“Ou te fa’alagolago lava a’u i a te a’u.”

PM
By Pai Mulitalo Ale, 07 September 2016

O Vaiaso Tafa o se taule’ale’a e 41 tausaga o lona soifua o le afio’aga o Solosolo. 

E  le’i fai sona aiga, e le’o faigaluega fo’i ae o lo’o ia faia le galuega o le tausi aiga. 

Na maua le avanoa o le Fofoga o Samoa e fa’atalanoa ai Vaiaso a’o aga’i ane ai i tai i le ‘a’ai ma lana amoga popo i le aso ananafi.

“Ia o la’u masani lava lea e fai i aso uma, o le asia lea o la’u ma’umaga,” Vaiaso Tafa.

Na ta’ua e Vaiaso, e leai se tasi o lona aiga e fa’amoemoe i ai i le tausiga o lona aiga, e fa’amoemoe lava ia i a te ia. 

E tusa lava po’o le a le to’atele o lona aiga o lo’o aumau i atunu’u mamao, e fa’amoemoe lava i lona malosi aua le galueaina o lana ma’umaga lea o lo’o tua i ai le aiga i aso uma.

“Pau lava le faigātā o lo’o feagai ai nei ma a’u i la’u ma’umaga o meatuāolō.

“O le tele lava o aiga e leai ni sai pua’a, a ō ese lava la ma le sai ia se’iloga lava e fa’alalo e isi aiga fa’ato’a toe amanaia foi lea e lena aiga a latou meatuāolō. 

“E i ai nisi o nu’u ma afio’aga e fa’amalosia ai le tulafono e fa’asāina ai meatuāolō ona ta’aloa ma e tatau lava ona tu’u i se sai ona o le manumanuga lava i meatoto. 

ADVERTISEMENT

“O se tasi lea o fa’afitauli tele o lo’o feagai ai nei ma le aufaifa’ato’aga, aua o le isi faifa’ato’aga e oso a le augatā ona o meatuāolō. 

“O le taimi lenei o lo’o taumafai  e  fausiaina  se pa ina ia mafai ona puipuia ai la’u ma’umaga mai meatuāolō, peita’i o tupe lava e fa’atino ai mea uma, ae o aiga lava fo’i i fafo e fa’alagolago i ai.

“E i ai le tulāfono a la latou afio’aga aepeita’i e le’o fa’amalosia.

 “Ia e fai mailei pua’a ae atoa lava le ono masina e leai se pua’a e maua ai.

O le a sou silafia i le mafua’aga e mafua ai le mativa?

“O lo’o i ai lava tatou fanua tatou te galulue ai, e ala lava ona tatou matitiva ona o le lē galulue.

“E tatau ona fa’amalosia tatou tagata e faato’a fanua ma fai ma’umaga aua le tausiaina o aiga, nu’u ma Ekalesia. 

“E moni e fesoasoani mai aiga mai fafō ae o le fesoasoani lea e mo’omia pe ā tilotilo aga’i le lumana’i - o le fa’ateleina o atina’e e maua ai ni tupe māmā.

O lea sou tāofi i le faigatā o le olaga lea feāgai ma nisi o lo’o alala i nu’u i tua?

“E leai se mea o faigatā ai le soifuaga i totonu lava ia o lo’u nu’u.

“E pau lava le faigatā o lo’o feagai ma a’u i le taimi lenei o le leai o se fesoasoani, se tasi e fa’amalosi’au i a te a’u aua le atina’eina o le aiga.

PM
By Pai Mulitalo Ale, 07 September 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?