Manatu O Le Fa’atonu - Faaupuga Faauiga-lua? O le mea moni lava lena

MK
By Mata'afa Keni Lesa, 16 July 2016

O se faaupuga mata’utia. Ae peitai-e ao ona faailoa atu o tagata faitio i tulafono tau tapa’a a le malo-o loo faaalia ai sona vaega taua

I le soifuaga nei, e tatau ona tonu i lou mafaufau poo le fea itulagi  o loo e aga i ai. E le mafai ona e uia ni ala se lua aua e ono manu’a leaga ai se tasi. 

I le taimi nei la ina ua mavae ni nai vaiaso, o le tau o oloa taitasi o taumafa autu e pei o le falaoa, suka ma le masima-mai le tele o isi lava oloa ua siitia. O le siitia o le tau  e aofia ai le tau o le tapaa ma le ava malosi-lea na soso’o ai ma le pasia o Tulafono fou Toe Teuteu o le Fua faatatau o Lafoga 2016 i totonu o le Palemene. 

I lea taimi, fai mai le Minisita o Tupe Maua o Tialavae Seinafolava Hunt, o lea faaopoopoga ua tatau ai e taumafai ai ma taofi le taumafaina o taumafa e le soifua maloloina ma sikaleti e ese ai mai lea faitau aofa’i. “Ua faamuamua e le malo le soifua maloloina o ona tagata,” o lana faaaliga lea. “O le mafuaga lenei mo le lafoga faaopoopo i luga o sikaleti, ava malosi ma oloa ia ua tatou iloa e matua aafia i lo latou soifua maloloina.” 

Na faaluaina e le Minisita Lagolago o le Matagaluga a le Palemia, o Peseta Vaifou Tevaga e faapea afai e taugata se oloa, e ono mafai ona una’ia ai tagata e toe fai nisi mafaufauga tau le faatauina o ia oloa. Na ia ta’ua taumafai ina ia faasa le sikaleti ma le taumafaina o le ‘ava malosi. Ia-ua manaia tele lena. Matou te faapea atu e ui lava ina faigata ona folo le isi siitaga i luga atu o le tau o le soifuaga i le taimi nei, ae sa’o foi le manatu o le malo e tusa ai ma le siitia o le fe’au tau le soifua maloloina. 

ADVERTISEMENT

Ae peitai-o loo i ai se lape. I totonu o le manava e tasi, o loo una’ia e le malo le soifua maloloina e ala i le una’ia o tagata e taofi le ulaula ma le inu ‘ava malosi ae i totonu o le isi manava, ua faatinoina ai se mea e matua le talafeagai  lava –e ala i le tatalaina o se fale sikaleti fou i Falelauniu.

 Ona o lea itu, sa finau nisi o Sui Usufono o le Palemene e faapea o le a afaina ai na o tagata e itiiti tupe maua i se tulaga e sili atu-o i latou ia o le a latou faia soo se mea ina ia maua ai sina faapusa Fai mai isi o se faiga e aupito i sili lenei ona leaga-tau faiga faauiga-lua a se faigamalo o loo tauivi e taofi le vaa ia opeopea i luga i se taimi e sili ona lu’itai mo le tamaoaiga. Ae leai, e tusa ai ma le Minisita o Fefaatauaiga, Alamanuia ma le Leipa, o Lautafi Fio Purcell.

“I totonu o soo se atunuu o loo i ai se kamupani Fai Sikaleti, e tumau pea ona i ai lenei finauga e uiga i faalavelave tau le ulaula,” o le faaaliga lea a Lautafi. O le mea moni e faapea o soo se tasi na te ula se sikaleti-tusa lava pe na gaosia iinei pe leai, o le a latou o atu e saili ma faatau. O lona uiga-e pa’ū lava i le filifiliga a le tagata ia. “O le filifiliga e ulaula e lafo lava i le tagata. Tusa lava pe leai se tatou kamupani gaosi tapaa iinei, o le a faatau mai lava e tagata tapaa mai atunuu mamao. Sa leai ni a tatou kamupani faapea i aso ua alu ae sa ulaula lava tagata….e mafua ona o aso nei –ua tele faalauiloa tau le soifua maloloina.” E sa’o Lautafi i se tasi itu se’ia vagata ai le tau o le pepa sikaleti i lena taimi-sa le $12. 

Ae i se tasi itu-talu ai tatou te fefefe i le mea moni ua aumai. E tusa ai ma Lautafi, o le faaiuga ina ia faamaonia le laisene mo se kamupani fai sikaleti lona lua-na faavae i luga o se fuafuaga tau tupe maua. “O loo tilotilo foi le malo i le sailia o tupe maua e ati a’e ai le atunuu,” o lana faaaliga lea. “E maua tupe maua a le malo mai lea fuafuaga faapea foi ma le lafoga faaopoopo.”

Na toe ta’ua e Lautafi e faapea “a itiiti mai-o le a maua mai ai tupe a Samoa.”O le isi faamanuiaga na ia taua o le fuafuaga a le kamupani e faaaoga tapaa e toto i totonu o Samoa, lea ua faaigoaina o le ‘tapa’a’-e gaosi ai lea oloa. 

Fai mai a ia o tagata o le atunuu latou te selesele lea laau e mafai ona latou faatau atu i le kamupani. O le mea lena o loo matou manana’o e una’ia,” o le faaaliga lea a Lautafi. “Matou te mananao e faaaoga a tatou oloa e maua i totonu o le atunuu ae le o le faatuina o se ofisa iinei ae aumai mea mai isi atunuu.” Uso e-e le o se gaoioiga uiga ese lenei a le malo? Ia-o le a tonu lava le fe’au o loo momoli mai iinei? O mamafa ea ia i latou le taofia o tagata mai le ulaula poo mea uma e lua o le siitia o tau o oloa ma le faaiuga ina ia tatala le isi fale sikaleti ina ia maua ai lava se tupe e fai ai isi fuafuaga?

E le o se isi ‘ea lea o faiga uiga ese –o le faamuamua o tupe ma tupe maua i luma o le tulaga pagatia o tagata ma soifuaga e leai se latou sala? Ua matou iloa- e mafai lava e tagata ona tuu le ulaula pe afai latou te le gafatia. Ae peitai-e lelei ona tatou matua faamaoni iinei, o le isi lea kiki i le manava o le tagata mativa ma tagata o le atunuu e sili ona aafia ai-ia ua loa ona pagatia. Ia outou maua Samoa se faaiuga saogalemu o le vaiaso-ma ia faamanuia atu le Atua! 

MK
By Mata'afa Keni Lesa, 16 July 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?