Faigatā le olaga pe ā le ola taumafai

SS
By Sarafina Sanerivi ma Ilia Likou, 14 October 2016

“E le sologa lelei ai pea aso uma o le soifuaga o lo’o o tatou i ai nei, ae o le malosi lava o le loto e taumafai ai ma finafinau o le a le pine le i’u ma le manuia o so’o se taumafaiga.”

O lea le finagalo fa’aalia o le tamā i a Paula Leilua Muā’au o le afio’aga o Safune, Savai’i.

I le fa’atalatalanoaga ai ma le Fofoga o Samoa i le aso ananafi, na ia fa’ailoa ai o le taimi lenei o lo’o faia ma le tinā o le aiga le fale’aiga mo le Aoga Tulaga Lua i totonu lava o Safune.

O lea pisinisi o lo’o fa’atauina ai , keke pua’a, o panikeke, aisa suamalie,  o le moa ma le alaisa i tau taugofie.

Ua savali nei ma le lua tausaga o fa’atinoina e  Paula ma le tinā o le aiga i a Vala lea pisinisi ma o se fiafiaga tele lea mo i la’ua ona o lea le alagatupe o lo’o fesoasoani tele i le tausia ai o lo la aiga i aso uma.

E le’o gata ai le ola taumafai pea ina ia fa’atelē lea pisinisi, na toe maua e le Fofoga o Samoa o lo’o o la fa’atinoina fo’i elei pe a ma’ea le fale’aiga o lo’o tu’uina atu mo le fanau.

 “Ia o lenei soifuaga e leiloa pe ā fa’afefea ona fai le olaga pe ana na’o le nofonofo lava ae pei e fa’atali ma fa’asi’usi’umata i le isi tagata e sau e galue mo oe.” Le finagalo o Paulo i le Fofoga o Samoa.

 “E tatau lava ona galue malosi ma tu’u atoatoa i ai le taimi ina ia mafai ona e fesoasoani mo lou aiga ma le fanau.

“E le fa’apea na o le ta’oto’oto ae sau le tupe e su’e oe, leai…e ao ona tu i luga ma saili ina ia mafai ona fesoasoani mo le tausiga o aiga.

 “E leai lava se isi e atoatoa se lelei, ma e le fa’apea na feola mai lenei olaga e mauoa ma tele ni a tatou tupe, e tatau ona  galue  ona  va’ai lea i fa’amanuiaga.

ADVERTISEMENT

 “E leai se tulaga fo’i lea  e le galue ae mana’o e sau fa’atagata fa’amanuiaga, leai, o le tagata lava ia a mana’o lava e ola i se olaga pologa, ia o lana ia lava lea filifiliga sa’oloto.

 “E le fa’apea la ua ou fai atu a mea o a’u e tele ni a’u tupe pe mauoa fo’i, o le uiga o la’u tala o le olaga lenei e leai se mea e maua pe a le ola taumafai.

Na ia  fa’ailoa fo’i le le faigofie ai o le amataga o la la’ua pisinisi.

 “Ia sa faigata lava aemaise lava e leai ma se isi o ma’ua na faigaluega i lena taimi, ia sa tele lava tiute na feagai ai e pei o le tausiga o matua aemaise o le fanau.

 “Ina ua to’atolu le fanau ua o’o atu i a’oa’oga, o i’ina sa i ai se manatu e sui mai se isi faiga mai le fa’ato’aga na galulue ai ma le lafu pua’a. 

 “Ia sa le faigofie mai le amataga e pei ona ou fai atu muamua ai, ia ae na taumafai pea.

 “Ia ou te ta’utino atu lava , o le taimi lenei ua faigofie mea uma aua ua tele tupe maua mai i si pisinisi lenei ua o ma fa’atinoina.

 “E talitonu e ese’ese uma lava taleni na aumai e le Atua mo i tatou, ma o la’u tala, a lelei ona fa’aaogaina ia e le taumate le fa’amanuiaina.

 “O lenei pisinisi sa le’i faigofie, e tele ina momoe ua latalata i le tasi i le po pe a uma uma ona tapena vaega nei ia ona toe feala fo’i lea i le 4 i le taeao ae le’i malamalama.

 “Ia ae lagona lava le fiafia e fa’atino vaega uma nei, aua o lo’o tele se alagatupe o lo’o maua mai mo le tausia o le aiga.

 “Aua ua faigata fo’i ona fa’alagolago i nai aiga o lo’o i fafo ona o le tele fo’i o vaega o lo’o feagai ma i latou.

Na ia fautuaina fo’i le to’atele ina ia aua le faitio so’o ae aga’i e galulue.

SS
By Sarafina Sanerivi ma Ilia Likou, 14 October 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?