Fa’asala se sui-fa’atu i le faia o ta’utinoga-sese

LT
By Lanuola Tusani Tupufia, 04 May 2016

Ua fa’amaonia nei ma fa’asalaina se tasi o sui-tauva i Faiga Palota Tele talu ai, o Ofoia Nomeneta Ofoia, ona o le faia o ni ta’utinoga sese i le Ofisa o le Komesina o Faiga Palota. 

O ananafi na fa’asalaina ai Ofoia e le Fa’amasino o le Fa’amasinoga Maualuga, o Vaepule Vaemoa Va’ai.

Na ioeina lava e le sui-fa’atu mai le Itumalo o Va’a o Fonoti ona moliaga e pei ona molia ai e le Ofisa o Faiga Palota. 

O le masina o Fepuari, na tu’uina atu ai e Ofoia lana talosaga (e ala i le Pepa Fa’atumu) i le Ofisa o Faiga Palota, lea sa ia faia ai se ta’utinoga sese fa’apea e leai ni ona moliaga ma ni  fa’asalaina sa faia muamua e le fa’amasinoga.  

O le Sui Komesina o Faiga Palota, o le Loia fa’amaoni fo’i, o Faimalomatumua Mathew Lemisio sa fai ma sui o le Ofisa Fai Palota i le Fa’amasinoga Fa’aItumalo. 

Sa ia fa’ailoa i le Fa’amasinoga, e le’i fa’ailoaina e Ofoia ona moliaga muamua, ina ua na sainia Lana Pepa Fa’atumu,  o Talosaga a Sui-Fa’atutu mo Faiga Palota. 

O le taimi lea na fa’atoa tu’uina atu ai e le Faipule o le Itumalo o lo’o iai nei, o Tialavea Seigafolava, ni ata o ripoti a Leoleo, i le Ofisa o Faiga Palota ma fa’atoa latou iloa ai lea fa’aletonu. 

“I le ripoti lea, o lo’o fa’amauina ai moliaga e lua o le na molia,” o le fa’aaliga lea a Faimalo.

“O le moliaga muamua, o se faia lea o ni saunoaga tau-fa’amata’u ma sa fa’asalaina ai i le $80.00 e le Fa’amasino Fesoasoani.

ADVERTISEMENT

“O le moliaga lona lua, o le fa’ao’o-lima lea, na fa’amaonia ma fa’asalaina ai e le Fa’amasinoga Maualuga ia Tesema o le 2015.”

Ae le’i tu’uina mai e le Fa’amasino fa’asalaga o Ofoia, sa ia tu’u iai le avanoa e saunoa ai e uiga i lea mata’upu.

Na ta’ua e le tama lea e to’alima ona alo, e ‘ese lona fa’auigaina o le ta’utinoga ma le tulafono. 

“O lo’u iloa i le vaega lea, sa ‘ou fa’apea a’u o moliaga lea e fa’asino ia latou sa fa’asala e soloatoa i le falepuipui,” o le tali lea a Ofoia. 

“Fa’atoa ‘ou malamalama lava ina ua fa’afeso’ota’i atu a’u e le Ofisa o Faiga Palota ma ‘ou sa’ilia ai loa se loia e fa’amata mai ia a’u le tulaga lea…ae ‘ou te le te’ena le tulaga lea (fa’apea ua ‘ou faia se ta’utinoga sese), lea ua ‘ou malamalama ma ua ‘ou talia fo’i.” 

Peita’i e le i fa’amalieina lana Afioga a le Fa’amasino.

“O le lē-malamalama lelei e le o se tali e ‘alofaga i ai,” o le fa’aaliga lea a le Fa’amasino.

“O lau susuga o se su’etusi, e le o se tasi e le’i a’oa’oina lelei – ma e le afaina lava po’o le a le  tomai sa a’oa’oina ai.

“E iai le mafuaga na faia ai e le Ofisa o Faiga Palota pepa nei, e va’ava’ai lelei ai i sui-fa’atutu,  ia taofia ai i latou e iai soliga-tulafono muamua, mai le tauva ai i faiga-palota.” 

Na fa’aopopo mai fo’i Vaepule, ua ioeina e le ua molia ona moliaga ma fa’atonuina ai loa, e totogi le $800.00 o lona fa’asalaga.

O le le-faia o lea fa’atonuga, e nofo-sala ai i le falepuipui mo le ono masina.

LT
By Lanuola Tusani Tupufia, 04 May 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?