SAMOA-IA E MA’ELEGA I LE OLA

24 July 2016

Faafetai i le pule faa-soifua a le Atua, ua na aumaia lo outou soifua ma so matou ola i lenei aso fou i le manuia. E leai se loto e fai pe ana feulu feulu lona finagalo tua i le soifua o Samoa.

O le mea lea, e ui lava ina uma sula, ae le uma lona alofa ma lona faamaoni, ae tau ia o se mea e iloga ai lo tatou loto faafetai, ona o le matalasi ma silisili ese o lona agalelei.

O le viiga lea ma le faane’etaga I le Atua Soifua- e amata atu nei lava, se’ia o’o i le faavavau, faavavau lava. Ae alo maia-o le talanoaga masani foi lenei ma le mamalu o le ‘aufaitau o lenei nusipepa, aemaise ai le mamalu o le atunuu, o loo fiafia pea e silasila ma faitau i lenei tusitusiga i aso ta’itasi.

Ae pei lava ona faamanatu atu- e leai se agaga o lenei tusitusiga e faatonu le atunuu pe faaoloataua; e leai foi se manatu ia usui le tofa ma le moe; pe faatilotilo masae; aua o le tofi o le tagata soifua, o le sese.

Ae ua na o se tautua mafaufau lava e faataatia atu i ou tafatafa ma le faamoemoe, o le a fono tauati ai lagona ma faamoemoe o le ‘aufaitau; aemaise ai foi o ni manatu faaalia, e uiga i le faafoeina o le Malo o le atunuu.

O lenei la tusitusiga, o se taumafaiga lea e faaalia ai manatu i faafitauli o loo tatou feagai ai nei, ae maualafia ai ni outou finagalo faaalia i soo se mataupu tou te silafia, o loo lape pe o faaletonu ai le faafoeina o lo tatou atunuu.

E leai ni uo a le nusipepa, ae pau lava ana uo ma aumea mamae, o tagata lautele; poo i latou ia e mafai ona fesoasoani mai i le matafaioi a le nusipepa, o le puipuia lea o aia tatau a tagata uma o le atunuu- e ala i o latou finagalo faaalia i totonu o le nusipepa.

O le autu la o lenei tusitusiga-“Ia ma’elega i le ola,” o lona uiga-ia matua faatauaina le ola o tagata. O le uiga o le upu ‘ma’elega’-ia naunau i le ola. E naunau e a i le ola?Leaga o le ola, o le mea a le Atua.

O le ala foi lena na lē tuua ai e le Atua lona Alo e to’atasi, ae tuuina mai ina ia maliu ma faalava’au ma ia maua tele ai lava le ola atali. Tatou te iloa i lenei ulutala, le naunau ma le ma’elega o le Atua i le ola o le tagata; o Ia na aumaia le ola; o Ia foi na togiolaina le ola o le tagata ina ia maua atili ai lava.

O lona uiga la, e matua taua tele i le Atua le ola o le tagata, e pine i mea na ia faia mo le manuia o le tagata.E leai foi se mea e tasi na fai e le Atua, mo le manuia o le tagata e leaga.

ADVERTISEMENT

O lona fingalo, o le puna o le ma’elega mo le manuia o tagata uma, Na ia aumai le ola- toe togiola-toe tausi mai lea lava ola i aso uma lava. O le finagalo la o le Atua mo le tagata-“ia ma’elega i le ola; ma ia faapelepele i le ola.

O le faapelepele ma le naunau i le ola, o le tausi lea o le ola ma ia faamuamua le maua o le ola.Ola fiafia, ola manuia i soo se itu.

O faapefea la tatou? E faapefea ona tatou maua le ma’elega i le ola pe afai e leai se mea e tasi o tua i ai le ola?E faapefea ona faataua e tagata o latou ola, pe afai e le o ma’elega le Malo i le ola o tagata?

O le mea faigata lea ua tupu nei i  le atunuu, ua naunau tagata i le ola ma le fia ola, ae ua punipuni uma punavai o le ola. A saili atu ua fiaola ona o le taugata o le tau o le soifuaga, eletise ma mea uma, ae pau lava le tali-‘ola ai pea faapena’.

A saili atu foi mo se faamāmā avega i le tau o le eletise ma taumafa, ae atili ai ona tasi’i i luga le tau o le eletise ma oloa uma e tua i ai le atunuu, ae le mafaufau i le tele o tupe a le atunuu na maumau i faiga pi’opi’o a le Malo ma faiga faatautala a tagata faigaluega o le Malo.

Ua matua leai se punavai e ono maua ai se lavea’i, leaga ua saili tupe a le Malo i ola o le atunuu.Ua o’o le sailiga fesoasoani a le atunuu i le Lagi, ae ua leai lava ni ua o faamanuiaga, e lē ona o le Atua, a’o faiga pi’opi’o ma le faatautala o i latou o loo faafoeina le Malo.

Ua matua naunau lava le atunuu i le ola, ae na o le ‘ola-a-moamoa’ i aso uma.Ua lutia le atunuu i soo se faafitauli, ua na o le vaai atu ma le manumanu i fanau ma ‘alu’alu-toto, ua faa-pologa e pei o ni asini tufi popo i lea aso ma lea aso, talu ai le ma’elega i le ola o latou aiga.

Ua gaoi ma talepe fale fanau a’o laiti lava; ma ua amata o latou olaga i le falepuipui, ona ua lē ma’elega le Malo- ua saili ona manuia i ola o tagata a ua le kea i ola o tagata.

Aisea ua ola faatalale ai le toatele o le atunuu? Ua fiu e fai lona ma’elega, ae le o ma’elega Ta’ita’i o le atunuu i lona ola.Ua fiu e galulue ma tautua- ae leai se fua aliali o le ma’elega o ona ta’ita’i i o latou ola. E tasi pe lava le ala e manuia ai tagata-pe ana ma’elega le Malo e fai mea uma mo le manuia o tagata.

Afai o le finagalo o le Atua ia tatou ma’elega i le ola, o ai la o le a le fia ola lelei? Ae faapefea ona ola lelei pe afai e le loto i ai le Malo?

E le iloa le manuia o se atunuu i le fai o lea mea ma lea mea, ae faatoa iloa le manuia o se atunuu pe a ma’elega tagata e sailia auala uma, e le gata ina maua mai ai mea mo le tausiga o le aiga, ae ia soifua ai fo’i tagata i se atunuu e ma’elega mo le soifua filemu o tagata uma, i soo se itu.

A ma’elega i le ola, ia ola sa’oloto tagata uma e tusa ai ma lana aia tatau.

O le ola faamalieina, e maua i le sa’oloto o tagata i faamanuiaga lelei uma, ma faaalia o latou manatu i le faiga e ao ina faafoe ai lona Malo.

24 July 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investigative articles.

Ready to signup?