O LA’U TALA FO’I

29 April 2016

1.Matauina i Tala Fou le tu’umalo o se tasi o tamalii iloga o le atunuu-sa avea muamua ma Fofoga Fetalai o le Palemene-le Afioga a Leota Leulua’ialii Itu’au Ale. 

O le faamatalaga la a Tala Fou e faapea na tuumalo Leota Leulua’ialii Itu’au Ale i le Maota Gasegase o Tupua Tamasese Mea’ole i Motootua-ona o se gasegase faafuase’i. 

O le matua o Leota Leulua’ialii na tuumalo ai e 75 tausaga-ma e faapea o le po o le Aso Sa- na auina atu ai i le Falema’i. 

Fai sa malosi lava le Alii-e le’i ta’oto foi i se gasegase poo se isi mea faapena-ae sa matua faafiafiaina lava o ia- ina ua toe talia e toe fo’i atu i Solosolo…! O Leota Leulua’ialii Itu’au Ale i lona soifuaga atoa-o se tasi o Faamatala Upu/Faaliliutusi o le Palemene o Samoa- mo le tele o tausaga-a’o le’i avea o ia ma Fofoga Fetalai o le Maota. 

Ia atonu e uma lenei itulau -ae le uma tala fiafia e uiga i lenei tamalii-a’o auauna i le Malo o Samoa! 

E uiga ese foi lona taimi a’o avea ma Fofoga Fetalai o le Palemene-talu ai-o le Fofoga Fetalai muamua lea- na ia faaaogaina La’ei moni o le Tofi o le Fofoga Fetalai-e pei o atunuu tuto’atasi uma o le Taupulega! 

Ae paga lea-o le ua “i nei e manu o le vateatea ma ua logo ai le lalolagi uma-aua ua tuua le malo e le Faasisina-le Afioga a Leota Leulua’ialii Itu’au Ale! Ia-o le a ‘ea sa tatou mea a fai-pe afai o le taunuuga lea o le soifuaga nei? 

Afai la e le’i faia i tatou mo le lalolagi nei-o lona uiga la- e le o so tatou nuu moni lenei-ae o lo tatou nuu moni-o loo faatalitali mai ai lo tatou Alii Faaola o Iesu Keriso. 

ADVERTISEMENT

O lea e momoli atu ai faamaisega i le faletua, le nofo-a-alo ma le aiga-alii faanoanoa–ona o le valaauina faafuase’i o Leota Leulua’ialii Itu’au Ale! Ia manuia tele lau malaga uso! O le a sou taofi?

2. Ua matauina foi i Tala Fou fai mai o lea ua toe maua le pagota o Lauitiiti Tualima lea na sola ese ma le falepuipui. 

Afai la ua toe maua-o le fesili-o afea la e toe sola ai foi? O a ni fuafuaga a le Pulega o Falepuipui mo ia ituaiga o pagota e pei o Lauitiiti? E avatu foi toe tu’u i lona potu mo sina taimi-ona toe valaau atu ai foi lea e tatala lona faitoto’a ae se’i toe sola tasi i tua? 

O le a le pogai e le faaaogaina ai filifili mo lima ma vae e loka ai pagota faapenei? Afai la e le o mafai e le Pulega o Falepuipui ona faatino o latou tiute-o le a le pogai e saga faamaumau ai tupe o le afu o le atunuu e totogi ai nei tagata ae na o le nofonofo ae sosola i tua pagota? 

E faapefea pe a afaina se tasi o le atunuu i nei pagota e sosola soo i fafo? 

Ae o le fesili taua lava-o le a le tulaga i le falepuipui fou lea sa ta’uta’u e fai i Tanumalala? 

Ua faataatia fo’i? O le mea ‘ea a ta’uta’u lava- ona lava ai lea? O mea taua nei e pei o le Falepuipui ma le Falemai Tele i Motootua e tatau ona faaaoga i ai le $400 miliona lea ua fuafua e faamaumau mo le malae vaalele i Faleoloa-ae leai ni turisi o toe fia o mai i Samoa! 

O lea foi ua fai lea vaalele helikopa-ae leai se aoga! O le a la le mea a fai nei? A tuufau lava pagota ia –a fia o lava i fafo -o? A feoti foi tagata o le atunuu ae leai ni taavale a le Falema’i-feoti ai pea? O le a sou taofi? 

3. Matauina foi i Tala Fou o lea foi ua aumai le tete’e a le Faletupe o Asia e uiga i tuuaiga tau le vaevaeina o eleele faale-aganuu poo le faoa o eleele faale-aganuu…! Afai la o faatino ni gaoioiga faapea i totonu o Samoa-fai mai le Faletupe o Asia- e ala ona fai ona o le talosaga a le Malo o Samoa. 

Fai mai le Faletupe o Asia ua uma ona tuuina mai e le Faletupe ia Samoa tupe faa-meaalofa e tusa ma le $270 miliona talā Amerika i le 50 tausaga talu ai… Afai la o lea le tulaga-o lona uiga-afai ua 50 tausaga talu ona maua e le Malo o Samoa ia tupe faa-meaalofa-o lona uiga-o le vaega tele lava o lea 50 tausaga-o le taimi tonu lea o le faiga-malo o loo i ai nei! 

O le a sou taofi?

29 April 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?