LAUGA - “O le tagavai o le olataga”

RP
By Rev. Petaia Setu, 10 December 2017

E iloa i fea ua tatou manumalo? A o ai na te molimauina lo tatou saolotoga? Tatou te le talanoa i le tulolo o Asuria; a o le tala faamamafi i le la laau na valo’ia. Na te aumaia le saolotoga ma le manuia; o le ola ma le fiafia. 

O le tala a le perofeta, o lea aso foi e tu mai ai le Pogai o Iese, e fai ma tagāvai o le nuu, e saili ia te ia o nuu ese. E fai ma laveai i lona nuu. E faatuina foi e ia le tagāvai mo nuu ese, ma faapotopotoina sa Iutā uma lava. 

O le tagāvai, o le faailoga e laualuga i soo se tagata soifua. E iloa ai oe ma lou tuātagata. Tatou te faaeaea ma faamamalu iai. Na te faamalosi ma muaau ia i tatou.

O le valoaga a le perofeta o Isaia i le silia ma le ono selau tausaga o lumanai le fanau mai o le Mesia. A o le ata o le nuu o loo faatāfea, a ua valo’ia lē na te fa’aa’ea. 

E oi ma oono, ae o loo iai le faamoemoe ola. E faatuina e le Atua le tagāvai mai totonu o le oi ma le oono e fai ma malologa. Malologa ua iai le saolotoga, ua iai le ola. E saili ai lanu ma gagana; e laveai i tagata uma lava. O lana faamagaloga, e fanau mai i le faamaoni o lona alofa. O le tagāvai ua faatū e le Atua e tasi ai tagata uma. E faapotopotoina ai aiga ma nuu sa tā’apeape. E faamaopoopoina ai ē fe’aina’i ma fefulituaa’i; o e ua fetaua’i ma femisa’i. 

E maua ai faaleleiga ma fealofaniga. E tuutele ai mea uma, ma tuu avanoa ai foi i tagata uma. E ui ina lailoa  ma faapologaina i nuu ese, ae le mavae le alofa o le Atua i lona nuu ma lona laueleele. Pogai Iese; e fanau mai i lona gafa le Alo o le Silisili ese. 

O le Alii ia ma le faipule. Ua le faapito ona faatū mo Iutaia, a o nuu ese ma le lalolagi uma. O lona malologa, o le saolotoga mo tagata uma. Ua tasi ia te ia tagata uma.

Ua logo le lalolagi uma i tala’aga o le soifua ta’uleleia o Nelson Mandela. E 27 tausaga o faafalepuipui ae na faatū e le Atua e fai ma tagāvai  o le leleiga ma le soofaatasi o tagata uli ma tagata papa’e o Aferika i Saute. Ua a’oa’oina ai le lalolagi faailoga lanu i le loto faamagalo ma le alofa faaola e laugatasia ai tagata uma o lanu ma gagana eseese. 

Ua mafai ai ona soloia le pa vaeloto o le faailoga tagata ma le vaai maulalo, o le inoino ma le faapologa tagata, ae ua fealofani ma galulue faatasi. O le Pogai o Iese, na mau ai le Agaga o Ieova. O le Agaga o le poto ma le mafaufau; o le agaga o le faatonuga ma le malosi; o le Agaga o le malamalama ma le mata’u ia Ieova.

O le Agaga lea ua mafai ai ona nofo faatasi o le luko ma le tamai mamoe, e taoto foi le nameri faatasi ma le tama’i ’oti, e faatasi foi le tama’i povi ma le leona taanoa. Ua le toe fai ma fili le tasi i le isi. Ua fetausia’i ma feagaleleia’i. O āta na o le tagāvai a le Atua. Ua i’u le soifua o Mandela, a ua saoloto ma fealofani ai ona tagata.

O la lea foi le faamalosi a Isaia i le nuu o le Atua. E mavae le malosi o Asuria, e gata foi le ma’ema’e o Papelonia. Ae tu mai i le Pogai o Iese le faaola; o le tagāvai o le olataga mo tagata uma; o Iuta atoa foi ma nuu ese. 

Ua leai Sanerivi ma le malosi o Asuria; a ua ata mai le malo o le Mesia. Ua faia pea e le Atua o vavega ma faailoga, e faailoa ai le silisili o lona faamaoni ma lona alofa. 

O le malo o le Mesia e le o se pulega faa militeli(military), a o le malo e gata iai le vevesi. Fai mai Isaia, e matagofie lona malologa. O le malo o le filemu ma le manuia e faavavau. O lona lagisoifua, o le Alii ia o Iesu.

Samoa e, o Iesu Keriso, o le tagāvai ia o le olataga na saunia e le Atua mo le lalolagi uma lava. O le tagāvai malo. Na malōlō ai ma’i eseese uma; toe tutū ai ē na oti, faamagaloina ai agasala, saoloto ai tagata, fesootai ai lanu ma gagana, ina ua fai lava ia ma puluvaga, i le ma leleiga i tagata, atoa foi ma le va o le Atua ma le tagata. O le tagāvai ola na afuafua mai i le amataga, ina ua sesē le ulua’i tagata, ma oti ai i la le agaga i le agasala.

ADVERTISEMENT

O lenei ua tatou laasia le totonugalemu o le masina faai’u o lenei tausaga. Poo e manatunatu ma le faautauta i le masina lenei na mamanu ai e le Atua le tagāvai mo oe ma lou aiga? Poo afea’ina i sou finagalo le masina lenei na faataunuuina ai e le Atua le valo’aga a Isaia? Sa faatupuina ai e le Atua le tatupu mai le aa o Iese i le aiga o Tavita i Peteleema le aai a le tupu.

Samoa e, inā ea ia i luga o outou ulu! O tatou e tauavea le tagāvai. Na faatū matilatila e le Atua le tagāvai i Kolokota ina ia agiagia atu ai le ola i tagata uma. 

O lanu ma gagana e molimauina le atoatoa o lona alofa. O le alofa na momoli mai e le tagāvai o le olataga i aiga, nuu, ma le lalolagi uma lava, ina ia maua le saolotoga ma le manuia e faavavau e i latou uma ua faatuatua ma talia lona afio mai i le lalolagi.

O sa’o le tagavai o loo e faasaga iai? O tou mafuta ma lou toalua ma lau fanau i le aga atu e faamanatu le tagāvai na aumai e le Atua mo lou togiolaina? O agiagia i luga le tagāvai a le Atua poo fai pea ou fiafiaga faale lalolagi ma ou faamuamua? Uso e, afai e le o Keriso le tagāvai o lou olaga, e te le maua se fiafia i lou siomaga. 

E te le manumalo i au tapenaga ma au fuafuaga. E le lua ni tagāvai na faatu e le Atua. A leai se avanoa i lou olaga e tu ai le tagāvai a le Atua, ua le o oe o se tagata saoloto. 

A mativa oe ma le alofa faaola o le Atua, e le iloa e ou mata le tagāvai o le olataga. Afai ua silia ma le ono selau i le fitu selau tausaga talu ona pese o Isaia i le tagāvai e saoloto ma maopoopo ai, e ola fiafia ma ola manuia ai, e faapefea ona tatou faatamala iai? 

Le au faatuatua e, o le faailoga lea e tasi i le olaga atoa tatou te ola ma tatou, o le Iesu Keriso ua faatuina e le Atua e fai ma ola i lou loto ma lou olaga o aso uma. Ua faatuina e le Atua e faapotopotoina ē ua salalau solo. E faatasia ē ua taapeape. 

E liliuina le faanoanoa ma le lē mautonu i le fiafia ma le mautinoa. Na te tuuina le agaga o le malamalama ma le mata’u iā Ieova i ē o loo fesēsēa’i pea i le pogisa. Na te faapotopotoina ē ua tulia ma ua le amanaia.

Le ekalesia e, ua faatuina oe e Iesu Keriso e fai mona tagāvai i le lalolagi nei. O le malologa matagofie o loo tautala iai le perofeta – o oe. E malu ia te oe le atunuu ma ona tagata. Faaagiagia i luga Iesu ma ola ai ma tumau ai i mea ua finagalo ai Iesu. 

Folafola le fanau mai o le Mesia, ma ia tausolomua i le alofa, i le faamaoni, i le fai meatonu oe le Ekalesia. Aiga e, ma uō, maifea ona e saoloto? Ae iloa faapefea ua fai oe ma tagata manumalo? 

O Iesu Keriso o le tagāvai ia o le olataga. O le tino ola oe o Keriso i le lalolagi nei. Tuu i luga le tagāvai a le Atua. Ia ola ai oe ma lau fanau ma lou aiga. Ia saoloto ma fealofani ai ma uō. 

O lona faatuina e le Atua i le lalolagi, ua laga’ia ai lo tatou toilalo. Tatou tutū faatasi i luga, faalealea i le lalolagi le tagāvai o le olataga, o le tama ia o le folafolaga.

 

Amene

 

7737063/7783782

RP
By Rev. Petaia Setu, 10 December 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?