FEFAATAUAIGA FAAVA-0-MALO

FN
By Fuimaono Na’oia Faasavalu Touli F. Tupua, 13 August 2016

Ona o le tulaga totonuga-lemu o Apia i le va ma San Francisco ma Sini, le lautele o lona Taulaga e ui mai ai vaa, lona tulaga i le itu i lona laufanua e mafai ona galueaina, o lona tulaga e avea ai ma totonuga-lemu o se faigamalo faale-aganuu mo Samoa talu mai le 1867-o lea na siitia mai ai Malie i Mulinuu, faatasi ai ma galuega tau fefaatauaiga a le Kamupani o le Godeffroy, o lea na liua ai mai se nofoaga tu-matafaga e avea ma Taulaga taua-e tu’u-taula ai vaa-a’o se taulaiga foi o fefaatauaiga faava-o-malo i totonu o le Pasefika.

Ae ui o lea, o le tulaga faamanuiaina o esetete tau faatoaga a Siamani i totonu o Samoa, na valo’ia lava ina ua faafaigaluegaina i le va o le tonugalemu o le 1860 ma le totonugalemu o le 1880-ona e le talafeagai tagata Samoa- poo e le fia galulue foi i galuega e fia faatino-ma ua atagia ai lava o latou uiga masani i le itu i le galueaina o faatoaga ma fefaatauaiga. Sa faaaoga e le Kamupani a le Godeffroy tupe le taulia a Amerika i Saute, ma faaaoga tagata Samoa i ni faiga sese- e maua ai fanua-e ala i le ofoina atu o ni aitalafu tetele i ni tului maualuga, atoa ma le leaga o le faiga o tagata leipa mai fafo.

O le taofia faamalosi e Farane o ona taulaga mo vaa folau i le Vasa Polatika ao faagasolo le Taua a Farane ma Prussia-na pogai ai ona masofa le kamupani a le Godeffroy Hamburg i le 1875-ma o lea na faaliliu atu ai loa ana meatotino i le Deutache Handel und Plantagen Gesellachaft (DH&PG) i le 1880. Sa faapena foi ona faataape le Kamupani a HM Ruge & Co., o le isi kamupani tele lea a Siamani i totonu o Samoa ma Toga i le 1888.

ADVERTISEMENT

Ua amata nei ona liliu atu le faamuamua a le DH&PG- i le una’ia o pulega faa-malo a Siamani-e ala i le faaoso o le va fetaua’i ma fefaatauaiga a Peretania-ae lagolago le aveina faamalosi o Samoa e Siamani. Ao faagasolo le 1880 ma le 1890, o le pa’ū maulalo o ala masani tau fefaatauaiga i Hamburg ma Valparaiso, le tuputupu a’e sologa lelei o kolone o Ausetalia, le tuua e Theodore Weber o Samoa, le faateleina pea o le leai o ni tupe a le lalolagi, le pa’ū o tau mo oloa mana’omia atoa ai ma le masofa o le fesuiaiga o le aoga o tupe-sa pulea to’atasi e le DG&PG ina ua faatu se faletupe o Peretania i Apia i le 1829, na taunuu ai i se tulaga manuia mo se taimi umi, fai-oloa to’agaogao a Peretania, ae maliu fasia ai le DH&PG.

E le gata i lea, a’o faagasolo le 1890, sa feagai le DH&PG ma faafitauli tau tagata faigaluega, ma le faateleina na’ua o le le galueaina o fanua, ua faamuta le toe totoina o le filo i faatoaga a Siamani, ma ua aafia kolone o Ausetalia i le leai o ni tupe  a le lalolagi, ua faaletonu isi faaeleeleaga tau faatoaga ona ua tula’i mai Taua i le va o tagata Samoa- ma le faama’ia o laau toto, atoa ai ma le taunuu mai i Samoa o isi lava kamupani a Siamani ma faletupe.Ua matua faatama’ia fale o le kamupani a Godeffroy e matagi malolosi o le 1879, ma ua afaina ai falepopo, fale e teu ai le filo ma le faleoloa o oloa si’i-atoa.

E le’i umi ae toe faasaga le kamupani e toe amata ona fau “se fale tele ma le manaia i Sogi, lea ina ua mae’a, sa fuafua loa e avea ma fale e teu ai le filo ma gaosi ai le Sini, e tolu ona fogafale ma sa pule ai loa Mr. Williis. O lea fale ua tala nei i lalo, ae sa avea ma fale tau fefaatauaiga e aupito i sili ona leva i Apia-ma sa faaaogaina e avea ma Ofisa o le Esetete Tausi. Na soso’o le alu ese o Theodore Weber mai Samoa ma le aveeseina o lana esetete i le 1890-lea na avea ma nofoaga i Motootua.

O nisi o i latou na faatauina fasi-fanua o lea esetete o le L.M.S., Kapeteni Hufnagel ma alii o Heidin, Parker, Kruse ma Fabricius, o nisi o i latou sa fuafua loa lava e fau ai ni nai tama’i fale e igoa o Villas e mau ai tagata. O le fale o Weber ma ona fanua i Motootua na faatau e David Parker ma sa faagaoioi  e Mr Stehlin e avea ma “Togalaau o Motootua”(Motootua Gardens) mo tafaoga a tagata o le atunuu ma malolo ai. Sa le’i toe vaaia lea fale ona sa matua faaleagaina i le fefaatauaiga a malo o le lalolagi ma se’e atu ai loa lea fanua e faafesaga’i ma le Ala o Falealili-i le itu i Saute o Motootua, i lalo o le pule a Burns Philp ma toe ati a’e ai.

E ui lava ina pule aoao Siamani i le atiina a’e o faatoaga, ae o le taunuu mai o tagata Peretania, Amerika ma Sekaneteniva ma nonofo i Samoa mai le 1860 ma le faasolo mai i luma, na matua faateleina ai le fefaatauaiga ma le feteena’iga tau upufai o malo-lea na tulai mai ai se taua i le 1889. O nisi o nei tagata fai-pisinisi iloga na taunuu mai i le 1860-o Andrew ma Charles Mc Farland, Samuel Dean, Charles Netzler, August Nelson, Christian Hellesoe, Peter Fabricius ma James Meredith. E o’o mai i le 1880-ua fa kamupani ua latou pulea le vaega tele o fefaatauaiga; e lua Kamupani Siamani o le DH&PG ma le Ruge, Hedemann & Co; Mc Atrhur o Niu Sila ma David Parker mai le Iunaite Setete. 

FN
By Fuimaono Na’oia Faasavalu Touli F. Tupua, 13 August 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?