FALEALUPO:- E tusa ai ma faamaumauga a Alii Papalagi-fai mai o Falealupo e aofia ai nuu o Avatā, Vaotupua, Malaetele, Fuiono ma Fale’ulu-ia e taufai  ta’o’oto  i se faasologa e lē motusia, i ni ituala se lua  i matū sisifo o le tolotolo o Savaii i se vaega e toetoe lava a 3 kilomita. 

O le itu i matū i luga o le papa -o loo taoto ai Fale’ulu, ae o lona pito i sasa’e e tusa ma le tasi le kilomita mai le tolotolo; sa tū ai se fale fogafale lua e tasi o le Ekalesia Katoliko.O le nofoaga lenei sa nofo ai se Patele. O le faasologa o le itu i matū i luga o le ‘a’au e lē matua tele na’ua; ma o soo se nofoaga lava i luga o le matafaga e tau i le tolotolo -o loo i ai ni pou papa o le lava, e ui ina maualalo nisi o ia pou –ae o loo lālā mai i fafo. O le faafeagai ma Fale’ulu i sasa’e e amata ai ona tifa-to i lalo ma gaoa le matafaga. 

O le fitu minute mai le pito i sasa’e o Fale’ulu- e a’e ai le ala savali ma e lilo atoa i ‘amu’amu o le sami. O le isi tolu minute mulimuli ane -e te vaaia ai se ma’a sima e pei o le “Tia o Solia”; lea na fau i luga o le papa i luga o le sami, ae valevalenoa lea nofoaga ma e leai ni laau e ola ai. 

O le ala savali mai Sasa’e  e toe ui i totonu o le vaomatua -ona e taunuu ai lea i se matafaga lapotopoto oneone pa’epa’e ma lona a’au. 

O le tele o toganiu i lenei laufanua ua faamanatu mai ai -sa i ai se nuu i lenei nofoaga; ma o lea nuu e igoa o Fagalele- “o se nofoaga o sulufaiga mo tagata folau e fetaia’i ma le leaga o le Tau ma Uiga o Aso”. 

A maua la e tagata folau lo latou ala faataamilo i le itu i sasa’e o Puava, ona latou maua lea o le malū o le vasa ma ua faasaoina i latou. O le pogai lea o le muagagana-“E lutia i Puava, ae mapu i Fagalele.”Ae o luga foi o lenei lava laueleele, o loo faatali atu ai isi mala mo tagata malaga poo sopo -pe afai e le lelei a latou amio; talu ai- o iinei o loo faatalitali atu ai le aitu o Moso- na te fasioti soo se tagata malaga e fia tofo i lona mata’utia. 

Mai Fagalele i le itu i sasa’e o lea alasopo, e amata ai ona a’e le ala i le maualuga e tusa ma le 100 mita; ma o lea vaega-eleele atoa  -o loo fau ai le anoano o le ‘amu pa’epa’e e faapea- na la’u ane e tagata Samoa i aso ua mavae ina ia faigofie ai ona savalia lea ala. 

O iinei foi o loo si’omia atoa e se vaomatua matagofie o la’au uumi ma o loo ta’oto ai le nuu o Salefe’ē; lea na faavae e Loaloa, ae o lona uso o Tupa’iloa, lea na faavaeina Falealupo. 

A mavae la le itula ma le kuata o e savali pea, ona e taunuu lea i Fagalele, ma le nuu itiiti o Papa; lea e aofia i Sataua.  E ui lava ina tumu i tolotolo papa le itu i sasa’e o Falealupo, ae o loo tuaoi i uta ma se taufusi e lata ane i  se matafaga umi i luga o le sami. 

O lenei nofoaga o loo taoto ai isi nuu o Falealupo ma le itu i sauté; ae le o mamao ese le isi nuu o Tufutafoe -o le laufanua o loo va ai o toganiu uma. 

O iinei la, i le ogatotonu o ia nuu e lua -o loo i ai se papa maulalo ae o le isi ona pito o loo i ai se vaieli e igoa o le Fafā; o le faitoto’a lea i le lalolagi o loo i lalo o le eleele mo “agaga o tagata ua feoti”. O lenei la lalolagi i lalo o le eleele, e igoa o Pulotu, e pule ai Savea Si’uleo, le tupu o aitu ma agaga, faatasi ai ma Tilafaiga- le tuafafine o Taema, lea na fanaua le atua fafine o taua o “Nafanua” lea na faasa’olotoina Falealupo mai ona fili ae faavae ai lona igoa. 

O loo i ai foi ma se tala ia Tapuitea, le “Fetu o le Afiafi” ma lana fanau o To’ivā ma Tasi-ia  na faavaeina Falealupo, ma o le igoa lea o se tasi o mauga i Falealupo. O Tasi o le igoa lea o se Papa. 

O tala atu o Malaetele i le Taufusi -o loo i ai se Papa telē e igoa o le “Afolau o Tautunu”; ma o lona talaaga- e ai le sootaga ma le “Tala o le Tatau.” 

O le tasi itu- o iinei o loo i ai se tuasivi i totonu o papa i le faga o Faleulu- e faapea na satia ina ua toso ane e Puleleiite lana laumei i le matafaga- ma faaigoa ai loa o le “Tosogai’a.”

O le tala’aga o le afuaga o Falealupo sa faamaumauina e Misi Tana-fai mai o se ulugalii mai Tonga na ta’ua sa nonofo i lea nofoaga, o le la tama tama e pipili. 

Pau o le mea a lea tamaititi e fai i luga o le papa i aso uma -o le sausau lupo, o le lupo lea fai mai na ia toso ane i totonu o le fale o ona matua- a’o tau fau; ma o le pogai lea na faaigoa ai e le aitu o Saoolevao le fale o lea ulugalii- o “fale o lupo” poo Falealupo. 

O upu taoto la o Falealupo fai mai:-“Tulouna le Falefa o le Tapua’iga;” Tulouna lau Afioga Auvaa- o le Vaa Faatau o Nafanua; :”Tulouna Solia ma Foaimea o Ma’upu a Nafanua”, “Tulouna Lou Ma’upu o Lau Afioga Toleafoa;” “Tulouna a le Matua-Lau Afioga Lamositele,” “Tulouna Lau Afioga Seumanutafa,” “Tulouna Faletagoa’i, Lau Susuga A’e’au ma Ugapo”