Alofa’aga mai Rusia

21 May 2016, 12:00AM

Toe mafaufau tasi lava…O se tala moni lenei mai Rusia. O Nadya von Meck, o le tama’ita’i aupito mauoloa lea i le a’ai o Moscow i lea vaitau. Peita’i, e tiga le tele o ana tupe ma ona mau manuia, ae sa le-fa’amalieina lava lona finagalo ina ua maliu lona to’alua.

Ona sola lea i lona fale felanulanua’i ma fe’ilafi ma taumafai ai e fōfō-lemu ma fa’agalogalo-mālie tiga o lona loto e ala i le taina o musika e fiafia iai, i lana piano.   

O le taimi tonu lava lea sa iai i le a’ai o Moscow se ali’i tusi-pese e 36 tausaga, o Peter Tchaikovsky. Na te matua le-iloa, ua avea ana musika ma fa’aola-totoga, e toe totō ai le fa’amoemoe ma le alofa i le agaga o le tama’ita’i nofo-to’atasi lea, ua maliu lana tane. Na lagona e Nadya, ua malamalama lelei Peter i ona tiga ma fa’alogona ma i’u ina liliuina atoa ai ia lagona fa’anoanoa, i ni musika aupito mālū, fa’ala’ei-A’u ma logo-malie ua fa’alogo iai. 

Peita’i, o le fa’avalea o Nadya i musika-malie a Peter, ua tosina atu ai ma lona tagata i le ali’i fai-musika. Sa ia iloa mai uo a Peter, mea e fiafia iai le ali’i ma i’u ai lava ina ia totogia o ia, ina ia saga tusia nisi pese se tele. O le mea moni, na avea Nadya ma lagolago #1 a lea ali’i tusi-pese. 

Ua fa’asolo pea le soifuaga ma i’u ai ina avea lea tama’ita’i ma uo mamae ma fa’atuatuaga o Peter, ua fa’aosofia atili ai lona mana’o e saga tusia nisi o musika aupito fa’agau ma fa’amalie-loto i tala-fa’asolopito. E 14 tausaga o uluulu-mamau pea le alofa i le va o le to’alua lea ma o le tala moni, o pese aualofa uma ma musika sa tusia e Peter Tchaikovsky, sa tusia fa’apitoa lava mo lana pele e to’atasi, o Nadya von Meck. 

A o le tasi aso, na fa’afuase’i lava ona motusia le mafutaga a le to’alua lea, e leai se tasi na malamalama i le mafuaga. Na vave ona gasegase Nadya ae maliu lava Peter, o ta’uta’u le igoa o lana pele. Ae na manatua pea lo la alofa fa’alilolilo e ala i a la tusitusiga e fa’ailo ai le alofa o le tasi i le isi ma ona pau fo’i lea o le mea ua tatou iloa ia la’ua nei. E 14 tausaga o fa’ailoa o la lagona i tusi sa la faia. A o le mea ofoofogia, o le mafutaga va-va-lalata lea a Peter Tchaikovsky ma Nadya von Meck, lea na fanau mai ai nisi o musika aupito fa’amomoi-loto i le lalolagi, e afua mai i le mafutaga a se to’alua ua uluulu le alofa, ui e le’i feiloa’i pe fa’afesaga’i muamua! 

Ae sa’o ai, o le alofa moni e ao ona fa’asoa “i le mafuta va-va-lalata fa’atasi fa’aleTagata,” ae le na o le fa’asoa i pese ma tusi aualofa. O le mafuaga lea o le Afio mai fa’aleTagata o Le Atua Soifua: e fa’ailoa Lona Alofa  mo tatou “e fa’alatalata mai ma fa’aleTagata”, ina ia tatou malamalama ai lona finagalo moni ma taumafai ai ia tatou talia ma alolofa ia te Ia. O le aso, tu’u atoa lou soifua mo Iesu – le na maliu ma toetu mo ‘Oe ma a’u - ina ia avea o Ia ma Fa’aola o Fa’aola mo lou soifuaga atoa. Pau lea o le ‘auala e te maua ai lona Alofa moni ma le malosi e amata sui ai lou olaga. Toe mafaufau tasi lava…                  (Fa’aliliu e Maiava).

21 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>