Ua lē-fa’amaonia moliaga o Le Tagaloa

LT
By Lanuola Tusani Tupufia, 16 July 2016

O ananafi na fa’aleaogaina ai moliaga fa’asaga i le sa avea muamua ma Minisita o le Kapeneta, o Le Tagaloa Pita, lea sa molia ai e le Ofisa o le Komesina o Faiga Palota.

Na fa’aleaogaina le avea o Le Tagaloa o se sui-tauva mo le Faiga Palota Lautele talu ai, ona sa tu’ua’ia i le faia o ta’utinoga sese e tusa o mana’oga mo monotaga.

Sa tete’e Le Tagaloa i ia moliaga.

O ananafi la, na fa’aleaogaina ai e le Fa’amasino o Vaepule Vaemoa Va’ai, moliaga na fa’asaga ia Le Tagaloa. 

“E leai se fa’amaoniga a-mea na silafia pe na fa’ailoa atu fo’i i le ua molia, e tatau ona fa’atino o le monotaga e pei ona mo’omia ai i le vaega 5 o le Tulafono o Faiga Palota, pe sa fa’amalamalamaina fo’i iai e se tasi po’o se loia, a’o le’i sainia o le ta’utinoga,” o le fa’ai’uga lea a le Fa’amasino.

 “Lea na fa’aalia manino e Le Tagaloa, pe ana malamalama pe na fa’ailoa atu fo’i, le uiga lata-mai o le tautua e pei ona fa’amalamalamaina nei, po’o le taua fo’i o le ta’utinoga, se manu na te le-sainia le ta’utinoga. Ua ‘ou talia lana fa’aaliga ma ‘ou te talitonu la, e le tatau ona fa’asalaina le ua molia nei.” 

“Ua fa’aleaogaina ai e le Fa’amasinoga moliaga na fa’asaga ia te ia.”

O le loia o Seuamuli Sarona Ponifasio sa tula’i mo Le Tagaloa.

ADVERTISEMENT

O le Sui-Komesina o Faiga Palota, o le loia fo’i o Faimalomatumua Mathew Lemisio sa tula’i mo le Ofisa o Faiga Palota. 

Sa lagolagoina lava Le Tagaloa e nisi o ona alo, ina ua tu’uina mai le fa’ai’uga a le Fa’amasino.

Ina ua mae’a lea mata’upu, na fa’aalia le agaga fiafia o le sa avea ma Faipule o le Itumalo o Palauli le Falefa.   

O lo’o mautu lava lona finagalo, o le fa’aopoopoina o le monotaga i le tulafono, ua fete’ena’i tele ma fa’aitu’au.

“I le tatou Fa’avae, e le mafai ona avea se tasi ma Ao o le Malo po’o se sui o le Fono a Sui Tofia, vagana lava ua agava’a e tamo’e o se Faipule,” o lana saunoaga lea.

“Ae afai o le agaga lea na fai ai teuteuga nei, (e ‘ave’esea) ai suafa maualuluga, e tatau la ona otometi le le-‘auai pe fa’amavae fo’i. Peita’i, o lea ‘ou te iloa, e le o le agaga lea ma e fa’aitu’au le iai o le monotaga.” 

Na ta’ua e le Afioga a le Papa mai Sili Savai’i, e le o se mana’oga lea a so’o se tasi e avea ma matai, le fai o se monotaga. 

 “Ina ia avea ma matai, e tatau ona ‘autasi finagalo o suli i le tagata e umia le suafa,” o lana fa’amalamalamaga lea.

“O le monotaga, o se fa’atinoga masani  e fai e matai, ina ia fa’amalieina ai fuafuaga a le nu’u ma o le mafuaga leae fai ai, ae le fa’amalosia.

“’Ou te le’i fa’alogo lava i se nu’u ua fa’asala se tagata e le faia sana monotaga. Ma e le tatau lava ona fa’amalosia, talu ai, ua na o se fa’atinoga, a’o le tautua, e aupito taua atu ma tele ma e tatau i so’o se tasi o se suli po’o se matai fo’i, ona fa’atino.” 

LT
By Lanuola Tusani Tupufia, 16 July 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?