Fa’amanatu e Samoa le 54 tausaga o le Tuto’atasi

LT
By Lanuola Tusani Tupufia, 02 June 2016

Na tu’u-tu’u la’au mai ma folau, na taunu’u e fa’ailo le fa’aaloalo ma to-manatu i tua’a ua tofafa i malae, ma alo fiafia loa e fa’amanatu.

E selau ma selau na potopoto i le Malae Ta’alo i Tuana’imato ananafi e fa’amanatu le 54 Tausaga o le Malo Tuto’atasi o Samoa.

O le Ao Mamalu o le Malo o Samoa, Lana Afioga Tui Atua Tupua Tamasese ‘Efi ma le Masiofo o Filifilia fa’apea le Palemia o le Atunu’u, le Susuga a Tuila’epa Sa’ilele Malilegaoi sa fa’afeiloa’ia malo fa’aaloalogia ma le atunu’u aoao sa ‘auai. 

O le Ulu o Tokelau, le Faipule o Afega Gaualofa, o le Kovana o Amerika Samoa, o Lolo Moliga, o le Peresetene o Tahiti (Farani Polenesia) o Tagaloa Edouard Fritch, o Faipule ma Sui o Malo ma Fa’alapotopotoga mai fafo, nisi o malo fa’aaloalogia sa ‘auai. 

O sauniga uma o le fa’amanatuina o le Tuto’atasi i lenei tausaga, sa faia i le Malae Ta’alo i Tuana’imato, ae le o Malae o Tiafau i Mulinu’u e pei ona masani ai i tausaga ua mavae. 

O le Sui o le Fono a Sui Tofia, le Afioga a Tuimaleali’ifano Va’aleto’a Sualauvi II, na lafo iai le fa’aaloalo na te sisiina ai le tagavai o le atunu’u.

A’o fa’atino lea sauniga, sa tutula’i fifilemu le atunu’u e fa’ailo le fa’aeaea ma le fa’afetai ona o le finau maua’i a ta’ita’i ma tua’a ua tofafa i malae, ona o le tofa tu’u-mamao ma le fa’autaga loloto aua se sa’olotoga o le atunu’u. 

ADVERTISEMENT

E luasefulu ma le tasi ua-fana sa fa’apapaina a’o sisi a’e le tagavai o le sa’olotoga ma lagiina le vi’i o le fu’a e le Fa’aili a le Matagaluega o Leoleo.  

Na malele le Ao Mamalu o le Malo, i le fita o le folauga sa feagai ma tua’a i le silia i le selau tausaga talu ai, e fa’amautuina le sa’olotoga o Samoa. 

“Sa maumaututu lo latou finagalo, a le tutu-mau mo se manuia o Samoa – o le a le toe maua lava e o’o i le fa’avavau,” o le malelega lea a le Ao Mamalu. 

 “Sa talitonu maumaututu, e vale-tu’ulima lo latou mau ia Samoa – la tatou fa’aSamoa, o le a mou ma le toe maua. Ua tatou potopoto fa’atasi i lenei aso, le Aso 01 o Iuni, ia tatou manatua ma fa’amanatu fiafia le manuia o lo latou finau maua’i i mea e patino ia tatou uma. 

“Ua tatou fa’amanatu le 54 tausaga talu ona tatou fa’afoe le atunu’u; i le mafai lea ona finau e taofi mau pea ia Samoa, lo tatou tupu’aga, a tatou tu ma aganu’u, la tatou gagana, fanua, le sami ma le faiga fa’aMatai.” 

Na tu’u manino mai fo’i e Tui Atua, ona o se atunu’u e mitamita i le talitonuga “E fa’avae Samoa i le Atua”, ua mafai ai ona  tatou taunu’u i le aso, ona o fa’amanuiaga mai Le Atua. 

 “O le avea o se atunu’u tuto’atasi, ua tatou fa’ailoa atu ai i le lalolagi, le mafai lava ona tatou soifua fifilemu ma manuia Samoa uma; ma e fa’avae lava mea uma i le fa’aKerisiano ma le sa’olotoga i ‘upu-fai a malo ae salani i tulafono ma le fa’amasinoga amiotonu,” o le malelega lea a Tui Atua. 

Na fa’aopopo mai fo’i, o le fa’amanatuga, e manatua ai tua’a ma matua ua fai-i-lagi le folauga.

“Tatou fa’amanatu ma manatua a’oa’oga mai la latou folauga. Ma ia tatou manatua i o tatou mafaufau, tino ma agaga, o le ‘autu o le manuia o so’o se folauga, o le fa’atuatua lea ma le loto-maulalo.” 

E silia i le fasefulu matagaluega ma fa’alapotopotoga ‘ese’ese a le malo, o fa’alapotopotoga tuma’oti, o a’oga tulagalua, a’oga maualuluga fa’apea iunivesete sa ‘auai i le savali fa’aaloalo i le taeao ananafi.

Sa faia fo’i fa’afiafiaga e nisi o fa’alapotopotoga ma a’oga mai Savai’i, Amerika Samoa fa’apea tumua nei.

LT
By Lanuola Tusani Tupufia, 02 June 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investigative articles.

Ready to signup?