O LA’U TALA FO’I

07 August 2016

1. Matauina ma le fiafia le taumafai malosi o se tasi o tamaitai Samoa i Taaloga a le Lalolagi o loo faagasolo nei i Rio. 

O le matau la i lea tamaitai-e foliga mai e tupuga mai se aiga-o le latou taleni lea o taaloga- e pei ona avea ai ma sui o le atunuu. 

O le matau foi i lenei tamaitai-e le na o ia lea o lo latou aiga ua fai ma sui o Samoa i Taaloga a le Lalolagi-ma o le faiva poo le taaloga a ia tamaitai-o le si’isi’i u’amea mamafa! 

E tusa ai la ma Taaloga a le Lalolagi poo le Olimepeka o loo fai nei-ua lautogia foi o ia e avea ma ave-fu’a a le atunuu-ona ua masani lelei i lea faa’agā-tama-ma o lona uiga la-ua faamaonia ai le upu-‘e mafai foi e tama’ita’i ona faatino mea e mafai e tama ona fai. 

Ia afai la o Samoa o se atunuu itiiti ma le faatauvaa-ae o lea ua lauiloa i le lalolagi ona o taumafaiga a nei tamaitai ma isi foi alii ma tama’ita’i ta’aalo o Samoa-o se itu lea e tatau ona tatou faafetaia-ona e le o oge Samoa i se taimi-i tagata taaalo e mafai ona latou tuuina atu le suafa o Samoa i le tumutumu o le lalolagi! 

Atonu o se matati’a foi lea e tatau ona ‘ausia e Samoa e tusa ai ma le taaloga o le Lakapi! E mafua se manatu ona afai ua mafai ona fai e tama’ita’i o Samoa-e tatau foi la ona mafai e isi alii ma tama’ita’i taaalo uma o Samoa. O le a sou taofi?

2. Matauina foi i Tala Fou se faalavelave tau taavale i Tuana’i-lea na aafia ai ni taavale se lua-o se pasi ma se taavale laititi. O le matau la i ata na pu’e o lea faalavelave-ua matua le aogā le taavale laititi. 

ADVERTISEMENT

O le pogai la o lea faalavelave e faapea o le saoasaoa na pogai ai. Ia-atonu e mafai ona tatou faapea- o nei faalavelave e tutupu pea lava pea-ae afai o le saoasaoa e pogai ai-ua tatau la ma onomea ona fai se fuafuaga e taofi ai-talu ai –o nei faalavelave- e tua lava i le maumau ai o le soifua. Ia atonu e faigata ona fai se fuafuaga vave-ae a manatu i ia aso a’o vaai e le Ofisa o Leoleo femalagaiga i luga o ala tetele-sa feoa’solo Leoleo i uila-afi i aso uma mai Apia e tau i le Uafu i Mulifanua-ma o le pogai lea sa leai ai ni tuuga-taavale sa faia. 

O le pogai foi lea na tausisi ai avetaavale uma i le saoasaoa faatulagaina-leai ni pasese ova a pasi aua e siaki uma lava e Leoleo i luga o le alatele- ma sa leai ni faalavelave mata’utia faapenei. 

O ai lava la o faia lenei mea faa-saoasaoa o taavale-ia manatua lelei-a tupu le faalavelave-e tua lava i le ola o le tagata-aua e le gata ina manunu’a leaga ai-ae maliliu ai foi ma tagata. O le a la se faiga e mafai ai ona fo’ia  lenei faafitauli? O le a sou taofi?

3. Matauina foi se ulutala fai mai –ua faatūtū le vaai a Samoa i le Global Tens e saili ai sona avanoa i le Super Rugby. Ia afai ua i ai se fuafuaga faapea-masalo o se mea lea ua leva ona tatau ona fai. 

E mafua se manatu ona o le toatele o tama fanau a Samoa- ua iloga i lenei taaloga o le lakapi-o loo taaalo i fafo-ia e ono mafai ona fesoasoani mai mo sea faamoemoe. 

O le toatele foi o ia tama fanau a Samoa-ua lauiloa i fafo ma o loo taaalo i Kalapu Lakapi iloga a le lalolagi! Ae talu ai o ia tama o loo taaalo i Kalapu i Fafo - o loo maua ni o latou totogi-atonu o lea e tatau ai ona fai ni feutanaiga ma ia Kalapu i fafo-i se faiga e mafai ai ona faaavanoa mai a tatou tama-se’i fesoasoani i le tau sailiga o so tatou avanoa mo le Global Tens. 

Ia-atonu e fai mai nisi e faigata-ae talu ai o le Peresetene o le Iuni Lakapi a Samoa-o le Palemia foi lea o Samoa-e i ai la le manatu – atonu lava o le a mafai lava ona fai pe afai e fai e le Palemia ni feutanaiga-e saili ai se maliega e faa-avanoa mai ai a tatou tama mo le sailiga o sea avanoa-ona toe taliu atu ai lea ia latou kalapu lakapi o loo taaalo ai i fafo! O le a sou taofi?

4. Matauina i Tala Fou ua tau le ‘asa le aso ma se faaiuga a le Faamasinoga e faasala ai tagata solitulafono. O ia soligatulafoo e matua mata’utia lava-talu ai –o ni solitulafono e fai i totonu lava o  aiga ma lona lotoifale-ae o nisi foi o loo aafia ai – o nai a latou lava fanau! E ui lava la ina musua e tautala i nei solitulafono, ae atonu e aoga le fagufagu atu pea-ina ia tatou nofo-uta i ai-leaga e le o se mea e masani ai- ae peiseai-ua sasao faa-afi i nei aso! 

O le fesili la-O le a le mea ua tupu ia Samoa? O le a le mea ua tupu i le tatou aganuu-i le va nonofo ai o matua ma fanau poo fanau fai? A toe vaai i tua i le aso muamua na suluia ai Samoa e ‘ave o le Tala Lelei-o le fesili-aisea ua faapea ai? O lona uiga ea-o loo tatou faia lava ma le iloa lelei-o  nei mea-‘e le finagalo ai le Atua ae fai lava? 

O ai la o le a tua i ai? O le a se olaga tatou te faamoemoe o le a maua e fanau iti ua aafia ai-talu ai nei soligatulafono? O le a sou taofi? 

07 August 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?