“Ia ta’ita’i le Agaga ma le mana”

RP
By Rev. Petaia Setu, 06 March 2017

(I Korinito. 2:1-5)

Ua tatou tausili lava i le poto. Ua filifili i mamalu ma tulaga aloaia. Ua tatou faatuatua foi i le ‘oa ma le lima malosi. E pei o vaaiga ia faanei onapo ua lima taitaiina ai i tatou i a tatou faaiuga ma a tatou filifiliga fai i soo se mea. E oo foi la i o tatou faiva faatino. O mea ia e faamuamua i o tatou luma.

Ia ta’u atu i tagata o oe e poto; o oe e maualuga lou tulaga a’oa’oina. Ia iloa mamao ma i ‘o o a’u e malosi, e maua mea; o a’u e maualuga i le faalapotopotoga, i le ekalesia, i le malo! Soo se mea lava la e tapena iai, e taula i kama ia! Ua fai ma faatuatuaga vaivaiga ia! Ae peitai o tapenaga a Paulo ma lana auaunaga, e faatonu, faasino, taitai e le Agaga o le Atua ma lona mana.

E le faigofie faafitauli o Korinito. E le gata i le ekalesia, a o lu’i foi mai fafo atu o le ekalesia. O ituaiga ia e le talanoa i ni mafaufau laiti. O kama ia e felelei lava i luga! E talanoa faa iunivesite. Lele ua tele i Samoa nei le mau fia Korinito. Auā foi o la latou mau, afai e te le i a’oga i Atenai poo Korinito, e te le ‘ilafia lava se mea. Afai e le i a’oa’oina oe i le poto faa Eleni, e te le iloa la se pa’upa’u.

O le atili faatuputupula’ia lea o le vevesi ma fevaevaea’iga o le ekalesia i mau leo eseese, ona ua oo le sailiiliga ia Paulo poo fea sa aoga ai a o fea foi na maua mai ai lona tofiga faafaifeau o le talalelei! Tafēfē sole! Se i faauta la outou iai i le masasau o faiai o Korinito! E faapena sou mafaufau faa tagata lotu? O le filifiliga lena o au tagata faigaluega? O lou talitonuga lena i sē ua agavaa e fai ma sa’o e tausia le aiga?

O lau vaai lena i se ituaiga tagata e tatau ona faaipoipo ma si au tama? O se tofi tonu la lea o le itumalo? O se mafaufau faapena e mana’o  iai le aulotu, le nuu, pulega faale ekalesia ma pulega faale malo?

E le o se faatau fa’i Paulo! O Paulo o le loia; o le a’oa’o; o le faiaoga; o le faifeau. Ae e te silafia, e le i faamuamua e Paulo ia mea. Pe e te loia, faifeau, faipule, pe sa e aoga i Korinito poo Atenai, Oxford poo Harvard, fai mai lava Paulo, o lapisi mea uma na (Filipi. 3:8) E a? E mita’i mai ni poto o le mea na faia i Le na faia mea uma? O le Puna ia o le poto ma le Pogai o le malamalama? E le i manatu le aposetolo i sona poto ma ni ona agavaa ina ua māūa le gasegase o le ekalesia i Korinito.

E ui ina e maualuluga mafaufau faalea’oa’oga o Korinito ma le poto faa Eleni, ae e le i faaagatonuina i sona silafia faa loia poo sona poto faale lalolagi; ae peitai o le faasino mai e le Agaga ma le Mana (f.4). Fai mai Paulo, ou te le iloa se tasi mea ia te outou tau lava o Iesu Keriso, o ia lava na faasatauroina (f.2).

E to lo’u pulou i le agaga solia ma le loto maulalo o lenei auauna. E le i faamoemoe i se lelei o sana lafolafo poo le oa i le gagana ma le poto e momoli ai le mau a le Atua. Na silafia lelei e le aposetolo lona Taiala. E le o le poto o le lalolagi, a o le Agaga o le Atua ma lona mana.

Auā o le Agaga ia o le poto uma lava ma le malamalama. O le Agaga o le maopoopoga (unity), ma le saolotoga, ma le mafanafana. O le mana o vavega; o le mana e mafaia ai mea uma; e manumalo ai  i tofotofoga ma faafitauli o le galuega.

O le papa lea sa taula iai le auaunaga ma faivā manaia o le aposetolo. Na ala ai ona tautua e faapei o se pologa, ina ia faaolaina agaga pologa uma i la le Alii. Na faapei o se Iutaia; na faapei o sē nofo i le tulafono; ma sē ua le nofo i le tulafono; na faapei o sē vaivai; ma ua avea lava ia ma mea uma i tagata uma, ina ia ola nisi e toatele mo le Alii i lona faatauvaa ma lona maulalo (I Kori. 9:19-23).

ADVERTISEMENT

Samoa, e le i vale le tōfa ua mătua i le Atua. Pe ana faafetaui e le aposetolo Korinito i sona poto faale tagata, po ua tupu tele le leaga. Peitai o le galuega a le Agaga sa taitaiina ai le aposetolo i upu ua iai le poto ma le mana o le Atua, ua fulitua ai i le faa Korinito, ae toe foi ia Keriso. Viia le Alii! 

Pe iai ea se mea ua faigata i le Alii? A o se a se tali mai le Atua ua le faamălieina ai oe? Samoa, o fesili ia ou te manatu e fesootai ma vaivaiga o loo toilalo ai le faa Iutaia ma le faa Eleni. La lea ua le ‘alo le aposetolo ae ua faatonu ma faailoa le moni.

E leai se mea e faigata i le Atua auā o le poto o le lalolagi o le valea lava lea i le Atua (I Kori. 1:20) E le mafai foi ona faamălieina oe auā ua e mana’o i ni faailoga mai i le Atua e lagolago i au mea sese ua fai. Ua le atoatoa lou loto i le Keriso na faasatauroina, auā ua le o le satauro lou loto, a o lou lava poto. Ou te toe faamanatu atu le upu sa ou mua’i tā’ua i se tasi o a’u lauga talu ai. O le tatalo a se tasi tagata e faapea, “Le Atua e, ia fai oe ma Nila, ae fai a’u ma filo.” Afai e muamua le Atua i mea uma, e leai lava la se mea tatou te popole ai.

O le a mafai ai foi ona tatou vaai tino i le mamalu ma le silisili ese o le Atua e faaalia i lona mana. A ta’ita’i le Agaga i ou tiute ma lau galuega, e te lagonaina lava le māmā ma le faigofie o mea uma. E te lagona lou saoloto. E te ola fiafia i se olaga mamā, fiafia mamā. 

Ua ou iloa e le ‘alofia lo tatou ola e ma’i ma puapuaga o le olaga. E le ‘asa foi faafitauli ma togafiti poto a le alii o lenei lalolagi. O loo tuliloaina pea i tatou e vaivaiga o le olaga ma mailei a Satani. Ae afai ua ‘au ma i tatou le Atua, o ai se faasaga tau mai ia i tatou? (Rom. 8:31) Samoa pele e, ia malamalama ou mata. O aso nei ua leaga. Savali i le moa o le ala. Mulimuli i le Nila. E faasino mai e le Agaga ma le mana lou olataga. Ia lē faasesēina outou e le poto o le lalolagi.

A ia e faautauta ma faalogo i le Agaga, ina ia le faatuatua i le poto o tagata, a o le mana o le Atua. (Salamo. 118:8,9). Ua faapea upu o le pese a se tasi faifeau misionare sa galue i Samoa o J.Mathieson, “Iesu e, o lou poto mai lugā, ua na o lea e aoga.” O le poto mai lugā e alofa; e faamaoni; e mamā; e anagatā.

O le poto lea e pulea ma faatonu e le Agaga. E faaalia ai foi le silisili ese o lona mana. Auā e natia i e atamamai, ae faaalia e le Atua i tama valevale (Mata. 11:25). Samoa e, o la le perofeta o Ieremia, E lelei ona faamoemoe ma le faalologo i le olataga mai ia Ieova (Auega. 3:26). Ioe, faalogo i le Atua. ia avea le Atua ma Faatonu Folau o lou olaga.

Auā e gase ia te ia matagi. E to’a ia te ia le āu peau. E mavae ia te ia ma’i ma tiga uma lava. E faaumatia e ia Satani ma ana ‘au. E tu ia te ia le ekalesia. O le ola ia o oe ma lou aiga.

‘Aua le soona masau i le poto o le lalolagi ma le malosi ua ia te oe auā e faaumatia ia. A ia ta’ita’i ma faatonu le Agaga ma le mana o le Atua ia te oe e te ola mălie ma ola manuia ai. E maopopo ai aiga ma fealofani ai fanau. E saoloto ai le atunuu ma ēa ai le ekalesia.

Amene

7737063/7783782

 

RP
By Rev. Petaia Setu, 06 March 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?