Fa’amavae atu Samoa i se faia’oga-lelei

11 March 2016

Ripotia e Marj Moore

Fa’aliliu e Maiava

 

O le fa’ai’uga o le vaiaso nei, o le a fa’amavae atu ai le anoano o tama-tuai, o matua ma uo e aofia ai le Ali’i Palemia, Tuila’epa Sa’ilele Malielegaoi, ia Pat Buckley, o se tasi o ali’i sa lauiloa i ona taimi, o Patele Fintan.

O le vaiaso talu ai na tu’umalo ai lea ali’i sa avea ma Patele Malisi, talu le lua tausaga o finau ma le gasegase o le kanesa.

O ia o se ali’i-Egelani na fa’au’u mai le Iunivesete o Aukilani, ma na molimauina ose faia’oga mata’alia ma fa’amaoni i lona vala’auina, ma aupito lauiloa i le a’oa’oina o le mata’upu o le fa’aSaienisi.

O se tasi e masani ona fai lana mata-pogisa, e matau uma ai aga a tama-a’oga, ma o se faia’oga e naunau lava i nai mea nini’i fa’ale-iloga o le soifuaga nei e maua ai le fiafia. 

O le fa’ananau i lana galuega na matauina ai le avea o ia ma faia’oga o fanau i a’oga-tulagalua, a’oga maualuluga fa’apea iunivesesete i Niu Sila ma Samoa nei. 

I ona ulua’i taimi talu ona taunu’u mai i Samoa, sa fe’avea’i solo - mai St. Joseph i Samoa nei, aga’i i Kolisi o St. Pauls ma Avondale i Aukilani i Niu Sila.   

Na tu’ua Felela Malisi i le 1970 mo le 14 tausaga, na faia’oga ai i le Kolisi o Birkdale i North Shore, Aukilani fa’apea sina taimi sa iai i le A’oga a Epsom Girls Grammar, ma toe fo’i mai ai loa i Samoa i le 1989.

E 20 tausaga sa iai i le Iunivesete Aoao o Samoa, ‘ese mai ai nai tausaga sa iai i le Kolisi o Samoa, Samoa Primary, Robert Louis ma le Kolisi o Fa’atuatua i Vaitele.

Sa fa’atuina mai lona suafa e avea ma “Tagata Iloga o le Tausaga” i le 2011, lea na fa’aalia ai e Pat: “E afe ma afe sa a’o’oga ia a’u; ua fai lava si to’atele ua faigata ona matau, atonu ne’i le fiafia nisi pe a le-ta’ua o latou suafa. Ioe, e moni sa a’oga fo’i ia a’u le Palemia o iai nei ma ‘ou te le-iloa pe o se tulaga lelei lena mea pe leai fo’i,” o lana saunoaga tu’usa’o lea.  

 “O se tama-a’oga lelei tele. Sa ‘ou a’oa’oina fanau a nisi sa a’o’oga muamua ia te a’u, ae ‘ou te iloa ‘ou te le’i a’oa’oina fanau a latou fanau.”  Mo ana taumafaiga lelei na ‘ausia, e pei o ‘upu a se tasi o faia’oga porofesa o Mary A. Armstrong, o se faia’oga lelei e anoanoa’i mea na te silafia ma tele ana taleni. 

“E mafala ma lautele lona iloa ma o le taunu’uga lelei o le fai-fai-so’o ma fa’ata’ita’i. O se taleni e le tau-a’oa’oina, e fanau mai lava ma le tagata, ma o se tomai e mafai ona fa’ata’ita’i ma a’oa’oina lelei. E le o se galuega e matua faigata na’ua.

O le mea moni, o le tulaga maualuga lea na fa’atinoina ai lana galuega i le 57 tausaga i totonu o a’oga ‘ese’ese, na atili mata’ina ai manatua ai pea o ia. 

Ma e o’o mai lava i le taimi na maliu ai, o fa’aauau pea le maualuga lea o le fa’atinoga o ona tiute ma faiva fa’aFaia’oga.

“E moni, so’o se galuega lava e iai ona itu lelei, iai fo’i itu fa’ale-lelei, ae sa ‘ou matua fiafia lava iai,” o lana ta’utinoga lea.

Sa’o lelei, ua tatou fa’amaonia ma tatou va’aia fo’i fua lelei o ana galuega. 

Mafuaga lea o le filifilia fa’alausoso’o e fanau-a’o’oga i le Iunivesete Aoao o Samoa a’o iai, o le faia’oga aupito lelei.

O ona uiga masani lava ia, e le o se tagatai e logovi’i i ona tiute ma faiva fa’aFaia’oga.

“E tatau lava ona e fiafia ma iai lou agaga i le a’oa’oina lelei o tamaiti-a’oga ma o se galuega e ao ona tu’u-atoa iai lou iloa ma le malosi. O le tulaga tonu lava lena. ‘Ou te le naunau e so’ona fa’amamafa le taua o lena mea,” o nai ana ta’utinoga masani ia e fa’ailoa i so’o se tasi e fa’asoa iai.  

 “Na te fa’aosofia le naunau o ana tamaiti-a’o’oga ona e mana’o ia manuia fanau i le lumana’i,” o le molimau lea a se tasi o faia’oga sa latou galulue fa’atasi. “So’o se vaega o ana a’oa’oga, o le fa’amoemoe ‘autu lava lena. E fiafia tele i le Chemistry ma mana’o ia fiafia fo’i iai isi.” 

ADVERTISEMENT

E ioeina e Raven Meredith – o se tama a’oga o le Vasega Fa’avae a le Iunivesete Aoao o Samoa i le 2011 - lea tulaga.

“O le Chemistry la’u mata’upu aupito leaga sa iai a’o i lana vasega,” o le fa’amatalaga lea a Raven. “E iloa lelei lava e Buckley le mea la e talanoa iai ma o le taimi nei, ua ‘ou matua fiafia lava i le Chemistry; o se tasi o mata’upu aupito lelei ua ‘ou fiafia iai.”   

E fa’apena fo’i le agaga o le isi tama-a’oga o Chris Fruean lea na ta’ua, o mea uma lava ma galuega e fa’atino e le faia’oga, e toe fa’aalia mulimuli lava i galuega a tamaiti-a’oga aua o le fa’amuamua lava lena, o tamaiti-a’oga: lo latou a’oa’oina, le tuputupu a’e, le fa’ai’uga ma le taunu’uga e o’o iai. 

“E afua mai i lona agaga-naunau, o lona tomai ma le silafia o ‘auala ‘ese’ese e fa’atino ai le a’oa’oga o tamaiti,” o le fa’aaliga lea a Chris. 

“Tasi lea o faia’oga e ‘ese le mālie. E matua telē lona silafia ma ua masani fo’i i ‘auala e fai ai tamaiti. E le popole lava i le matua o lona soifua ua iai; aua e fiafia ma masani i uiga o tamaiti ma e mamafa tele ia te ia tamaiti uma o le vasega.”  

O le ta o se pese-malie e amata ai se vasega, o le tasi lea o faiga masani a Pat e tata’i uma atu ai mafaufau ma fa’alogo tasi uma tamaiti-a’oga.

O se faia’oga fo’i e fa’alogo lelei ma matau-mea, ae maise le mata’itu o tamaiti le-a’o’oga pe le usita’i fo’i ae maise le fesilifili pe iai ni fa’afitauli e mafai ona fesoasoani atu ai. 

O le isi tala o Pat na fa’amatala e a’afia ai se tamaititi o le NUS na ‘ausia le 99 maka i le Chemistry i le Tausaga Fa’avae, ma maua ai sana sikolasipi i Otago Niu Sila.  

Na masalosalo ma tele tala a faia’oga Niu Sila ona o le tulaga lautele o a’oga i Samoa nei ae maise ai lava, ia togi maualuga na maua, peita’i, na le ma-gagana ina ua toe ‘ausia fo’i le 99 o togi ia, e le tama’ita’i lava lea i lona tausaga muamua i se Iunivesete i Niu Sila.

I tua atu, i ona ulua’i taimi a’o faia’oga i le Kolisi o Sagato Iosefo i le 1960, na fa’amatala e se tasi o ana tama-a’oga tuai e fa’apea, e iai lava ana metotia masani e fa’amatalatala au’ili’ili ai le ‘gaogaosa’ o le Chemistry ma le Physics.  

“Na te fa’amatalaina so’o se mea i se ‘auala ina ia mafai ai lava ona e malamalama.” 

O lea tulaga mata’ina sa fa’aauauina pea i lona olaga atoa fa’aFaia’oga. 

Ae sa le na o le galue fa’afaia’oga na fiafia iai. O se tagata fo’i e fiafia i ta’aloga. 

Sa avea ma faia’oga mo ‘au-lakapi i Niu Sila ma Samoa nei fo’i. Sa faia’oga i 1st XVs ma ‘au-fa’aItumalo ma e fiafia tele e matamata i lakapi i le TV.

 “E matua talitonu lava i le lava o le manava ma le malosi o tama-ta’a’alo,” o le molimau lea a se tasi o tama-ta’alo a’o faia’oga ai Pat.

E fiafia fo’i i siva ma fa’afiafiaga. 

“Sa ‘ou fiafia fo’i i siva fa’aRock & Roll  ma leaga ai lo’u vae i le fa’ailogaina o le Iupeli a le NUS,” o lana fa’aaliga lea ma ‘ata’ata. 

Tasi ma le ‘afa-tausaga ua te’a atu ina ua fa’ata’otolia i le gasegase, sa fiafia e fa’alogologo i musika, e faitau-tusi, e matamata i ata ma ta’aloga i le TV, e fa’aalu ai ona taimi. 

E fiafia tele fo’i pe a asiasi atu ana uo, ma toe talanoa ai ma fa’asoa i gasologa o le olaga i aso a’o malosi.

Atonu o lona fiafia tele ia Samoa, o le mafuaga lea o le soifua fa’a’umi’umi pea ma  aulia ai le 2015 sa mate’ia e foma’i ma fo’i mai ai ina ua mae’a ona ta’otoga i le Falema’i o Middlemore.

E le’i taumatea lana tali i le mea e naunau e nofo ai, ina ua fesiligia pe toe fo’i mai pe a malosi lona gasegase.

“E mafai lava ‘ou ola i Samoa e pei fo’i o Aukilani. ‘Ou te fiafia i le tau i’inei ae maise o tagata e alolofa, ae maise o tama’ita’i,” o lana saunoaga lea ma fa’a’ivi lona mata.

Ia Manuia le Malaga Pat.

O se faia’oga galue-lelei ma aoga, ae maise o lona sao mo lenei atunu’u, o se lesona aoga mo tatou uma.

11 March 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?