Lauga - “E totonugalemu ia Keriso mea uma”

RP
By Rev. Petaia Setu, 05 August 2018

O le ‘poutu’, o le pou lea e tu i le moa (ogatotonu) o le fale Samoa. O le talitonuga o tufuga Samoa (tupuga faufale), o le malosiaga lea o le fale. O le pou lea na te tauamoa le fale atoa. E taula’i iai vaega uma o le fale. E taoto iai le atuso’a, o le atuao, o le tau’asoga mai lona pae e oo a’e i le ’au’au. Na te taofia i luga le fale. O lona uiga, na te faamalosia le fale. Na te faaeaina vaega uma o le fale. I le, e le siligia foi la le ’anoa o lona anofale.

Ua faapea le vaai a Paulo i le tofa lilo a le Atua ua folasia. Ua matala ia sega lona finagalo alofa, ina ia fai Keriso ma fesootaiga ma taula’iga o mea uma i le lagi ma le lalolagi.(f.9-10) O lona uiga, o Iesu Keriso, e totonugalemu iai mea uma, auā o ia o le Poutu o le malumalu o le Atua (Efe.2:21).

Ua manino lelei i le tōfā saili a le aposetolo, fuafuaga lilo ma le faamoemoe  alofa o le Atua, ua mamao ai ona tapena faa-fafine tō’aga lona alofa laveai. I le manatu a Paulo, ua le faia faalilolilo lea tapenaga a le Atua ina ia le iloa e tagata. Leai. O le faamoemoe o le Atua ua loa ona faatōfāla’i i maota. Ua leva! “…a o le i faavaeina le lalolagi” (f.4). La lea ua aumai i lumāmea, “e totonugalemu ia Keriso.” O lana tapenaga lea. Na te aumaia tagata uma ma mea uma lava o i le lagi ma le lalolagi, ia tasi ia Keriso.

O le ata foi la lea o loo taumafai le toeaina nei e faailoa ma faamalamalama, ina ia manino iai le ekalesia ma le au faatuatua uma o i Efeso. E tofu le tagata ma lona faiva. Ae ’auga mea uma i le Alii. O itu tino taitasi i tatou o le tino poo le fale o Keriso, Le ua fai ma Ulu o le tino; ua fai ma poutu o le fale. Ia iloa e le tagata lona tulaga ma lana matafaioi. Ia e malamalama i ou faiva ma ou tiute fai i aso uma, o se auaunaga faaitu tino e laugatasia ai itutino taitasi uma, e atia’e faatasi ma soosoo tauau faatasi mo le tauleleia ma le lelei tausia o le tino o Keriso, o lana ekalesia lea.

O i latou uma ua talitonu ma faatuatua, o sui lava i latou o le tino paia ua fai ai Keriso ma ulu. E le gata ina saunia e le Atua la lea tino mo Keriso ina ia mafatia ai, ae na ia saunia lava foi se tino mo Keriso ina ia viia ai. O le ata o Iesu Keriso i le vaai a le tusi nei, “ o mea uma i mea uma a tatou uma” O le matafaioi tonu lea a le poutū. Na te tauavea mea uma o le fale atoa uma. O lona malosi, e iloga ai le fale. O lona ola, e tu malo ai le fale. Auā foi, e ia te ia vaega uma o le fale. E ola ia te ia. Ua fai lava ia ma malosiaga auā ua fesootai ia te ia. O le faamoemoe laualuga lea o le Atua, ia tuufaatasi ia Keriso lana fanau, o lana ekalesia lea. O le fesili – O afea? Ae faapefea?

O le tele ma le faatupula’ia pea o mea matagā ma faiga faasolitulafono i o tatou lava tagata ma o tatou laufanua, ua leotetele ai le alaga a tagata ma tuufesilisili le atunuu – A o fea ea le Ekalesia? Ae afua i se a ona siligia le Ekalesia? Auā foi o le tino ia o Keriso. O le tino tatalo. O le tino fai vavega. Na te faamalolo ma’i. Na te faamalamalamaina le pouliuli. O le leleleiga i maseiga. E fealofani ai le fefulituaa’i. Na te taofia misa ma taua. E molimau upu, ma faailoa tino o upu. E mau i le galuega folafola, ae sili atu ona alofa faaola. E le o se tino faanofonofo, a o le savali ma asiasi faasolo.

Le au uso e, ua saoasaoa faafitauli o le lalolagi. A o lea lava tatou te nofoa’i. Maloloina pe ma’i, fai le galuega lavea’i. O le finagalo alofa o le Atua, ia tasi tatou uma ia Keriso. ’Aua le tosoa faamalosi tagata i ou mana’o! E le o oe o se poutu. E faaeaina tatou uma ia Iesu. O lona uiga, faasoa atu i le lima vaivai. Fafaga i e matitiva ma fia aai. Faaaoga tatau le mau lafoga soona fai e fesoasoani ai i pili o nisi fanau; i nai aiga foi ua tau faaletonu o latou fanua ma toe toso fale! Le ekalesia e, o lau galuega tonu lava lenā. ’Alo ese mai pisinisi ma tuinanauga o le lalolagi. ’Aua e te faaaogaina sesē le paoa faa-taitai. Taitai tagata uma i le Alii. A’oa’o le ekalesia i le mea moni ua fai mai ai le Tuai Paia.

ADVERTISEMENT

Ia outou fa’aa’oa’o i le Atua, ma ia savavali ma le faautauta. O le tino paia o Keriso, o le ekalesia ua mata’u i le Atua. Galulue i le loto e tasi. Tasi mamā. Le loto e alofa; e faamaoni. Pe ana ua maua le agaga moni lea ua leva ona tapena e le Atua, po ua tino mai le Ekalesia Soofaatasi. Po ua le toe iai o se Katoliko, se Metotisi, se EFKS, se AOG, ma isi lotu uma, ae ua tasi tatou uma ia Keriso Iesu. Fai mai Iesu, “E le mafaia e tagata, na o le Atua” (Mare.10:27). Aisea? O le tali – Sesē le poutu. Ua le o Iesu. O le ulu Iesu i le faalagiga, ae le o le faatinoga ma faiga!

O le ma’i lava foi lea o Samoa i soo se pulega; faale malo, faale nuu, ma le faale lotu. E felefele manatu ma lagona auā ua fetaufaoa’i le pule. Ua le afea lava e le faumalo le upu ua faalele mai i le fofoga o le Atua. “O mea uma lava o i lalo o le lagi, o a’u mea ia” (Iopu.41:11). O lo tatou tiute, ia faatonu ma taitai atu mea uma a le Atua ia totonugalemu ia Keriso. Tatou te galueaina ma atia’e, ae ’auga ma tapuvae tasi ia Keriso. Ana tatou iloa o tatou o tausi mea a le Atua po ua tatou malamalama i o tatou tofiga ma o tatou tiute tauave. Po ua toafilemu o tatou manatu, ma tausi va le tōfā.

Samoa e, a sa’o le poutū o lou fale(lou tagata), e ’oa lou anofale. E ’ānoa lau faatofala’iga. E mau lau faautaga. E le mativa lau atoponapona. Auā o Iesu Keriso, o le tumu sa faatofala’i. Ole faapolopolo a le Atua sa moena’i auā se lelei o lo ta atunuu. Ina ia saoloto Samoa i lona tofi, e auauna ma vivii atu ai i le Atua o le lagi ma le lalolagi. 

O le agaga lea o le tusi a le aposetolo. O se faamalosi ma faamalamalama atu i tagata lotu le uiga, le natura ma le faamoemoe o le ekalesia, o le tino ia o Keriso. Ia o se tino ua manino i ona faiva. Ia tumau ma mauaa i le poutu poo le ao o le ekalesia. Ia lototetele, ma ia malolosi i le mana o Keriso.

Samoa e, o le malosiaga lea o le malumalu o le Alii i le lalolagi nei. O oe ma a’u, o le tino ua faatatauina ia te ia, ina ia fai ma malumalu paia. Ia fai ma tino malamalama. Ia fai ma fale manuia. Auā o manuia uma ia Keriso,e maua ina ua tasi aiga uma, nuu uma, faalapotopotoga uma ma Samoa atoa ia Keriso. Auā o ia lava, e soifua ia maliu, e maliu ia soifua, pea lava pea e faavavau, i le finagalo pule a le Atua, e totonugalēmu iai mea uma lava.

 

Amene

 

7737063/7783782

RP
By Rev. Petaia Setu, 05 August 2018

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investigative articles.

Ready to signup?