai le Iuni Lakapi a Samoa! Ma afai la o le tulaga lea o le a faaauau ai pea-ia manatua la o le tele lava o le aumai-o le tele foi lena o le mafai e nei Saina ona fai soo se mea e loto ai-i totonu o Samoa! I le taimi nei-o lea o lo pisaŏ le aufaipisinisi a le atunuu ona o le tele o faleoloa o tagata Asia i Samoa nei.

Ua le gata i le Taulaga i Apia- ae o lea foi ua salalau atu i nuu i tua. Afai la e fesili pe ua mafua isea lea tulaga-o le tali-“Leaga o Saina lava lea e tapa i ai le Malo mo soo se mea e o’o lava i le Lakapi a Samoa.

Afai la ae faatetele lea faiga-ia manatua lelei la-e le o ni vale tagata Saina- e fa’i o tagata maoa’e i le faipisinisi-ae matua sili atu foi ona maoa’e a latou fuafuaga mo le lumana’i! O ai na iloa pe mautu uma loa pisinisi a Saina i Samoa nei-liliu ane loa faato’a ma eleele uma faale-aganuu a Samoa? O le a sou taofi?

22 July 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?