Fusu i Tulafono

23 May 2016, 12:00AM

Toe mafaufau tasi lava…O le Aso 20 o Iuni i le 1997 le fusu’aga logologoa – le Fusu’aga U-Taliga i le va o le siamupini o le paga-mamafa i le lalolagi, o Evander Holyfield ma Mike Tyson. O le fusu’aga lea na matua le-mafai ai ona taofia le ita o Tyson, ae ū loa le taliga o Holyfield ma motu-‘ese ai se vaega o le taliga o sia ali’i!

Na se’i le laisene-fusu o Tyson ma fa’asala i le tolu-miliona tala ona o le le-fusu e tusa o tulafono. 

Talosia e le o fa’apena tamaloloa ma fafine le le-taofiofia pe a fe’ese’esea’i i nisi taimi! O mafutaga fa’aulugali’i ua fa’aipoipoina, o mafutaga ta’ito’alua e tatau ona fiafia ae le o se to’alua e fe’aina’i – lea e tele ina lalau ai ‘upu fa’atiga-loto e afaina ai le isi. Ae tatau ona tatou taumafai e a’oa’o ‘auala e fa’ailoa atu ai le le-fiafia ma finau lelei, i se ‘auala aoga e maua ai le nofo-malamalama lelei ma tausia ai pea le nofo-fealofani.

A lua vevesi loa ma lou to’alua, o nai fesoasoani nei e ono e ta’iala ai ‘Oe.

O le mea muamua, o le taimi. A lua feita tele ma le-manana’o e talanoa i le fa’afitauli ua tupu, sema se taimi paganoa lua te talatalanoa malie ai pe a ua to’a ma leai se pisa. Talanoa malie ae ‘aua le tu’ua’ia e le isi le isi!

Ta’iala lona lua: Tu’u le avanoa e sausaunoa mai ai le isi fa’apea, “Ua ‘ou ita” po’o “Ua tiga lo’u loto.” O le tele lava o taimi, e tatau lava ona fa’ailoa atu o tatou fa’alogona moni i totonu. Manatua, e le sa’o-noa atoatoa pe sa’olele fo’i o tatou lagona, ae o o tatou lagona! Ma e tatau la ona tatou aloa’ia lelei sa’olotoga ma aia a isi tagata e fa’aleo ai ma fa’aali mai. 

Lona tolu, ia e malamalama i mafuaga ua e ita ai. O nisi taimi, na o sina tama’i-mea lava e fa’atupuina lo le-fiafia a’o tua atu o lo’o iai le fa’afitauli tonu; ma o le mea tonu lava lena e tatau ona e malamalama atoatoa ma talanoa loa iai.

O le lona fa o ta’iala, o lou iloa lelei lea, o lou loto-ita le fa’afitauli moni, ae le o lou to’alua po’o o se isi lava. Tumau ai pea i le itu lena ma finau fa’atasi fa’asaga i le fa’afitauli ma le ita o lo’o fa’atiga ia ‘Oe, lou to’alua ma lou aiga atoa. 

O le lona lima: Tu’utu’u i lalo lou lea ae si’i i luga le lelei o au feso’ota’iga ma le so’otaga lelei ma lou aiga ua e ita iai.   

E mulia’i ae le fa’aumatia, vala’au Le Atua e ‘auai i le lua misa. E mo’omia tele lou talosaga ia Iesu, ina ia pulea lelei e Ia lou loto, le mafaufau ma lou tagata atoa, aua o Ia moni lava e iai le alofa moni, le poto ma le malosi e mafai ai ona e fa’atonutonu e ‘oe ‘oe lava, ina ia fa’atino ma fa’aaoga lua ‘ese’esega na, e fausia ai se soifuaga malosi, se mafutaga mafanafana ma fiafia fa’atasi ma lou to’alua ma le aiga, i le ola nei. Toe mafaufau tasi lava… (Fa’aliliu e Maiava).

23 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>