Tatala mai le ‘Ato-ponapona a Mosalemi i Samoa

MH
By Mathias Huckert, 21 May 2016

E matua maumaututu le Ta’ita’i o le Fa’atuatuaga Mosalemi i Samoa, o Dr. Muhammad Yahya, e le ta’a’ina le malo o Samoa i se fa’aaliga mai le Fono a Ekalesia So’ofa’atasi i Samoa, ina ia fa’asa le Isalama i Samoa nei. 

Na ta’ua e Dr. Muhammad – ua lausilafia i lona suafa o La’ulu Dan Stanley, o lea lafoga ua ta’ai-fa’atasi ai Samoa ma isi tagata fa’ailoga-lanu fa’atu’i’ese i le Malo o Amerika ae maise lava latou o lo’o lagolagoina Donald Trump lea o lo’o taumafai e fa’asa tagata Mosalemi.  

 “O le fa’apena ni mafaufau o ni tagata-ola,” o lana fa’aaliga lea. “Pei ni aga a se lafupovi. E to’atasi lava e faia se fa’ai’uga ona taufetuli loa lea pei o ni povi.” 

O saunoaga ia a Dr. Muhammad e tali mai ai i fesili sa tu’uina atu e le Samoa Observer e uiga i saunoaga a le Failautusi o le Fono a Ekalesia So’ofa’atasi, o Ma’auga Motu, ia fa’asa le lotu Isalama.

O le fiafia tele i se saunoaga a le Ali’i Palemia ia toe iloilo vaega tau-tapua’iga i lalo o le Fa’avae, na ta’ua ai e Ma’auga - o le Faife’au o le EFKS e fa’apea, e sili ai loa le fa’asa a’ia’i o le lotu Isalama ma fa’apea ai, ona e ono iai ni fa’amata’u i le atunu’u.

“Matou te le o matua mamao ‘ese, leai,” o le fa’aaliga lea a le Faife’au.

“O lo matou mana’o lava lea, ia puipuia o matou tagata mai a’afiaga ia, ui e to’atele lava nisi o tagata lelei o iai, ae o lo’o iai lava nisi e matua mata’utia lava i tagata nei, ne’i o’o mai afaina ai le to’amalie ma le saogalemu o le atunu’u.” 

O fa’amaumauga mai le tusiga-igoa o le 2011, e 98 pasene o tagata Samoa, o tagata e lolotu i ekalesia Kerisiano.

O le isi vaega e aofia ai fa’atuatuaga Hindus, o tagata lolotu ia Buddha ma Ekalesia Iutaia e tele lava ina iai i nofoaga o le taulaga. 

Ae o lo’o iai fo’i ma se fa’apotopotoga o tagata Mosalemi, lea ua i se mea o le 120 tagata ua ‘auai.

O le fa’aaliga a Ma’auga, o le vaega to’agaogao lea na amata fa’atuina i Samoa i le 25 tausaga talu ai, o se fa’amata’u i le atunu’u.  

Peita’i, e matua le-moni lava lea tulaga e pei ona fa’aalia e Dr. Muhammad, lea na saunoa, e sese le mea o lo’o atugalu iai le Faife’au o Ma’auga, o lo’o ta’ita’i-sese e tala le-moni o lo’o fela’ua’i nei. 

“A ua tutupu nei mea ona o fa’asalalauga ma tusitusiga,” o lana fa’aaliga lea. 

“Ua tele ina fa’a’ese’ese e tagata i aso nei, tagata lolotu mai tagata fa’atupu-fa’alavelave. Afai lava o  soifua lelei tagata i totonu o se aiga pei ona masani ai, lona uiga e le o latou o ni tagata fa’atupu-fa’alavelave. Na o tagata e fa’atupu sauaga fa’asaga i isi tagata, o latou na o tagata leaga.” 

ADVERTISEMENT

Na ta’utino fo’i e Dr. Muhammad, e iai Mosalemi e faia osofa’iga mata’utia i le lalolagi. Ae fai mai, e na o se “vaega to’aitiiti lava” ae le tu’ua’ia uma ai tagata Mosalemi i a  latou gaioiga ma fa’atinoga e fai.

Mo le fa’amatalaga e fa’asa Isalama, na ta’ua e Dr. Muhammad, e le tupu se mea fa’apena. 

“E le mafai ona taunu’u lena mea, o le fa’asa o le matou lotu i Samoa nei aua e pei ai latou o ni tagata fa’atu’i’ese i le lalolagi o tatou iai,” o lana fa’aaliga lea. 

“E matua le-manana’o lava e talia le lotu Isalama ae afai la latou te le talia le fanau a Apera’amo, e fa’afefea ona fai mai o latou o Kerisiano. 

 “Ae sa tatau ona mafaufau lelei i vaega ia ma mulimulita’i i fa’ata’ita’iga mai isi vaega o le tatou lalolagi.

“E le o ano lava Konesula Merkel o Siamani i tagata Mosalemi ua lolofi atu i lona atunu’u, ona o tagata-soifua e iai fo’i a latou aia-tatau. Moni fo’i o ia o se ta’ita’i fa’aPolokiki, ae mamao lava lana silasila fa’aleTagata nai lo i latou nei ua ta’ua o ta’ita’i o a tatou ekalesia i’inei.

“O tatou uma o tagata soifua, e iai la tatou aia tele tele lava i lo latou atunu’u nei ma ona pulega.” 

O le aia lea o lo’o aiaia i lalo o le Fa’avae o le Malo o Samoa. 

Moni ua fa’alogo o lo’o taumafai e suia le Fa’avae o le atunu’u ona o se vaega to’agaogao o tagata Mosalemi, ua fesiligia ai e Dr. Muhammad vaega taua nei.

“A silasila lava i falepuipui i lenei atunu’u. ‘Ou te fesili atu: o iai se tagata Mosalemi i se falepuipui o Samoa?”

Na maua le lagolago a Dr. Muhammad mai se tasi o tamali’i iloga o Samoa, lea sa lapata’i mai, o se gaioiga matua mata’utia lava le fa’asa o se ekalesia i lalo o le Fa’avae o Samoa. 

Na fa’aalia e Porofesa Latilati mai le Iunivesete o Otago, o le mautu o le Kerisiano i Samoa nei, le tasi o mafuaga o le mautu ai ma sologa lelei lenei atunu’u ma o le fa’atuatuaga lea ua mausali ma faiga-malo fa’apea aganu’u masani. 

Ae na ta’ua, o le a aga’i atu ina fa’aletonutonu Samoa pe a taumafai e fa’asa isi fa’atuatuaga ma ekalesia fou.

“’Ou te talitonu lava e le valea e na tusia le Fa’avae o Samoa ma e le tatau ai lava i le malo ona toe lolote fua le Fa’avae. O lo’o lelei lava ma atoatoa i lona tulaga o iai nei.” 

Na ta’ua fo’i e Dr. John Shaver mai le Iunivesete o Otago, i so’o se atunu’u lava e iai ni vaega to’agaogao fa’apea, e faigofie lava ona sosolo ma olaola pe a le-malamalama tagata.

“O le fa’afitauli tele, o le leai o se malamalama’aga, leai ni fa’amatalaga e manino ai, ae maise fo’i, o lagona fa’aleTagata e musua ai e feso’ota’i ma tagata Mosalemi lelei, Mosalemi filemu. A leai mea uma nei, ona fa’alagolago loa lea i nusipepa ma fa’asalalauga fa’alaua’itele e maua ai se malamalama’aga,” o lana fa’aaliga lea. 

“A ua tatou talitonu uma, o fa’asalalauga e uiga i ekalesia nei ma fa’atuatuaga to’agaogao nei o lo’o faia i luga o feso’ota’iga, e mafai ona tu’umamaina ai le manatu fa’apito ma manatu fa’atu’i’ese e fa’asaga atu iai.”

MH
By Mathias Huckert, 21 May 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?