Lele-malie le ti’a, Fofoga Fetalai

PM
By Pai Mulitalo Ale, 12 April 2016

O le Afioga a le Fofoga o le Fono, o se tamali’i ua fiafia nei ma ua to’amalie. 

O le a fa’aauau pea le Sui Faipule o le Itumalo o A’ana Alofi Numera 1 i Sisifo e tautua i le paea’iga fa’aPalemene, ina ua mae’a se fono a le afio’aga, lea na tasi ai le tofa ma uta, e tu’u-i-tua le talosaga sa faia fa’asaga ia te ia.

O le talosaga sa fa’auluina e ‘Ai’ono Tile Gafa - se tasi o tamali’i sa tauavea le tofi o le Itumalo, na tu’ua’ina ai Le’aupepe i faiga-pi’opi’o fa’apea, sa fa’atino e nisi o lana komiti ni faiga-fa’atosina mo le ‘Au-palota.

O le fono i le aso ananafi, sa ‘auai ai fo’i le Ali’i Palemia, Tuila’epa Sa’ilele Malielegaoi, e suafa fo’i ia ‘Ai’ono i Fasito’o.

Ina ua mae’a le fono a le afio’aga, na fa’aalia ai e ‘Ai’ono Tile lona le-fiafia tele, na mafua ai lava ona fa’aulu o lana tagi. Na ia ta’ua, e mamafa tele ia te ia le lumana’i o le itumalo ona sa ia maua, le tele o suafa sa i le lola-palota, e le o ni tagata Fasito’o.

Na fa’aalia fo’i, o le mafuaga tele lea o lona le-fiafia ma lagona ai, e tatau ona fai iai o se fa’atatau, i le fa’atinoina o pulega-lelei ma faiga-malamalama.  

 “O lo’u popolega tele lea, ona o le fai mai e tagata-‘ese e le o ni tagata o le ‘ele’ele lenei, le lumana’i o le nu’u nei,” o lana fa’aaliga lea. “E ui sa matua faigata ia te a’u lenei mea (faia o se tagi) ae na ‘ou mana’o lava e fa’asa’o le sese lea.” 

Ui lava i lea, na saunoa le La’au-na-fausia, ua na talia le fautuaga mai lona nu’u ma o le a toe-‘ave i tua lana talosaga ananafi lava.

Sa ia fa’amanuia fo’i ma momoli mo’omo’oga lelei mo Le’aupepe, e le gata i le avea ai o se faipule o le Maota, a’o le Fofoga Fetalai fo’i o le Palemene. 

Sa tatalu atu, ina ia ta’ita’i ma le alofa ma ia tumau pea i le fa’atinoina o mea lelei mo tagata uma o le itumalo. 

Na fa’afetaia fo’i e le Ali’i Palemia le susuga a ‘Ai’ona ona o lana fa’ai’uga. 

“Fa’afetai ‘Ai’ono i le tofa, o ‘Oe lava o le toa-fa’amaoni,” o lana saunoaga lea. 

Na ta’ua fo’i e Tuila’epa, e le mafai ‘ona maua se tofa fa’apea pe ‘ana le-maopopo ma malosi le ta’ita’iga a ali’i ma faipule o Fasito’o. 

ADVERTISEMENT

Sa ia fa’afetai ‘Ai’ono, ona o le agaga-lelei ua fa’amagalo ai ma fa’agalo ai futia ua sola, a ua se’e-ane e lagolago le toe-taliu mai o le Sui o le Palemene, lea ua filifilia nei e avea ma Fofoga o le Fono. 

Sa ia fa’afetaia fo’i le fono atoa a ali’i ma faipule fa’apea le Pulenu’u o le afio’aga.

 “O le tofa ua ‘ausia i le aso, o le taunu’u lea o lau galuega tima’i,” o le fa’aaliga lea a Tuila’epa e fa’asino tonu i le Ali’i Pulenu’u o ‘Ape Leusogi ma ta’ita’i matai uma. 

I se talanoaga ma le Fofoga Fetalai o le Maota, na fa’aalia lona fiafia tele ona o le taunu’uga ua iai nei. 

“E lagona lava le agaga-fa’afetai ona ua tasi le tofa ma taunu’u i se taunu’uga lelei.  O ‘Ai’ono o se uso ia te a’u, ma te fai-fai-mea fa’atasi lava i totonu o le nu’u fa’apea fo’i le ekalesia.”

Na ta’ua fo’i e se tasi o suafa o le afio’aga, o Su’a Iosefa e fa’apea, o le taunu’uga o le fono ananafi, o finagalo lava lea o Le Atua.

Na fa’aalia, o le ‘ese’esega na tula’i mai i sui-fa’atutu ia mo le palota, e ono vaeluaina ai lava le nu’u aua, o afioga nei, o ta’ita’i e aloa’ia tele ma maualuluga ma e fa’alagolago uma iai fa’ai’uga fai a le nu’u ma ekalesia. 

I Faiga Palota na mavae atu nei, e 446 palota na maua e ‘Ai’ono ae 570 mo Le’aupepe. 

O le tagi a ‘Ai’ono, e ono iai talosaga ua i luma nei o le Fa’amasinoga i Mulinu’u.

O le vaiaso fou ua fuafua, e amata iloiloina ai ia fa’amasinoga, e aofia ai: :

• Maualaivao Pat Ah Him e fa’asaga ia Faumuina Wayne Fong

• Ale Vena Ale e fa’asaga ia Lealailepule Rimoni Aiafi ma le Ofisa Fai Palota 

• Palusalue Faapo II e fa’asaga ia Leaana Ronnie Posini ma Manualesagalala Enokati Posala

• Anae Misa Pita ma Taefu Lemi

• Lafaitele Patrick fa’asaga i le Faipule Tama’ita’i, o Ali’imalemanu Alofa Tu’u’au.

PM
By Pai Mulitalo Ale, 12 April 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?