LAUGA - “O le mea sa’o e lelei; ae le o le mea lelei e sa’o”

RP
By Rev. Petaia Setu, 03 April 2017

(Galuega.04:19-20)


Ua faapea le isi manatu, ‘E malosi le mea moni, ae le moni se mea malosi’ O le ā le mea moni? A o le ā le mea malosi? O lē fea lelei e sa’o?

A o le ā le lelei ua le sa’o? Se’i o tatou toe vaai tasi lava i le atugaluga o le taitai o le atunuu i “Faafitauli o faamaumauga ma tusitusiga o le tala faasolopito o Samoa.”

Na tā’ua ai e Tuiatua Tupua Tamasese Efi i le faatofalaiga sa faia i le NUS campus (2 Setema 1998), o loo iai lape o tusitusiga a papalagi i le tala faasolopito o Samoa. Talu ai ona o manatu faamālō mai nisi vaega o le atunuu, ua limataitaiina ai tusitala papalagi i faamaumauga ma tusitusiga faumālō.

O le mea lelei lea ma le malosi; ua iai ni tusitusiga o le tala faasolopito o Samoa ma ua faamauiina faale tulafono. Ioe, o le mea lelei ae le o mea sa’o uma ia! E malosi aua o lea ua faamauina; ae le moni le tele o mea ua molimauina.

O le talitonuga o le fai mataupu na ia faaalia, o le sa’o ma le moni o le tala faasolopito o le atunuu, o loo taoto I ou gafa ma ou faalupega. O loo i igoa ipu ma suafa matai; igoa taupou ma igoa manaia.

O malae ma maota, o i fanua foi ma tapuāfanua o aiga ma nuu. E faamatala foi e le taga; e le sula, e le tini, ma le avatau. O le sa’o ma le moni lea e tautalatala iai ma molimau. E taofi mau ma a’oa’oina ai fanau.

O le loto faumālō lea ua le maua ai se to’afilemu o alii ma le au toeaina. Ua vili tigā ai le au tusiupu ma le au faitaulaga sili. Ia le alia’e se isi lava igoa poo se isi malosi, na o le Atua e tusa ma tulafono o le lotu Iutaia.

A ua tali atu Peteru ma Ioane, “Pe tonu I luma o le Atua ona ma faalogo ia te outou, ae ma te le faalogo I le Atua? inā filifili ia outou. Aua ma te le mafaia ona le tautala I mea ua ma vaai iai ma faalogo iai” E le mafai ona taofia le mea sa’o. E le fefe foi le mea moni. O le mea sa’o e lelei; ae le o le mea lelei e sa’o.

O lea ua tau ‘ai o le galuega (Galu.3:8). Ua tautala taga. Ua sula le mana. Ua vivii I le Suafa. Se a e vaoia ai a o la Iakopo, O se ua fiafia, pese, siva, vivii! (Iako.5:13). O le ute lea o le feau. Ia faaolaina tagata uma I le suafa manumalo o Iesu Keriso le Nasareta. O le ivitu lea o le valaauina.

O le galuega laveai. O le finagalo o le Atua. O le molimau lea I le mea moni. O le feau o le alofa tunoa ma le pule faaola a le Atua. O le mea moni lea.O le mea sa’o foi lea e lelei mo tagata uma. Peitai, ua le lelei lea I le manatu o toeaiina. E le talia e le au tusiupu ma le au faitaulaga sili.

Kama ia e tautu lava I a latou faiga faavae ma talitonuga faale lotu. E faalala le mua mai I le muli mai. Ia faia le tala’iga I la latou faatonuga. O la latou pule e faia ai ni galuega ma vavega. E faumalo I le moni. Ia faanoi mea I la latou pulega.

O le ala lea e ilitata ai e taofi. Faasa! E taofi le sa’o. E faasa le moni! O le fesili mo oe ma a’u Samoa, O le a lou valaauina? Se a lou faauuga? Afai o le valaauina mai le Atua, ma le faauuga a le Atua.

O ai la e te faalogo iai? O le Atua? Po o tagata? Faalogo I le tali a Peteru ma le au totoa o le talalelei, “E sili lo matou usitai I le Atua nai lo le usitai I pulega a tagata” (Galu.5:29) Tautala I le sa’o. Faailoa le mea moni. Molimau le lelei.

Ua tatou faitau o mea uma ua tatou faia ua lelei . Ioe, atonu o mea uma ua faia ua lelei, ae le o mea uma ua sa’o.

A lelei se atinae ae fetautaua’i ai se nuu, o sa’o lena lelei? A lelei ni tapenaga ae fai ma le le fiafia ma le le loto iai, e sa’o lena lelei? Ae faapefea ni galuega fai a aulotu poo faiga taulaga a le ekalesia o loo tauanau e le lima malosi, o loo oi ma oono ai isi ae faamaamulu ai le toatele o isi?

ADVERTISEMENT

O sa’o lena lelei? Ua tele fale tetele ma le lelei ua tutu I le taulaga I Apia. Ae afai ua ova atu ma le fia miliona tala o loo nōnō ai I atunuu I fafo, e sa’o lena lelei?

O sa’o lena lelei. Ae faapefea le mau falesa o loo fau I le manao a le toalua poo le toatolu, ao loo oono ai aiga ma aulotu, e sa’o lena lelei. O loo lelei le filigā; a o ala e fai ai e matuiā.

E le afaina le fai o le falesa; ae le sa’o le fai ma le tiga. E afua ona tatou fesea’i, ona ua tatou loto faa faitaulaga sili. Ua tatou faumalo faa tusiupu. Ona tauaso loa lea o le vaai I le Atua, ae ‘apo le faavae ma le tulafono ua uma ona faataoto ia tusa ma lou mana’o.

Samoa e, soo se galuega lava e faia I le amiotonu ma le sa’o, e le gata ina lelei, ae anoa lona lelei. E lima afe tagata sa vaai ma faalogologo ma talitonu I le mana ma le suafa o Iesu Keriso (f.4). Ioe, e anoa le lelei o le mea sa’o ma le moni. 

Faafetai ua le manatu Peteru I le matutua ma tofiga taitai ma tulaga sinia o tusiupu ma faitaulaga sili. Aua o le upu moni Samoa, o le osiosiga va lea o loo faamamafi iai le aganuu, ae gase ai le faamaoni ma le sa’o o le mau.

O loo tupu pea. E lei mamao tele atu na molia mai se tasi faifeau ua faaaoga faalilolilo le $168,000.00 a se aulotu i NZ ae le I iloa e le aulotu. O le tala a le faifeau, o se isi vaega o lea tupe sa fesoasoani ai I uta a nisi o faifeau taitai e aumai I Samoa.

Fesili se tasi taitai, ‘Se I ta’u mai lava se igoa o se faifeau sa aumai ai ana uta I lea tupe? Ua gugu le uso. Faigata le va fealoa’i.

Ua mamafa ia te ia le faifeau matua, ae mamasagia ai le Atua. Ua teu va I ona taitai, ae tala va I lona Matai. Pe tonu I luma o le Atua ona e faalogo ia te ia ma fai lana amiotonu, poo le faalogo I tagata ma ola ai I a latou pulega? Le au uso e, tatou te galulue ma molimau mo le faamalologa o le tino, o le mafaufau, atoa foi ma le agaga.

O le lelei anoa e fofoa mai I le amiotonu. O le lelei tauaogaina, e  to mai I le mea moni ma le sa’o.  O le mea moni, o le suafa o Iesu Keriso o le Nasareta, o le na faasatauroina e outou; o le ua toe faatuina e le Atua nai e ua oti, o ia lava ua tu mai ai lenei tagata ua malolo I o outou luma.

O le mea sa’o, e leai se tasi ua iai le ola; e leai lava se isi igoa I lalo o le lagi ua foaiina mai I tagata e mafaia ona faaolaina ai o I tatou.

Samoa e, o le lagisoifua o le mau ia Iesu Keriso, o oe. Ia faautauta lou ’oe I le va feloa’i. Ia faamaoni lou oe I le taulogologo o le feau o le faaolataga. O au taga ma lau amio e momoli ai le mau. E te sulaina le mana o Iesu Keriso. E te vivii I le suafa o Iesu le Nasareta.

Tatou te faalogo I le Atua, aua o le Moni lava ia. Tatou te tautala I mea uma ua tatou faalogo ma vaai iai, aua o le sa’o lena. Ia manatua, o le mea sa’o e lelei, ae le o le mea lelei e sa’o.

 

Amene

7737063/7783782

 

RP
By Rev. Petaia Setu, 03 April 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?