O le tiute a le tina o le fanau

AL
By Aruna Lolani, 14 May 2017

E tele lava tiute a se tina i totonu o se aiga.

I lo’u iloa iai, o le tina o le poutu o se aiga.

O le manatu fa’aalia lea o le tina ia Marie Ma’aseia Tinou mai Tuana’i ma Nono’a Sale’imoa ina ua fai lana fa’atalatalanoaga ma le Fofoga o Samoa.

E 84 le matua o le soifua o lenei tinā ma e to’aiva lana fanau, 29 le fanau a lana fanau ae 18 fanau a le fanau a lana fanau.

“E tele a suiga ua iai i lenei vaitaimi i le tiute fa’atinā ae o lo’u a ia talitonuga, o le tiute a ia o le tinā o le fanau,” o lana tala lea.

 “I lo’u iloa iai, o le tina o ia lea e fa’apolokalameina mea e tatau ona fai i totonu o se aiga fa’apea fo’i le fanau ae o le tamā a ia e tele ona tiute fa’aletamā e fai.”

“Ae o le tina a ia, o lana galuega o le va’aiga o le fanau, o le fa’atonuina o le fanau i so’o se mea na te faia.”

“E tele a’u galuega sa fai mo lo’u aiga a’o o’u talavou. Pei o a’u a ia ou te tu malosi i lo’u aiga ae o le tama e alu a o ia e faigaluega. Ou te fa’atonu i la’u fanau e fai lea feau ma lea feau e atia’e ai a le matou aiga, ma fa’amalosi ‘au fo’i ia te i latou aua le aoga.”

“E o’o mai a i le taimi lenei e le vaivai le fa’atonu ma e le vaivai fo’i le sasa i lo’u tiute fa’atina, ae ta’ilo ai i isi tina.” 

ADVERTISEMENT

“E leai ma sesi o la’u fanau e fa’aletonu. O a’u e pa’u ai le mamafa o le ma’ua aiga.”

“Sa ou galue lava a’u ia ma lo’u fa’amaoni ma lo’u loto naunau e aua ne’i ola fa’alolo la’u fanau pe ola mana’ona’o fo’i.”

“Lea la ua o’o mai i le taimi nei, lea ua matou inu a matou ia matou galuega.”

Sa ta’ua fo’i e Marie o lana ia galuega lea sa fai fa’atasi ma le tama o le aiga ae le’i maliu, o le tausi aiga.

“E lelei a le ma mafutaga ma lo’u to’alua sa iai, e le’i fa’ao’o lima o ia ia te a’u pei o le tele o isi mafutaga i nei vaitaimi.”

“Ae peita’i ua tele a suiga i lenei vaitaimi.”

“Ua tau le toe fa’alogo le fanau i matua, pei ua fai a le loto a le tamaitiiti.” 

“A’o aso la, tasi a le upu i le fanau, ona fai laia.”

“E eseese a tina; o lesi tina e fa’avi’ivi’i le faiga o lana fanau a’o lesi tina e fa’atonu le fanau aua le faiga o fe’au ma galuega aua se latou lumana’i.”

“O le vaitaimi lenei, ua alu a le tina ae ti’ai le fanau. Ua alu a o ia i mea ia e fiafia iai.” 

“O le mea fo’i lea ua tele ai fa’alavelave ua tutupu mai aua ua le atoatoa le tina e va’ai lona tiute fai.”

Sa va’aia lava foliga fiafia o Marie i le tulaga manuia o lona aiga ua iai nei ma sa ia fa’apea mai, “o le meaalofa lelei a lea o le fanau ma o latou lava lea e galue aua se mea’ai mo a’u i aso uma.”

AL
By Aruna Lolani, 14 May 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?